Gohed Blong Prij—?From Wanem?
1 Ating long ples blong yu wok blong talemaot Kingdom i bin gohed longtaem lelebet. (Mat. 24:14) Sipos i olsem, maet yu ting se yufala i prij inaf finis long teritori blong kongregesen blong yu. Naoia, taem yu prij, maet bighaf blong ol man oli no intres long mesej blong Kingdom. Nating sipos i olsem, makem wanem we buk ya Isaiah’s Prophecy II i talem long pej 141, long saed blong ol trufala disaepol blong Jisas: “Long sam ples, maet i luk olsem we frut blong wok blong olgeta i smol, taem yumi tingbaot bigfala wok mo traehad we oli bin mekem. Be, oli gohed nomo.” ?Ale, from wanem yumi gohed blong prij?
2 Tingbaot Jeremaea: Yumi no gohed blong prij nomo taem ol man oli lesin. Jeremaea i bin prij blong 40 yia long sem teritori, nating se i gat smol man nomo we oli lesin, mo plante man oli agensem mesej we hem i karem. ?From wanem Jeremaea i bin gohed? From we hem i mekem wan wok we God i talem long hem blong mekem, mo save we hem i gat long saed blong fiuja i pusum hem blong gohed blong talemaot mesej ya.—Jer. 1:17; 20:9.
3 Sem mak long yumi tede. Jisas i ‘talem long yumi, se yumi mas talemaot gud nius blong hem long ol man. Mo yumi mas talemaot we God i putumap hem finis blong hem bambae i jajem olgeta man, olgeta we oli stap laef wetem olgeta we oli ded finis.’ (Wok 10:42) Laef blong ol man i dipen long mesej we yumi karem. Bambae oli kasem jajmen from samting we oli mekem afta we oli harem gud nius. From samting ya, wok blong yumi i blong mekem i stret olsem yumi kasem oda blong mekem. Nating se sam man oli no wantem lesin, be yumi gohed nomo blong mekem wok we yumi mas mekem, from we hemia wan janis blong soemaot se yumi laekem tumas ol man mo se yumi stap fasgud long Jeova. Be i no hemia nomo.
4 Yumi Haremgud: Nomata sipos ol man long teritori oli lesin no oli no lesin, be taem yumi mekem wil blong God, yumi harem gud mo yumi kasem pis mo glad long tingting blong yumi we yumi no save faenem long eni narafala rod. (Sam 40:8) Laef blong yumi i gat mining, i no blong nating nomo. Sipos yumi joen moa long wok blong prij, tingting mo hat blong yumi i fulap moa long promes blong laef long niufala wol mo glad we promes ya i givim. Taem yumi tingbaot ol promes ya blong Baebol oltaem, samting ya i save mekem yumi gru long saed blong spirit, mo i mekem se yumi fren moa wetem Jeova.
5 Nating se yumi no kasem frut kwiktaem long wok blong prij, maet yumi planem sid blong trutok long hat blong wan man, we bambae i gru long stret taem blong Jeova. (Jon 6:44; 1 Kor. 3:6) Yumi no save hamas man yet long ples blong yumi no long ful wol we bambae oli kasem save long Kingdom from ol traehad blong ol man blong Jeova.
6 Naoia, i bitim ol narafala taem bifo, yumi mas lesin long tok blong Jisas, we i talem se: “Yufala i mas lukaot gud, mo oltaem yufala i mas rere, from we yufala i no save taem ya we bambae olgeta samting ya oli kamtru. Be tok ya we mi talem long yufala, mi stap talem long olgeta man se, ‘Oltaem, yufala i mas lukaot gud.’ ” (Mak 13:33, 37) Bambae yumi evriwan i gohed blong talemaot gud nius blong Kingdom, mo mekem hat blong Jeova i glad. Long rod ya, yumi joen blong leftemap nambawan nem blong hem we i tabu.