“Singaot Ol Elda”

1. ?Jehova i soemaot olsem wanem se hem i lavem ol sipsip blong hem?

JEHOVA i lavem tumas ol man we oli olsem ol sipsip blong hem. Hem i yusum blad blong Jisas blong pemaot olgeta, mo i putumap ol elda blong lukaot gud long olgeta. (Wok 20:28) God i wantem se ol elda oli kaen long ol sipsip blong hem, mo i wantem we oli folem gud advaes blong Jisas we i hed blong kongregesen, blong leftemap tingting blong ol sipsip ya mo protektem olgeta long saed blong spirit.—Aes. 32:​1, 2.

2. ?Jehova i wantem tumas blong givhan long hu? (Esikel 34:​15, 16)

² Jehova i tingbaot evri sipsip blong hem, be hem i wantem tumas blong givhan long olgeta we oli stap safa. Hem i yusum ol elda blong givhan long olgeta we oli harem nogud from wan bigfala sin we oli bin mekem. (Ridim Esikel 34:​15, 16.) Nating se i olsem, Jehova i wantem se yumi evriwan i askem help. Yumi save prea blong hem i givhan long yumi, be yumi save askem help tu long ‘ol man blong lukaot long sipsip, mo ol tija’ long kongregesen.—Efes. 4:​11, 12.

3. ?From wanem i gud we yumi evriwan i save wok blong ol elda?

³ Long stadi ya, bambae yumi luk olsem wanem Jehova i yusum ol elda blong givhan long yumi blong fren gud wetem hem. Bambae yumi ansa long ol kwestin ya: ?Wetaem yumi mas askem help long ol elda? ?From wanem yumi mas askem help? ?Mo olsem wanem ol elda oli save givhan long yumi? Nating se naoia yumi no nidim help blong ol elda, be ansa blong ol kwestin ya bambae i pulum yumi blong talem tangkiu long Jehova from nambawan rod ya we hem i yusum, mo blong save samting we yumi mas mekem taem yumi nidim help.

?WETAEM YUMI MAS “SINGAOT OL ELDA”?

4. ?From wanem yumi talem se Jemes 5:​14-16, 19, 20 i stap tokbaot wan man we i sik long saed blong spirit? (Mo tu, yu luk ol pija.)

⁴ Disaepol Jemes i eksplenem olsem wanem Jehova i yusum ol elda blong givhan long yumi. Hem i se: “?I gat wan long yufala we i sik? I gud hem i singaot ol elda blong kongregesen.” (Ridim Jemes 5:​14-16, 19, 20.) Long vas ya, Jemes i stap tokbaot wan man we i sik long saed blong spirit. Taswe, hem i talem se man ya i mas singaot ol elda, be i no wan dokta. Mo tu, hem i se man ya bambae i kam gud bakegen taem God i fogivim hem. Yumi save talem se wan man we i sik long saed blong spirit i sem mak long wan man we i sik long saed blong bodi. Taem yumi sik long saed blong bodi, yumi go luk wan dokta, yumi eksplenem sik blong yumi, mo yumi folem ol advaes blong hem. Long sem fasin, taem yumi sik long saed blong spirit, yumi mas go luk wan elda, yumi tokbaot problem blong yumi, mo yumi folem ol advaes blong Baebol we hem i givim.

5. ?Olsem wanem blong save sipos yumi no moa fren gud wetem Jehova?

⁵ Long Jemes japta 5, Jemes i leftemap tingting blong yumi blong go luk ol elda taem yumi luksave se yumi no moa fren gud wetem Jehova. I gud yumi askem help blong ol elda bifo we yumi mekem wan samting we i no stret. Baebol i se sipos yumi no lukaot gud, maet yumi save gat tingting ya se yumi stap mekem Jehova i glad, be yumi stap giaman long yumi wan bakegen. (Jem. 1:22) Hemia nao tingting we sam Kristin long Sadis bifo oli gat, be Jisas i talem long olgeta se Jehova i no glad long olgeta. (Rev. 3:​1, 2) Taswe, i gud yumi skelem sipos lav we yumi gat long Jehova i stap strong yet olsem bifo o nogat. (Rev. 2:​4, 5) Yumi save askem yumi wan se: ‘?Mi mi glad yet blong ridim Baebol mo tingting dip olsem bifo? ?Mi mi stap rerem gud ol miting blong mi mo mi go oltaem long ol miting? ?Mi mi gat strong tingting yet blong prij? ?Mi mi putum wok blong Jehova fasples i bitim ol samting blong spel mo pleplei mo ol sas samting?’ Sipos yumi ansa no long sam long ol kwestin ya, hemia i soemaot se yumi stat blong kam slak, mo sipos yumi no lukaot gud, bambae yumi save mekem wan samting we i no stret. Sipos yumi luksave se yumi wan nomo yumi no naf blong kam strong bakegen, o sipos yumi mekem finis sam samting we i no laenap wetem tingting blong Jehova, i gud yumi askem help long ol elda.

