!Ol Profet Tok Blong God Bambae i Mas Kamtru!
1 Oltaem ol Witnes blong Jeova oli intres long profet tok blong Baebol. Taswe yumi bin haremgud blong luk we stamba tok blong Distrik Asembli long yia ya, hemia “Profet Tok We i Kamaot Long God.” Yumi bin wantem tumas blong save se Jeova bambae i givim wanem long yumi olsem “kakae long stret taem” (Mat. 24:45) Mo hem i bin givim ol nambawan samting.
2 Ol Bigfala Poen Long Asembli: Long Fraede, stamba tok ya “Lesingud Long Profet Tok Blong God,” i bin talemaot ol samting long saed blong taem we bodi blong Jisas i jenis i kam narafala, mo tok ya i wekemap tingting blong yumi. (Mat. 17:1-9) Tok ya i makemgud se naoia yumi stap klosap long beswan taem blong histri, from we yumi stap dip insaed long taem blong en. !Mo niufala wol i stap klosap fored long yumi! Wan impoten rod blong lesingud long tok blong God, hemia tru long fasin blong ridim Baebol oltaem, mo yumi nidim fasin ya. Tok we i gat tri haf long hem, “Yumi Haremgud Blong Ridim Tok Blong God” i bin givim sam gudfala advaes blong mekem Baebol riding blong yumi i karem moa frut mo mekem yumi glad moa.
3 Long Sarede aftenun yumi bin lukluk bakegen sam risen from wanem yumi mas gat strong bilif se yumi stap laef long ol las dei. ?Yu save tingbaot ol risen ya? Long Sande moning, profet tok blong Habakuk i rili wekemap yumi from we yumi bin lan se taem blong yumi i klosap sem mak long taem blong Habakuk. Mo i no longtaem ol bigbigfala samting bambae i mas hapen, taem Jeova i spolem ol rabis man mo i sevem ol stret man. ?Yu bin kasemsave bigfala poen long Baebol drama long saed blong Jekob mo Esao? Yumi mas wok strong blong kasem ol blesing blong Jeova, mo faet agens long fasin slak mo fasin blong no kea nating.
4 Wan Niufala Buk We Yumi Intres Bigwan Long Hem: Yumi glad tumas blong kasem niufala buk ya, Pay Attention to Daniel’s Prophecy! Ating yu stat finis blong ridim nambawan buk ya. Brata we i bin soemaot buk ya i talem: “Klosap evri haf blong profet tok insaed long buk blong Daniel i kamtru finis.” !Tok ya i rili makem we long taem blong yumi, en i stap kam klosap!
5 Program blong asembli ya i mekem bilif blong yumi i strong se evri promes we God i mekem be i no kamtru yet, bambae oli mas kamtru. !Strong bilif ya i pusum yumi blong gohed blong talemaot ol profet tok blong God long ol narafala!