Ol Man We Oli Glad Moa Bitim Ol Narafala Man
1 “!Ol man we Jeova i God blong olgeta, oli save haremgud!” (Sam 144:15, NW) Vas ya i tokbaot ol Witnes blong Jeova olsem ol man we oli glad moa bitim ol narafala man. I no gat wan glad we i bigwan moa i bitim hemia we yumi kasem taem yumi mekem wok blong Jeova, God ya nomo we i tru mo i laef. From we hem i “stap harem gud oltaem,” olgeta we oli wosip long hem oli soemaot semfala fasin ya, olgeta tu oli glad. (1 Tim. 1:11) ?Wanem sam haf blong wosip blong yumi we i save mekem yumi glad tumas?
2 Risen Blong Stap Glad: Jisas i talem long yumi se glad i kamaot taem yumi ‘luksave nid blong yumi long saed blong spirit.’ (Mat. 5:3, NW) Fasin blong stadi Baebol oltaem mo joen long olgeta Kristin miting, i givhan long yumi blong kasem samting ya we yumi nidim. Taem yumi lanem ol trutok we i stap long Tok blong God, yumi kam fri long ol giaman tijing blong skul. (Jon 8:32) Baebol i tijim yumi tu long ol nambawan fasin blong laef. (Aes. 48:17) From samting ya, yumi harem gud blong joen wetem ol gudfala fren blong yumi we oli stap long hapi grup blong ol Kristin brata blong yumi.—1 Tes. 2:19, 20; 1 Pita 2:17.
3 Yumi kasem bigfala glad taem yumi obei long ol hae rul blong God, from we yumi save se oli lukaot gud long yumi mo se yumi stap mekem Jeova i glad. (Prov. 27:11) Wan man blong raetem niuspepa i talem se: “Nating se ol Witnes blong Jeova oli stap folem ol strong rul, be yumi luk se oli glad nomo. Ol yangfala wetem ol olfala [we oli stap long medel blong olgeta], tugeta oli soemaot se oli rili hapi mo laef blong olgeta i stret.” ?Olsem wanem yumi save givhan long ol narafala blong oli folem fasin ya blong laef we i karem glad?
4 Givhan Long Ol Narafala Blong Faenem Glad: Wol i fulap long ol man we oli no glad, mo oli no gat wan gudfala tingting long saed blong fiuja. Be yumi, yumi gat wan gudfala tingting, yumi save se wan dei olgeta samting we oli stap mekem yumi harem nogud, bambae oli finis. (Rev. 21:3, 4) Taswe, wetem strong tingting, yumi joen long wok blong prij, yumi lukaotem olgeta we hat blong olgeta i stret, blong yumi serem gudfala promes blong fiuja mo bilif blong yumi long saed blong Jeova wetem olgeta.—Esik. 9:4.
5 Wan sista we i mekem wok blong paenia i talem se: “I no gat wan narafala samting we i karem glad i bitim we yumi givhan long ol man blong oli save Jeova mo trutok blong hem.” Yumi mas mekem evri samting we yumi naf blong mekem, blong leftemap tingting blong moa man blong oli wantem stadi Baebol. Taem yumi mekem wok blong Jeova mo yumi givim yumi wan blong halpem ol narafala blong olgeta tu oli mekem wok blong hem, yumi kasem glad we i bigwan olgeta.—Wok 20:35.