Bildimap Intres Blong Man We i Ridim Kingdom Nius No. 36
1 ?Yu seraotem finis olgeta Kingdom Nius No. 36 we oli bin givim long yu? Traket ya i askem wan impoten kwestin we yumi evriwan i mas tingbaot: “Niu Mileniam—?Wanem Fiuja Blong Yu?” Taem yia 2000 i kam klosap, ol man oli gat plante defdefren kaen tingting long saed blong ol samting we bambae oli hapen long niu mileniam ya. Kingdom Nius No. 36 i tokbaot sam long ol tingting ya we ol man oli gat. Hem i mekem yumi tingbaot se ol samting we oli stap hapen long wol tede, oli no givim hop long yumi. Pis mo fasin sef ya we plante man oli stap lukaot, bambae i kamtru nomo long taem blong Mileniam Rul blong Jisas Kraes. Strong bilif we yumi gat long Kingdom ya, i bin pusum yumi blong seremaot Kingdom Nius No. 36 long evriwan we yumi save kasem.
2 Gudfala Frut We i Kamaot From Ol Kingdom Nius We Yumi Bin Seremaot: Ol Kingdom Nius we yumi seremaot bifo finis, oli bin pusum plante long yumi blong mekem moa wok. Long saed blong Kingdom Nius No. 35, branj ofis long Kanada i raetem se: “Ol paenia mo ol pablisa oli bin harem gud tumas blong sapotem spesel wok ya, mo evriwan i glad blong harem plante ekspiryens we i bin leftemap tingting.” I sua se yu bin harem gud tu blong seremaot Kingdom Nius No. 36.
3 Plan i stap se wok ya blong seremaot Kingdom Nius blong yia ya bambae i finis long Novemba 17, 2000. ?Yufala i finisim olgeta teritori we oli bin givim long kongregesen blong yufala? Sipos no, maet ol elda bambae oli askem yufala blong gohed long wok ya go kasem en blong Novemba.
4 ?Wanem nao i bin kamaot taem yufala i seremaot Kingdom Nius No. 36 long ples blong yufala? Sam man bambae oli fulumap smol haf we i stap biaen long pepa ya blong askem buklet ya Wanem mo/no blong askem wan Baebol stadi long haos blong olgeta. Be, plante long olgeta we oli bin soem intres fastaem long saed blong Mileniam, bambae oli no save mekem wan samting go kasem taem we wan Witnes blong Jeova i gobak blong storian wetem olgeta. I gud blong visitim evriwan we oli soem intres. ?Wetaem nao i gudfala taem blong mekem samting ya? I gud blong visitim olgeta kwiktaem.
5 Tingbaot frut we i kamaot long ol ekspiryens ya taem ol pablisa oli bin gobak mo visitim olgeta we oli bin tekem Kingdom Nius No. 35. Wan paenia long Aerlan i givim Kingdom Nius long wan woman we i bos blong wan restoron. Mesej ya i pulum tingting blong woman ya mo hem i askem sista ya blong kambak. Afta we tu dei i pas, sista ya i gobak mo i statem wan Baebol stadi wetem hem. Long Denmak, ol Witnes oli livim wan Kingdom Nius long wan haos we ol man blong hem oli no stap taem oli bin pas. Long sem dei ya, woman we i stap long haos ya i sanem smol haf biaen long traket ya i go long branj ofis, biaen branj ofis i sanem pepa ya i go long kongregesen we i stap long ples blong woman ya. !Bifo wik i finis, tu sista oli go blong visitim woman ya, oli mekem plan blong mekem stadi, mo hem i kam long faswan miting blong hem long Haos Kingdom!
6 Wanem Blong Talem Taem Yu Gobak: I isi lelebet blong mekem visit bakegen long olgeta we yumi bin livim Kingdom Nius wetem olgeta mo hemia wan haf blong minista wok blong yumi we i mekem yumi glad. Taem yu mekem samting ya, i waes blong tekem wan Kingdom Nius No. 36 wetem yu, from we maet man blong haos ya i no holem pepa ya wetem hem. Yu save traem sam long ol storian ya.
7 Afta we yu mekem man long haos i rimemba se yu yu hu, yu save talem se:
◼ “Lastaem, mi bin livim wan smol pepa wetem yu, we stamba blong hem se ‘Niu Mileniam—?Wanem Fiuja Blong Yu?’ ?Olsem wanem? ?Taem yu ridim se i no longtaem Mileniam Rul blong Jisas Kraes bambae i stat, mo i mekem wol i kam Paradaes, samting ya i leftemap tingting blong yu? [Soem ol pija blong paradaes insaed long Kingdom Nius No. 36.] Long pej we i stap biaen, i gat wan tok we i askem yu sipos yu wantem buklet ya ?Wanem Samting We God i Wantem Yumi Blong Mekem?” Soem buklet ya long hem, tanem i go long stadi 5, ridim faswan kwestin mo paragraf 1 mo 2, mo askem man blong haos blong givim ansa. Ridim mo tokbaot wan no tu vas. Sipos i gat janis, tokbaot wan narafala kwestin mo paragraf, biaen mekem plan blong kambak mo gohed long storian.
8 From we long manis Novemba bambae yumi seremaot buklet ya “Wanem” no “Save” buk, maet yu save talem se:
◼ “Taem we mi bin luk yu lastaem, mi livim wan pepa ya ‘Niu Mileniam—?Wanem Fiuja Blong Yu?’ wetem yu. Hem i stap askem sipos man i wantem gat wan fri Baebol stadi long haos blong hem. Mi mi kambak blong soem long yu buk ya we mifala i yusum blong mekem stadi. [Soem buklet ya Wanem, mo tanem i go long pej biaen, no yu save soem Save buk, mo tanem i go long pej 188-189.] Mileniam we Baebol i stap tokbaot bambae i mekem ol samting ya we yu luk long pija ya. Blong laef long Paradaes, yumi mas kasem stret save blong God. Plis letem mi mi soem kwiktaem long yu olsem wanem mifala i mekem stadi long Baebol.”
9 Wok blong seraotem Kingdom Nius No. 36 i pusum yumi blong mekem moa long minista wok blong yumi, mo samting ya i givim wan bigfala witnes. Ating samting ya i pulum intres blong plante man long teritori. Wetem help blong Jeova, bambae frut i kamaot from traehad we yumi evriwan i mekem tugeta. Bambae yumi glad blong faenem sam moa man we oli olsem sipsip.—Mat. 10:11; Wok 13:48, 49, 52.