?Yu Yu Wantem Mekem Moa Wok?
1 Jisas i talem se Kingdom i olsem wan samting we i sas bitim mak. (Mat. 13:44-46) Wok blong talemaot Kingdom tu i wan sas samting. I stret we yumi putum minista wok long fasples long laef blong yumi, nating sipos yumi mas lego sam samting we yumi nomo i wantem mekem. (Mat. 6:19-21) ?Olsem wanem? ?Yu yu wantem mekem moa long wok blong Kingdom?
2 Tingbaot Ol Samting We Oli Impoten: Sipos yumi wantem mekem moa long minista wok blong yumi, i gat sam samting we yumi mas mekem: (1) holem strong tingting blong putum ol samting long saed blong Kingdom long fasples long laef. (Mat. 6:33) (2) soemaot bilif blong yumi mo dipen long Jeova. (2 Kor. 4:1, 7) (3) prea oltaem long God wetem fulhat blong yumi blong askem help blong hem. (Luk 11:8-10) (4) wok folem ol prea blong yumi.—Jem. 2:14, 17.
3 Ol Rod Blong Mekem Moa Long Minista Wok: Yumi evriwan i save putum mak blong spenem sam taem long minista wok evri manis. ?Be tu, yu bin tingbaot blong tekem evri janis blong prij, mo blong traem mekem ol fastok blong yu i kam moagud, mo blong mekem ol visit blong yu oli karem moa frut, mo blong traem mekem ol Baebol studen oli gohed gud? ?Maet bambae yu save mekem wok blong haftaem no fultaem paenia, no go long ples we i nidim moa man blong prij? Sipos yu yu wan brata we i baptaes finis, yu save traem kasem mak blong kam wan man blong givhan no wan elda (1 Tim. 3:1, 10) ?Blong mekem moa long minista wok, yu bin tingbaot blong askem blong wok long Betel, go long Ministeriol Trening Skul, no tren long Gilead Skul blong kam wan misinari?—Luk 10:2.
4 Wan brata we i wok fultaem mo i spenem plante aoa blong mekem spot, i kasem tok we i leftemap tingting blong hem blong kam wan fultaem paenia. Fastaem hem i mekem haftaem paenia, mo biaen, hem i jenisim sam samting long laef blong hem blong i save statem wok blong fultaem paenia. Biaen, hem i go long Ministeriol Trening Skul, mo samting ya i tijim hem blong mekem wok blong seket elda, wok ya we hem i stap mekem naoia. Hem i glad tumas we i bin folem advaes we hem i kasem, mo hem i sua se hem i harem gud moa long laef blong hem from we i tekem disisen blong mekem moa long wok blong Kingdom.
5 Jeova i givim blesing long olgeta we oli rere blong letem Hem i yusum olgeta blong mekem wok blong Hem. (Aes. 6:8) Yu no mas letem wan samting i stopem yu blong mekem moa long minista wok, mo blong kasem moa paoa mo glad we i kamaot from wok ya.