6. ?Ol man we oli mekem wan bigfala sin oli mas mekem wanem?

⁶ Olgeta we oli mekem wan bigfala sin we kongregesen i save putumaot olgeta from, oli mas go luk wan elda. (1 Kor. 5:​11-13) Ol man olsem oli nidim help blong oli save fren gud bakegen wetem Jehova. Sipos yumi wantem se Jehova i yusum ransom blong fogivim yumi, yumi mas mekem ‘ol wok we oli soemaot se yumi tanem tingting’ blong yumi. (Wok 26:20) Wan long ol wok ya, hemia blong go luk ol elda taem yumi mekem wan bigfala sin.

7. ?Hu bakegen i mas askem help long ol elda?

⁷ Ol elda oli givhan long olgeta we oli mekem bigfala sin, be oli givhan tu long olgeta we oli slak long saed blong spirit. (Wok 20:35) Eksampol, maet yu harem se yu no naf blong faet agensem ol nogud samting we yu wantem, speseli sipos bifo we yu kam long trutok, yu lan blong mekem ol fasin olsem tekem drag, lukluk ol doti pija blong seks, o mekem ol rabis fasin long saed blong seks. Yu no nid blong faet agensem ol nogud fasin ya yu wan. I gud yu toktok long wan elda we bambae i lesin gud long yu, i givim ol gudfala advaes, mo i leftemap tingting blong yu se yu save mekem Jehova i glad taem yu traehad blong blokem ol nogud samting we yu wantem. (Pri. 4:12) Sipos tingting blong yu i foldaon, ol elda bambae oli mekem yu tingbaot se Jehova i glad long yu from we yu askem help, mo yu soemaot se yu tinghae long frensip blong yu wetem Jehova mo yu no trastem yu wan bitim mak.—1 Kor. 10:12.

8. ?Wanem kaen mastik we yumi no nid blong go luk ol elda from?

⁸ Yumi no nid blong go luk ol elda from evri smosmol mastik blong yumi. Eksampol, maet yu kros bitim mak, nao yu talem wan samting we i mekem wan brata o wan sista i harem nogud. Long taem olsem, yu save folem advaes ya blong Jisas blong go mekem pis wetem brata o sista ya. (Mat. 5:​23, 24) Mo tu, yu save mekem risej long ol fasin olsem kwaet fasin, longfala tingting, mo bos long tingting blong yu save soemaot moa ol gudfala fasin ya long fiuja. Be sipos yu harem yet se yu no save stretem problem ya, yu save askem wan elda blong givhan long yu. Long leta we aposol Pol i raetem i go long ol Kristin long Filipae, hem i askem wan brata blong i givhan long Yuodia mo Sintike blong stretem problem we tufala i gat bitwin tufala, mo hemia sem samting we wan elda i save mekem blong givhan long yu.—Fil. 4:​2, 3.

?FROM WANEM YUMI MAS SINGAOT OL ELDA?

9. ?From wanem yumi no mas sem blong singaot ol elda? (Ol Proveb 28:13)

⁹ Yumi nidim strong bilif mo strong tingting blong askem help taem yumi mekem wan bigfala sin, o taem yumi harem se yumi no naf blong faet agensem wan slak fasin blong yumi. Yumi no mas sem blong askem help long ol elda. ?From wanem? From we Jehova i yusum ol elda blong givhan long yumi blong yumi fren gud wetem hem. Taswe taem yumi askem help long ol elda, yumi soemaot se yumi trastem Jehova, yumi obei long hem, mo yumi luksave se yumi nidim help blong hem blong yumi no foldaon. (Sam 94:18) Mo sipos yumi bin mekem wan sin, Jehova bambae i fogivim yumi sipos yumi talemaot mo yumi no moa mekem sin ya bakegen.—Ridim Ol Proveb 28:13.

