Papa Mama—Mekem Pikinini Blong Yu i Lanem Ol Gudfala Fasin
1 Taem yumi bon, yumi no gat ol gudfala fasin wantaem, mo yumi no kasem olgeta olsem nomo. I tektaem blong mekem ol pikinini oli lanem ol gudfala fasin long laef. Hemia wan samting we yumi mas tijim long olgeta, sloslou. Ol papa mama oli nidim blong holem sem program oltaem, mo no jenjenisim tingting olbaot, sipos oli wantem “gohed blong stretem [ol pikinini blong olgeta], mo trenem tingting blong olgeta olsem we Jeova i wantem.”—Efes. 6:4, NW.
2 Stat Taem Oli Bebi Nomo: Taem pikinini i smol yet, hem i save lanem mo mekem ol niufala samting kwiktaem nomo. Plante taem ol bigman oli faenem i had blong lanem wan niufala lanwis, be ol pikinini we oli no skul yet, oli save lanem blong toktok tu no tri lanwis wantaem. Taswe, yumi neva mas tingting se ol pikinini blong yumi oli smol tumas blong lanem sam gudfala fasin long laef. Sipos papa mama i tijim ol trutok blong Baebol long pikinini we i smol yet, mo tufala i gohed olsem, taem pikinini ya i gruap, sloslou tingting blong hem i kam fulap wetem save ya we bambae i ‘mekem hem i waes, mo . . . blong God i save sevem hem.’—2 Tim. 3:15.
3 Mekem Pikinini i Lan Long Wok Blong Prij: Wan gudfala fasin we pikinini i save lan long hem taem hem i smol yet, hemia blong joen oltaem long wok blong talemaot gud nius blong Kingdom blong God. Plante papa mama oli stat blong mekem olsem taem oli tekem pikinini blong olgeta we i bebi yet, i go wetem olgeta long ol haos wanwan blong prij. Taem papa mama i joen oltaem long wok blong givim witnes, oli halpem ol pikinini blong olgeta blong laekem mo gat strong tingting long wok ya. Ol papa mama oli save soem long ol pikinini ol defren rod blong givim witnes long wok blong prij.
4 Wan narafala samting we i save halpem ol pikinini, hemia Tiokratik Skul. Skul ya i tijim olgeta blong oli tekem gudfala fasin ya blong stadi mo blong rid blong kasem save. Oli lanem blong storebaot Baebol, mekem ol visit bakegen, mo mekem ol Baebol stadi. Trening ya i save givim tingting long olgeta blong oli wantem paenia no traem kasem sam spesel wok blong givhan long kongregesen. Plante brata sista we oli wok long ol haos Betel mo olsem misinari, oli glad blong tingtingbak long taem we oli jes stat blong joen long skul ya mo oli talem se skul ya nao i bin givhan bigwan long olgeta blong folem ol gudfala fasin long laef.
5 Yumi evriwan i olsem graon long han blong Bigfala Man ya Blong Wokem Graonpot, hemia Jeova. (Aes. 64:8) Sipos redgraon i niuwan, bambae i isi moa blong wokem. Be sipos redgraon ya i stap drae longtaem, hem i save kam strong moa. Samting ya i sem mak long ol man. Taem oli yang yet, i isi moa blong tijim olgeta, taswe moa wan man i yang, moa hem i save lanem samting isi nomo. Ol faswan yia blong laef blong wan pikinini, hemia taem we i impoten tumas blong trenem hem. Long ol yia ya nao, wan pikinini bambae i stat wokem ol fasin blong hem we maet oli gud no maet oli nogud. Wan papa mama we i kea bambae i no wet longtaem blong mekem pikinini blong hem i lan long ol gudfala fasin long saed blong Kristin wok.