Kasem Hat Blong Studen
1 Bifo we Jisas i gobak long heven, hem i talem long ol disaepol blong hem se oli mas tijim ol narafala blong “folem” olgeta tok ya we hem i givim finis long olgeta. (Mat. 28:19, 20) Blong wan man i “folem” tok blong Kraes, tok ya i mas kasem hat blong hem fastaem. (Sam 119:112) ?Olsem wanem yu save kasem hat blong wan Baebol studen?
2 Askem Help Long Jeova Tru Long Prea: Wok blong pulum ol man blong kam disaepol, hem i wok blong God. Blong mekem gud wok ya, yumi nidim blesing blong God, mo yumi no mas dipen long paoa blong yumi. (Wok 16:14; 1 Kor. 3:7) Taswe, blong tijim trutok long narafala, yu mas prea long Jeova blong askem help blong hem.—Aes. 50:4.
3 Faenemaot Bilif Blong Studen: Sipos yu save bilif blong narafala, mo risen from wanem hem i bilif olsem, samting ya i save givhan long yumi blong talem stret tok we i kasem hat blong hem. ?From wanem studen i laekem tijing ya? ?Wanem nao i mekem se hem i bilif strong long tijing ya? Sipos yumi kasem save long ol samting ya, bambae yumi save tijim hem wetem fasin luksave.—Wok 17:22, 23.
4 Tokbaot Baebol Long Rod We i Gat Mining: Studen i mas kasem save mining blong trutok we yumi talemaot long hem. (Wok 17:24-31) Yumi mas givim ol gudfala risen blong hop blong yumi. (1 Pita 3:15) Be oltaem yumi mas toktok long kaen fasin, mo yumi mas soem longfala tingting.
5 Yusum Ol Pijatok: Ol pijatok oli mekem i isi moa blong studen i kasem save, mo tu oli save pulum filing blong hem. Ol pijatok oli gat paoa long tingting mo hat. Jisas i yusum ol pijatok plante taem. (Mak 4:33, 34) Sipos yu wantem kasem hat wetem ol pijatok, ol pijatok ya oli mas laenap wetem poen we yu stap tokbaot, mo studen ya i mas kasem save long hem.
6 Soem Ol Blesing We Oli Save Kamaot From Trutok: Ol man oli wantem save wanem gudfala frut we bambae oli kasem sipos oli folem wanem we oli lanem. Halpem studen blong yu blong luksave waes tok we Pol i talem long 2 Timoti 3:14-17.
7 Yu no mas harem nogud sipos samfala oli no folem ol samting we yu tijim. I no olgeta evriwan we bambae i akseptem trutok long hat blong olgeta. (Mat. 13:15) Be i gat samfala we bambae oli kam man blong bilif. (Wok 17:32-34) Maet traehad blong yu blong kasem hat blong man wetem gud nius bambae i givhan long plante moa man blong akseptem mo “folem” ol tok we Jisas i bin talem.