?From Wanem Yumi Mas Gobak Bakegen Mo Bakegen?

1. ?Wanem kwestin we yumi save askem long saed blong wok blong prij?

¹ Long plante ples, yumi wokem semfala teritori plante taem. Yumi gobak long ol semfala haos bakegen mo bakegen nating se maet man blong haos i talem long yumi se hem i no intres. ?From wanem yumi gohed nomo blong go toktok long olgeta we oli soem finis se oli no intres?

2. ?Wanem faswan risen we i mekem se yumi gohed long wok blong prij?

² Lav We Yumi Gat Long Jeova Mo Ol Man: Faswan risen we i pusum yumi blong gohed long wok blong prij, hemia lav we yumi gat long Jeova. Hat blong yumi i pusum yumi blong gohed blong tokbaot nambawan God blong yumi, Jeova. (Luk 6:45) Lav we yumi gat long Jeova i pulum yumi blong obei long ol loa blong hem, mo blong givhan long ol narafala blong mekem i sem mak. (Prov. 27:11; 1 Jon 5:3) Wok we yumi mekem wetem strong tingting i no dipen long ol man we oli wantem lesin no nogat. Nating se ol man oli agensem ol Kristin long faswan handred yia, olgeta ya oli gohed blong prij we ‘oli no kam slak.’ (Wok 5:42, NW) Taem ol man oli no wantem lesin long yumi, yumi no mas letem samting ya i mekem yumi harem nogud, yumi mas stanap strong, yumi mas soemaot bigfala lav mo fasin fasgud we yumi gat long Jeova.

3. ?Olsem wanem lav we yumi gat long ol man bambae i givhan long yumi blong gohed long wok blong prij?

³ Mo tu, yumi gohed nomo blong prij from we yumi lavem ol man raonabaot long yumi. (Luk 10:27) Jeova i no wantem se wan man i ded. (2 Pita 3:9) Nating se yumi go prij long semfala teritori bakegen mo bakegen, yumi save faenem sam man yet we oli wantem wosipim Jeova. Eksampol, long aelan blong Guadeloupe i gat 1 long evri 56 man we i wan Witnes blong Jeova, mo 214 oli baptaes las yia. Samwe long 20,000 man oli bin kam long Memoriol, hemia 1 long evri 22 man long aelan ya.

4. ?Olsem wanem ol teritori oli save jenis?

⁴ Ol Jenis Long Teritori: Ples we yumi stap prij long hem i stap jenis oltaem. Maet nekis taem we yumi gobak long haos blong man we i no intres, yumi faenem wan narafala memba blong famle we i glad blong lesin. No maet yumi faenemaot se i gat ol narafala man i kam stap long haos ya, mo olgeta ya oli intres. Ol pikinini we maet fastaem papa mama blong olgeta i ronem yumi, be taem oli kam bigman, oli aot long haos, nao maet oli glad blong harem mesej blong Kingdom.

5. ?Wanem samting i save mekem se ol man oli lesin long gud nius?

⁵ Ol man oli save jenis. Bifo, aposol Pol hem i wan man we i stap ‘tok agens long ol man blong Kraes, mo i stap mekem i nogud long olgeta, mo i stap tok nogud long olgeta blong spolem olgeta.’ (1 Tim. 1:13) Sem mak tede, plante man we oli wosipim Jeova, maet oli wan long olgeta we fastaem oli no intres long trutok. Maet sam long olgeta oli agensem gud nius. From we wol ya i stap jenis, olgeta ya we fastaem oli no intres, no we oli bin agensem trutok, maet oli lesin long gud nius. Sam narafala we oli harem nogud afta we oli lusum wan famle blong olgeta long ded, oli lusum wok, oli gat problem long saed blong mane, no oli sik, maet oli glad moa blong lesin.

6. ?From wanem yumi mas gohed blong prij wetem strong tingting?

⁶ Nating se rabis wol ya i stap go blong lus, be wok blong yumi blong prij mo tijim ol man i stap gru kwiktaem. (Aes. 60:22) From samting ya, yumi mas gohed blong prij wetem strong tingting mo yumi traehad blong gat stret tingting oltaem. Ale, nekis man we maet yumi storian wetem hem, i save lesin. !Yumi mas gohed blong prij! ‘Sipos yumi mekem olsem bambae yumi save sevem yumi wan, wetem ol man we oli stap lesin long yumi.’—1 Tim. 4:16.