?Yu Yu Stap Yusum Reasoning Buk?
1. ?Olsem wanem aposol Pol mo Jisas tufala i tijim ol narafala man?
1 Aposol Pol i traehad blong ‘yusum Baebol blong pulum tingting blong ol man.’ (Wok 17:2, 3, NW; 18:19, NW) Taem Pol i mekem olsem, hem i folem eksampol blong Jisas we i yusum ol vas blong Baebol oltaem, mo i yusum ol pijatok blong givhan long ol man blong oli kasem save long ol samting we God i wantem. (Mat. 12:1-12) Oli bin wokem buk ya, Reasoning From the Scriptures (Franis/Inglis), mo buk ya Statem Wan Storian Long Baebol Mo Gohed Long Hem, blong tufala i givhan long yumi blong mekem sem mak.
2. ?Olsem wanem smol buk ya Statem Wan Storian, i save givhan long yumi blong rerem ol fastok we oli wokgud?
2 Rerem Ol Fastok We Oli Wokgud: Long pej 4-10 blong buk ya Statem Wan Storian, i gat fulap fastok we oli save pulum intres blong ol man. Taem yumi lanem mo yusum ol defdefren fastok, bambae oli givhan long yumi blong tokbaot ol defdefren poen long wok blong prij, mo oli mekem i isi moa long yumi blong jenisim storian blong yumi mo blong yumi gat gudhan blong statem storian, speseli long wan teritori we yumi wok long hem oltaem. Yumi save ridim ol fastok stret long buk taem yumi yusum telefon blong prij, mo taem yumi toktok long spesel telefon we ol man oli yusum long ol stori haos we oli putum tabu long olgeta blong man i no go insaed.
3. ?Wanem samting i stap long pej 10-16 blong smol buk ya Statem Wan Storian, we i save givhan long yumi long wok blong prij?
3 Ansa Long Ol Man We Oli Wantem Blokem Yumi: ?Yu yu tingbaot finis ol man long teritori we maet oli wantem blokem yu, mo yu tekem smol taem blong jekemap ol ansa we oli stap long pej 10-16 blong buk ya? ?Olsem wanem sipos ol man we bambae yu storian long olgeta, oli joen long ol defdefren skul olsem Budis, Hindu, skul blong ol man Jiu mo Muslim? Sipos i olsem, ol save long pej 21-24 blong buk ya Reasoning bambae oli givhan long yu.
4. ?Olsem wanem blong yusum Reasoning buk no smol buk ya Statem Wan Storian, taem ol man oli askem kwestin no taem oli wantem rao nomo?
4 Ansa Long Ol Kwestin: Reasoning buk mo smol buk ya Statem Wan Storian oli save givhan long yumi tu blong givim ansa long man we i askem kwestin, no long man we i askem kwestin blong pulum rao nomo. Yu save talem long man se yu wantem soem wan haf we bambae hem i intres long hem, long saed blong samting we yutufala i stap tokbaot, nao yu save tekemaot smol buk ya, Statem Wan Storian. Ol stamba tok oli stap long oda blong alfabet, taswe yu save lukaot wan stamba tok we yu ting se bambae i givim ol save we yu nidim. Biaen, yu save lukluk kwiktaem ol kwestin we oli stap long blak raeting aninit long stamba tok ya. Sipos yu yusum Reasoning buk mo yu no faenem haf we yu wantem, tanem ol pej kwiktaem i go long lis we i stap long bak blong buk ya. Taem yu faenem ol save we yu wantem, yu save ridim stret olsem we i stap long buk. Sipos yu stap tokbaot wan vas blong Baebol nomo, maet yu save faenem ol save we yu nidim long pej 445, aninit long stamba tok ya “Scriptures Often Misapplied” (“Textes bibliques souvent mal compris”).
5. ?Wanem sam narafala haf blong Reasoning buk we yumi save yusumgud?
5 Yusum Ol Narafala Haf Blong Buk Ya: Sam brata sista oli tekem Reasoning buk wetem olgeta taem oli go long ples blong wok mo taem oli go long skul, blong givhan long olgeta blong ansa long ol kwestin olsem: ‘?From wanem yufala i no mekem lafet blong ol holide?’ Sam yangfala oli faenem se ol save we oli stap aninit stamba tok ya “Creation” mo “Evolution,” i givhan long olgeta taem oli rerem ol ripot blong skul. ?Olsem wanem? ?Bambae yu yu go luk wan man we i sik no wan we i lusum wan memba blong famle blong hem? Ol vas blong Baebol we oli kamaot long stamba tok ya “Encouragement” oli save givhan long yu blong leftemap tingting blong olgeta. Ol save we oli stap long Reasoning buk, oli save givhan tu long ol brata sista we oli gat tok long Tiokratik Skul, mo olgeta we oli lidim wok blong prij.
6. ?Wanem mak we yumi mas gat taem yumi prij?
6 Taem yumi prij, mak blong yumi i no blong traem winim wan rao, mo i no blong givimaot save nomo. Yumi wantem yusum gud Baebol blong pulum tingting blong ol man. Taem yumi yusumgud Reasoning buk mo smol buk ya Statem Wan Storian, yumi soem se yumi stap lukaot gud long ol tok we yumi stap tijim ol man long hem.—1 Tim. 4:16.