Yumi Mas Lesingud
1 Blong lesingud, yumi mas bos long tingting blong yumi. Mo tu, man ya we i lesin i mas wantem blong lanem mo karem frut from samting we hem i harem. Taswe, Jisas i makem gud poen ya se “lukaotgud olsem wanem yu stap lesin.”—Luk 8:18, NW.
2 Advaes ya i stret moa taem yumi kam long ol miting blong kongregesen, mo ol asembli. Hemia ol taem we yumi mas lesingud. (Hib. 2:1) Bambae yumi luk sam poen we oli save halpem yumi blong lesingud long ol taem blong ol Kristin miting ya.
◼ Luksave se ol miting oli impoten tumas. Miting i wan stamba rod blong Jeova i stap yusum “man blong wok we i gat hed” blong ‘tijim yumi.’—Aes. 54:13; Luk 12:42.
◼ Reregud fastaem. Ridim ol haf we bambae yumi tokbaot long ol miting, mo meksua se yu karem Baebol blong yu mo buk ya we bambae yumi yusum blong stadi long miting.
◼ Long taem blong miting, traem bes blong yu blong putum tingting blong yu i stap long olgeta tok we i kamaot. Yu mas traehad blong no toktok wetem olgeta we oli sidaon klosap long yu, mo no wajem wanem we ol man raonabaot long yu oli stap mekem. Traem blong no tingting long ol samting we bambae yu mekem afta long miting no long sam narafala samting bakegen.
◼ Skelemgud ol tok we yu stap harem. Askem long yu wan se: ‘?Olsem wanem tok ya i stret long mi? ?Wetaem nao bambae mi save folem ol advaes ya?’
◼ Tekem ol sotfala not long ol stamba poen mo ol vas. Rod ya bambae i halpem yu blong putum tingting blong yu i stap long wanem we yumi stap harem mo i save givhan long yu blong rimemba sam long ol stamba poen ya blong yusum biaen.
3 Tijim Ol Pikinini Blong Yu Blong Lesin: Ol pikinini oli nidim tijing blong God. (Dut. 31:12) Long taem bifo, olgeta man blong God “we oli naf blong haremsave samting” oli mas lesingud long Loa we pris i ridimaot long olgeta. (Neh. 8:1-3) Sipos ol papa mama oli joen fulwan long ol miting mo oli lesingud, ol pikinini tu bambae oli mekem olsem. I no waes blong karem ol pleplei no buk blong kala blong kipim ol pikinini oli bisi long taem blong miting. Mo, oli no save lesingud tu, sipos oli stap go oltaem long toelet blong nating. Ol papa mama oli mas traehad blong meksua se ol pikinini blong olgeta oli sidaon kwaet mo lesingud long ol miting, from we “fasin blong pikinini, oltaem i save mekem ol krangke samting.”—Prov. 22:15.
4 Taem yumi lesingud, yumi pruvum se yumi rili waes mo se yumi wantem ‘ol tok we oli save tijim yumi.’—Prov. 1:5, NW.