?Bambae Yu Talem Wanem Long Wan Budis?
1 Long samfala kantri, bitim stret haf blong olgeta we oli tekem baptaes oli Budis bifo. Long ples blong yumi, yumi save mitim sam man blong skul ya tu. ?Wanem i save pulum olgeta blong kam long trutok? ?Wanem sam gudfala rod blong talemaot gud nius long ol Budis?
2 Soemaot We Yu Rili Wantem Givhan Long Olgeta: Plante man we bifo oli Budis oli talem se ol gudfala toktok nomo oli no save pulum olgeta blong kam long trutok. Oli laekem moa taem ol man oli rili wantem givhan long olgeta. Wan dei wan sista i visitim wan woman Jaena long Amerika. Woman ya i sek from we sista ya i traem frengud wetem hem, nao hem i agri blong stadi Baebol. Hem i no savegud Engglis, be nating, sista i gat longfala tingting. Taem woman ya i taed no i no save mekem stadi blong hem, sista i jes pas blong talem halo mo putum wan narafala dei blong mekem stadi. Biaen, woman ya wetem boe blong hem mo olfala mama blong hem, trifala oli baptaes. Nao woman ya i gobak bakegen long ples blong hem, mo hem i givhan long fulap man blong kasem trutok. Wan boe blong hem i stap wok long Betel. !Ol blesing ya oli kam from we sista we i prij long hem, i gat fasin blong Jeova, “fasin kaen mo lav”!—Taet. 3:4, NW.
3 Tingting Blong Ol Man Budis: Ol Budis oli agri nomo blong man i folem narafala tingting, be oli ting se ol bilif blong man oli no impoten. Taswe ol Budis oli no sem mak, oli gat ol defdefren tingting. Long wan skul blong ol Budis, oli ting se ol man oli mas safa long wol ya, mo blong kamaot long trabol laef ya, oli mas kasem laet: nao oli save kam fri, oli no moa mas bon bakegen oltaem. Be oli ting se blong no moa kamdaon long wol ya, oli mas kasem Nirvana fastaem. Long tingting blong olgeta, Nirvana hem i no wan ples mo wan samting. I no gat wan samting nating long hem, hem i emti olgeta, taswe i no gat trabol mo man i no save safa. (Lukluk ?Wanem Bambae i Hapen Long Yumi Taem Yumi Ded?, pej 9-10.) ?Hemia i minim wanem? Man we i wantem storebaot ol tijing blong ol man Budis, hem i stap lusum taem nomo. I moa gud blong storeyan long ol problem we olgeta man oli mas fesem.
4 Soemaot Ol Samting We Yumi Evriwan i Nidim: Ol Budis oli ting se man i mas safa long wol. Taswe oli no laekem tingting ya se man i save laef blong olwe long wol ya. Be yumi evriwan yumi wantem haremgud long famle blong yumi. Yumi wantem we ol man oli no moa safa. Yumi wantem save from wanem yumi stap long wol. ?Olsem wanem yu save tokbaot ol samting ya?
5 Yu save traem fastok olsem:
◼ “Tede plante gudfala man oli stap safa. ?Wanem i save mekem we bambae ol man oli no moa trabol olsemia? [Letem man i ansa.] Wan promes blong bifo i leftemap tingting blong mi. [Ridim Revelesen 21:4.] Tru, taem ya i no kam yet, be taem bambae hem i kam, yumi wantem luk samting ya, no?” Afta, soemaot wan buk we i talem se ol man bambae oli no moa harem nogud.
6 Wetem wan olfala, yu save talem se:
◼ “Ating yu olsem mi. Mi no laekem olgeta niufala tingting we oli rabis, we oli stap mekem trabol long ol pikinini blong yumi naoia. ?From wanem ol yangfala oli mekem plante rabis fasin naoia? [Letem man i ansa.] I gat wan olfala buk we ol man oli stat raetem taem i no gat yet ol skul Muslim, Kristin mo Hindu. Buk ya i talemaot finis ol samting we yumi luk naoia. [Ridim 2 Timoti 3:1-3.] Yu luk, ol samting ya oli mas hapen long ol man, nating we olgeta oli stap lan oltaem. [Ridim vas 7.] I gat sam trutok we ol man oli neva lanem, oli stap long buk ya. ?Maet yu glad blong ridim hem?” Soemaot wan buk no wan buklet we i stret long man ya.
7 Ol Budis oli gat respek long Baebol from we hem i wan tabu buk. Yu save ridimaot ol tok blong hem stret. (Hib. 4:12) Sipos wan man i no laekem Baebol from we hem i ting se hem i blong ol waetman, soemaot we buk ya oli raetem long ol kantri blong Is.
8 Ol Buk We Oli Save Givhan: I gat sam buk we Sosaeti i wokem stret blong givhan long ol man Budis. Olsem traket Will Suffering Ever End? we oli wokem long ol lanwis blong Jaena mo Japan. Mo tu, sam pablisa oli mekem gudfala wok wetem ol buk ya: Spesel Rod Blong Mekem Famle i Hapi, Mankind’s Search for God, mo Questions Young People Ask—Answers That Work; ol buklet “Look! I Am Making All Things New,” mo What is the Purpose of Life—How Can You Find It? Mo sipos i gat sam traket Kingdom Nius namba 35, ?I Save Gat Wan Taem We Olgeta Man Bambae Oli Laeklaekem Olgeta? Plante Budis oli stat stadi long buklet Wanem fastaem, nao biaen oli go long buk Save.
9 Sam stori oli talem se ol man Budis oli kam long Atens, long Gris, 400 yia bifo we Pol i kam prij long ples ya. Be yumi no save sipos Pol i mitim wan man we i gat tingting olsem. Be yumi savegud we Pol i gat strong tingting blong talemaot gud nius long olkaen man. Hem i rere blong kam “slef blong olgeta man . . . blong yusum olgeta rod blong sevem sam long olgeta.” (1 Kor. 9:19-23) Yumi tu yumi mas soemaot we yumi rili wantem givhan long olgeta man we yumi faenem, mo yumi mas talemaot hop blong yumi long olgeta.