Ansa Long Wan Kwestin
◼ ?Wetaem i stret blong stanemap niufala grup blong Buk Stadi?
I stret blong stanemap niufala grup blong mekem se i gat samwe long 15 man nomo long ol wanwan grup blong Buk Stadi long ol defren ples, mo long Haos Kingdom tu. ?From wanem i gud blong mekem olsem?
Taem ol grup blong Buk Stadi oli smol, i moa isi long brata we i lidim stadi ya blong lukaotgud long ol wanwan memba blong grup ya. Mo tu, olgeta evriwan i gat plante janis blong givim ansa blong soemaot bilif blong olgeta. (Hib. 10:23; 13:15) Taem i gat ol smosmol grup long plante defren ples long teritori blong kongregesen, i isi moa long ol man blong kam long Buk Stadi mo long ol miting blong prij. Ol kongregesen we oli mekem Buk Stadi long plante defren ples oli luk se namba blong ol man we oli kam long Buk Stadi i kam antap.
Maet i gat sam spesel risen we i mekem se i stret blong stanemap wan niufala grup, nating se namba blong ol man long grup ya bambae i smol nomo. Samting ya i tru long ol eria we oli stap longwe tumas, no taem haos blong mekem miting ya i smol. Sipos i gat nid, i stret blong stanemap wan grup we oli mekem stadi long dei, blong givhan long ol olfala, olgeta we oli wok long naet, no ol sista we hasban blong olgeta oli no Witnes.
Ol wanwan Buk Stadi oli mas gat sam pablisa we oli strong long saed blong spirit mo oli wok strong long wok blong prij. Mo tu, ol grup oli mas gat wan we i naf blong lidim stadi, mo wan we i ridgud. Ol brata long kongregesen oli mas traehad blong kam inaf blong mekem ol wok olsem.
Ol elda oli save halpem kongregesen blong gohed gud sipos oli meksua se ol grup blong Buk Stadi oli no bigwan tumas mo oli kasem ol samting we oli nidim long saed blong spirit. Meksua se oli mekem miting long ol ples we i isi blong ol man oli kasem. Taem i nidim, i gud blong stanemap ol niufala grup blong givim janis long evriwan blong kasem fulwan ol blesing we oli kamaot long nambawan miting ya we God i givim. ?Yu save letem kongregesen i yusum haos blong yu blong mekem Buk Stadi? Plante we oli bin mekem olsem oli haremgud long ol blesing we oli kasem long saed blong spirit.