10. ?Wanem i save hapen sipos yumi traem blong haedem ol sin blong yumi?

¹⁰ Sipos yumi talemaot sin blong yumi long ol elda, gudfala frut i save kamaot from. Be sipos yumi traem blong haedem, yumi save kasem trabol from. Taem King Deved i traem blong haedem sin blong hem, tingting blong hem i stikim hem, mo hem i harem nogud long filing mo bodi. (Sam 32:​3-5) Taem yumi sik o yumi kasem wan kil be yumi no go luk wan dokta, problem ya i save kam mowas. Mo hemia i sem mak taem yumi sik long saed blong spirit. Jehova i no wantem se samting ya i hapen long yumi, taswe hem i askem yumi blong go luk ol elda we hem i putumap olgeta blong oli givhan long yumi, blong yumi save “stretem ol samting ya” wetem hem.—Aes. 1:​5, 6, 18.

11. Sipos yumi traem blong haedem ol sin, ?olsem wanem hemia i spolem ol narafala?

¹¹ Sipos yumi haedem sin blong yumi, yumi save spolem ol narafala. Yumi save blokem tabu spirit long kongregesen, mo mekem se ol brata mo sista oli no gat pis. (Efes. 4:30) Mo sipos yumi save se wan long kongregesen i mekem wan bigfala sin, yumi mas talem long hem blong i go talemaot long ol elda.a Sipos yumi haedem sin blong hem, bambae yumi tu yumi gat fol long fored blong Jehova. (Lev. 5:1) Sipos yumi lavem Jehova, bambae yumi no fraet blong talemaot sin blong hem long ol elda. Mo sipos yumi mekem olsem, yumi stap givhan long kongregesen blong i stap klin, mo yumi givhan tu long man we i mekem sin blong i fren gud bakegen wetem Jehova.

?OLSEM WANEM OL ELDA OLI GIVHAN LONG YUMI?

12. ?Olsem wanem ol elda oli givhan long olgeta we oli no strong long saed blong spirit?

¹² Baebol i talem se ol elda oli mas givhan long olgeta we oli no strong long saed blong spirit. (1 Tes. 5:14) Sipos yu bin mekem wan sin, maet ol elda bambae oli askem sam kwestin long yu blong traem “pulumaot” o faenemaot ol tingting mo filing blong yu. (Prov. 20:5) I tru, maet yu fraet o yu sem blong tokbaot long ol elda, samting we i hapen. Be sipos yu talemaot klia evri samting long olgeta, hemia bambae i givhan bigwan long olgeta. Mo yu no mas fraet sipos ‘ol tok blong yu i olbaot nomo.’ (Job 6:3) Ol elda bambae oli no kwik blong jajem yu, be bambae oli lesin gud blong faenemaot evri samting bifo we oli givim advaes long yu we i stanap long Baebol. (Prov. 18:13) Ol elda oli save se i tekem taem blong givhan long wan man we i nidim help, taswe oli save se samtaem oli mas storian plante taem wetem man ya, bifo we oli givhan long hem.

13. ?Ol prea blong ol elda mo ol vas blong Baebol we oli serem i save givhan olsem wanem long yu? (Mo tu, yu luk ol pija.)

¹³ Taem yu singaot ol elda, bambae oli no wantem mekem se yu harem nogud moa. Be bambae oli prea long bihaf blong yu. Maet bambae yu sapraes se prea blong olgeta i gat “paoa blong givhan” long yu. Mo tu, bambae “oli putum oel long [yu] long nem blong Jehova.” (Jem. 5:​14-16) “Oel” ya, hemia trutok blong God long Baebol. Ol elda bambae oli yusum gud Baebol blong leftemap tingting blong yu mo mekem yu harem gud, nao yu save fren gud bakegen wetem Jehova. (Aes. 57:18) Ol vas blong Baebol we oli serem wetem yu i save givim paoa long yu, blong yu gohed blong mekem samting we i stret. Jehova i yusum ol elda blong talem long yu se: “Hemia rod. [Yu] folem.”—Aes. 30:21.

14. Folem Galesia 6:​1, ?ol elda oli mekem wanem taem oli stap givhan long wan man we i folem “wan rod we i no stret”? (Mo tu, yu luk ol pija.)

