Askem Help
1 Tok blong God i talem se “laef long wol ya bambae i kam strong tumas.” Tok ya i stret gud long taem blong yumi. (2 Tim. 3:1) ?Taswe, yu save mekem wanem sipos yu fesem wan strongfala traem long saed blong spirit, we yu harem se yu no save winim?
2 ?Yu yu rere blong tokbaot bisnes ya long wan memba blong kongregesen we i bigman long saed blong spirit? Samfala, maet oli fraet blong mekem samting ya, from we oli sem lelebet, oli no wantem mekem baden long narafala, mo oli ting se i no gat wan i rili wantem halpem olgeta. I tru se yumi mas traehad blong karem ol prapa responsabiliti blong yumi, be yumi no mas fraet blong askem narafala blong i halpem yumi long ol samting long saed blong spirit.—Gal. 6:2, 5.
3 Weples Blong Stat: Maet yu wantem go luk brata we i lukaot long buk stadi blong yu mo askem sipos yu save prij wetem hem. Olsem nao bambae yu gat jans blong talemaot tingting we yu gat blong gohed moa long saed blong spirit. Sipos brata ya i wan man blong givhan, talemaot nid we yu gat long saed blong spirit, nao bambae hem i askem long sam elda blong oli givhan long yu. No maet yu save go luk ol elda stret mo talemaot tingting blong yu long olgeta.
4 ?Yu yu nidim we oli halpem yu long saed blong wanem? ?Wan samting i spolem strong tingting we yu bin gat? ?Yu yu wan papa no mama we yu wan nomo yu stap traem blong mekem ol pikinini blong yu oli joen oltaem wetem kongregesen? ?Yu yu wan olfala we yu nidim narafala blong givhan long yu? ?No sam problem oli mekem tingting blong yu i foldaon? I hadwok blong fesem taem blong yumi we laef i strong tumas—be yumi save fesem. Yumi save kasem help.
5 Olsem Wanem Ol Elda Oli Givim Help: Ol elda oli rili kea long yumi. Bambae oli lesin long yu taem yu talemaot tingting blong yu long olgeta. Sipos ol narafala pablisa oli stap fesem ol semfala traem, bambae ol elda oli tingbaot samting ya taem oli stap lidim mo tijim kongregesen. Ol elda oli olsem ‘eksampel long ol sipsip.’ Taswe, oli rere oltaem blong wok klosap long yu wetem glad. (1 Pita 5:3) I gud we yu lesin gud long ol brata ya we oli gat plante save taem oli pulum tingting blong yu i go long ol rul blong Baebol. Olsem nao, bambae yu kam moa gud long minista wok blong yu, mo tu bambae samting ya i givhan long prapa laef blong yu.—2 Tim. 3:16, 17.
6 Jisas i givim plante “man we oli olsem presen.” (Efes. 4:8, NW) Hemia i minim se ol elda oli stap blong givhan long yu. Olgeta oli rere oltaem blong halpem yu, i olsem we ‘oli blong yu’ (1 Kor. 3:21-23). Taswe, i gud we yu toktok wetem olgeta, bitim we yu stap kwaet nomo. Askem help we yu nidim.