Olsem Wanem Blong Mekem Man i Tinginggud
1 Wan mining blong tok ya ‘mekem man i tingtinggud’, hemia se “toktok wetem narafala blong jenisim fasin mo tingting blong hem.” Blong karem moa frut long wok blong prij, yu nidim blong wokem fasin ya blong mekem ol man oli yusum tingting blong olgeta taem yu storeyan wetem olgeta. (Wok 17:2-4, NW) Be ?olsem wanem yu save lanem fasin ya?
2 Stat Wetem Fasin Blong Tingting Dip: Taem yu stadi long ol trutok blong Baebol mo tingtinggud long wanem we yu ridim, samting ya i save givhan long yu bigwan. Sipos i gat sam poen we oli no klia tumas, yu mas tektaem blong mekem risej mo tingting dip long ol ansa we yu faenem. Traehad blong kasem save klia mining blong poen we yu ridim, be tu, traem kasem save long ol risen we Baebol i givim blong eksplenem poen ya.
3 I Nidim Blong Reregud Blong Mekem Wok Blong Prij: Tingbaot olsem wanem yu yu save eksplenem trutok long ol defren kaen man. Mekemap wan kwestin we i save pulum man blong tingting mo kasem intres blong hem. Traem luksave olsem wanem blong joenem wan poen blong Baebol i go wetem kwestin ya mo mekem man i tingting gud long hem. Tingbaot sam tok we maet ol man oli save talem blong blokem storeyan blong yu, mo faenem rod we maet yu save folem blong winim ol tok ya. Makem wan poen insaed long ol buk we yumi seremaot, we bambae i save laenap gud wetem toktok blong yu.
4 Folem Eksampel Blong Jisas: Jisas i soemaot beswan eksampel we yumi save folem blong mekem man i tingting long samting we Baebol i talem. Lukluk olsem wanem we hem i tijim man, taem yu ridim stori we i stap long Luk 10:25-37. Makem gud rod we hem i folem: (1) Pulum tingting blong man i go long Baebol blong givim ansa long kwestin blong olgeta. (2) Askem olgeta blong talemaot tingting blong olgeta, mo talem gudfala toktok long olgeta taem oli talem sam samting we i soemaot se oli gat fasin luksave. (3) Meksua se tingting blong man i luksave klia olsem wanem kwestin mo vas blong Baebol tufala i joen. (4) Yusum wan pijatok we i save kasem hat blong man blong mekem sua se hem i kasem impoten poen long ansa we yu givim.—Lukluk Wajtaoa (Inglis) blong Maj 1, 1986, pej 27-28, haf 8-10.
5 Yusum Tul Ya We Yumi Kasem: Buk ya Reasoning From the Scriptures, hem i wan buk we Sosaeti i wokem blong givhan long yumi long wok blong prij. Ol fastok blong hem, ol ansa we hem i givim long ol tok we man i sakem blong blokem storeyan blong yumi, mo ol poen we hem i givim blong yumi yusum blong kasem tingting blong man, oli save halpem yumi blong kam gud moa long fasin blong mekem man i yusum tingting blong hem. Reasoning buk i wan tul we i sas tumas, mo we yumi mas karem wetem yumi oltaem, taem yumi prij, mo yumi no mas fraet blong yusum buk ya taem yumi storeyan wetem ol man long saed blong Baebol. Lukluk bakegen ol pej 7-8 long buk ya blong luk olsem wanem yumi save yusum hem long rod we i save karem moa frut.
6 Sipos yu lanem fasin ya blong mekem man i tingting, bambae yu gat gudhan moa long wok ya blong prij mo tijim man. Samting ya bambae i karem plante sas blesing i kam long yu mo olgeta man we yu mitim long wok blong prij.