¹⁴ Ridim Galesia 6:1. Wan Kristin we i folem “wan rod we i no stret,” i no stap mekem samting we Jehova i wantem. Wan rod we i no stret i save minim wan mastik we man i mekem from we hem i no tingting gud, o wan bigfala sin we i brekem loa blong God. Ol elda we oli gat lav, oli mas “traem blong givhan long hem blong hem i kambak long stret rod. Be [oli] mas mekem long kwaet fasin.” Grik tok we oli tanem i kam “givhan long hem blong hem i kambak,” oli yusum blong tokbaot olsem wanem wan dokta i stretem wan bun we i brok blong i save kam gud bakegen. Wan gudfala dokta bambae i traehad blong stretem bun ya long wan fasin we i no mekem man i harem nogud moa. Long sem fasin, taem ol elda oli traem blong stretem wan man we i folem wan rod we i no stret, oli no wantem mekem hem i harem nogud moa. Defren olgeta, oli mekem bes blong olgeta blong stretem hem long fasin we i kaen. Vas ya i talem tu se ol elda oli mas “lukaot gud long [olgeta wan].” Taem ol elda oli stap givhan long wan man blong i folem stret rod, oli luksave se olgeta tu oli no stret gud, mo oli save folem wan rod we i no stret. Taswe oli no mas gat tingting ya se oli gud moa long man ya, be bambae oli gat tingting daon mo oli gat sore.—1 Pita 3:8.

15. ?Yumi save mekem wanem sipos yumi gat wan problem?

¹⁵ Yumi save trastem ol elda long kongregesen. Olgeta oli lanem se oli no mas talemaot ol prapa bisnes blong yumi long ol narafala, oli mas givim advaes we i kamaot long Baebol be i no prapa tingting blong olgeta, mo oli mas gohed blong givhan long yumi blong karem ol baden blong yumi. (Prov. 11:13; Gal. 6:2) Ol elda oli gat ol defdefren fasin mo ekspiriens, be yumi save go tokbaot problem blong yumi long eniwan long olgeta. Be i no stret we yumi go luk ol defdefren elda blong askem advaes, mo hop se wan long olgeta bambae i talem samting we yumi wantem harem. Sipos yumi mekem olsem, bambae yumi olsem ol man ya we oli wantem nomo blong harem ol tok we i “switim sora blong olgeta,” i bitim we oli harem “ol gudfala tijing” we i kamaot long Tok blong God. (2 Tim. 4:3) Taem yumi go luk wan elda blong tokbaot wan problem, maet bambae hem i askem long yumi sipos yumi bin toktok finis wetem wan narafala elda long saed ya, mo wanem advaes we hem i givim. Mo from we hem i gat tingting daon, maet bambae hem i go askem advaes long wan narafala elda.—Prov. 13:10.

SAMTING WE YUMI WANWAN I MAS MEKEM

16. ?Wanem samting we yumi wanwan i mas mekem?

¹⁶ Nating se ol elda oli gohed blong lukaot gud long yumi ol sipsip blong God, be oli no talem samting we yumi mas mekem. Yumi wanwan i mas traehad blong mekem laef blong yumi i laenap wetem tingting blong Jehova. Yumi mas soemaot long ol toktok mo aksen blong yumi se yumi lavem hem. Wetem help blong Jehova, yumi naf blong holemstrong long hem. (Rom 14:12) Taswe, ol elda oli no talem long yumi samting we yumi mas mekem, be oli givhan long yumi blong kasemsave long tingting blong Jehova. Taem yumi folem ol advaes ya we i kamaot long Baebol, yumi stap trenem “tingting” blong yumi blong mekem ol desisen we i waes.—Hib. 5:14.

17. ?Jehova i wantem se yumi mekem wanem?

¹⁷ !I wan nambawan blesing blong stap olsem ol sipsip blong Jehova! Jehova i sanem Jisas we i “gudfala man blong lukaot long sipsip,” blong i givim ransom from yumi, nao yumi save gat janis ya blong kasem laef olwe. (Jon 10:11) Mo Jehova i yusum ol elda blong mekem promes blong hem i kamtru, we i se: “Bambae mi givim long yufala, ol man blong lukaot long sipsip, we oli save mekem samting folem hat blong mi, mo bambae oli fidim yufala wetem save mo waes.” (Jer. 3:15) Taem yumi slak o yumi sik long saed blong spirit, yumi no mas fraet blong singaot ol elda. Olsem nao, bambae yumi luk olsem wanem Jehova i yusum ol elda blong givhan long yumi.