Kakae Gud Long Saed Blong Spirit
1 Samfala oli talem se ‘bodi blong yumi i stap soemaot sipos yumi kakae gud no nogat.’ I tru se kakae blong yumi, i save mekem se bodi blong yumi i strong mo i stap long gud helt, no nogat. Jisas i bin talem se: “Man i no save laef long kakae nomo. Evri tok we God i talem, hemia nao samting blong mekem man i laef.” (Mat. 4:4) Taswe, fasin blong yumi blong kakae long saed blong spirit tu, i save mekem i gud no i nogud long yumi. ?Yu yu stap kakae gud long saed blong spirit? ?Yu yu wantem kakae nomo ol kakae we yu laekem? ?Yu yu stap kakae hareap nomo we yu no spel nating? ?No oltaem yu glad blong tekem taem, blong yu haremgud long ol defdefren gudfala kakae long saed blong spirit?
2 Luklukgud Long Kakae Blong Yu: Jeova i yusum “slef we i stret mo waes” blong givim “kakae long stret taem blong hem” mo “ol kakae we i gat oel.” (Mat. 24:45, NW; Aes. 25:6, NW) Sipos yumi wantem haremgud long ol gudfala kakae ya we Jeova i stap givim wetem lav, yumi mas traehad blong kakae gud long saed blong spirit.
3 Maet yu save tingbaot se: ‘?Evri dei mi mi stap ridim vas blong dei mo ol toktok we i joen wetem? ?Evri dei mi mi stap ridim mo tingting dip long Baebol? ?Mi mi stadi fastaem long ol save we bambae yumi tokbaot long ol miting blong kongregesen? ?Mi mi ridim finis ol buk we oli jes kamaot, wetem tufala buk blong Isaiah’s Prophecy—Light for All Mankind?’
4 Jisas i promes se: “Olgeta we oli luksave se oli nidim ol samting long saed blong spirit, oli save glad . . . Olgeta we oli wantem stret fasin, olsem we man we i hanggri i wantem kakae, man we i tosta i wantem dring, oli save glad, from we bambae oli fulap gud long hem.” (Mat. 5:3, 6, NW) Taswe, blong kakae gud long saed blong spirit, yu mas fulumap tingting mo hat blong yu wetem save blong God.