Tok Blong God Hem i Trutok
1. ?Wanem impoten save i stap long Baebol?
1 Man blong raetem Sam, i talem se: “Stamba blong ol tok blong yu, hem i trutok.” (Sam 119:160) Long Tok blong God, Baebol, we i kamaot long tabu spirit, Jeova i givim ol ansa we oli stret long plante impoten kwestin long saed blong laef. Hem i givim ol tok blong leftemap tingting mo blong givim hop long ol man we oli trabol. Mo hem i soem long yumi olsem wanem yumi save kam klosap long hem. Wan woman we i tangkiu bigwan long Tok blong God i talem se: “Taem mi lanem trutok blong Baebol i olsem we mi aot long wan ples we i tudak mo i no gat glad long hem, nao mi go long wan rum we i gat laet mo i mekem mi mi harem se mi sef mo mi hapi.” ?Yu yu traehad blong serem trutok blong Baebol wetem narafala man long evri janis we yu yu gat?
2. ?Olsem wanem Baebol i save mekem laef blong ol man i kamgud moa?
2 Baebol i Jenisim Laef Mo i Pulum Intres Blong Ol Man Long Fulwol: Trutok blong Baebol i gat paoa blong kasem hat blong man mo jenisim laef blong hem. (Hib. 4:12) Wan yangfala woman we nem blong hem Rosa, fastaem hem i wan woman blong rod, hem i stap drong mo i stap tekem drag. Hem i se: “Wan dei, taem mi stap long trabol we i mekem mi mi harem nogud tumas, wan Witnes wetem waef blong hem tufala i toktok long mi, nao tufala i eksplenem olsem wanem Baebol i save halpem man blong winim ol problem. Mi mi stat stadi long Tok blong God, mo mi intres bigwan long hem. Afta long wan manis nomo mi stat mekem laef blong mi i klin mo i stret. Naoia mi faenem mining long laef blong mi, mi no moa nidim strong dring mo drag blong halpem mi. Mo from we mi wantem tumas blong stap olsem fren blong Jeova, mi traehad blong laef folem ol rul blong hem. Sipos mi no bin kasem waes we i kamaot long Tok blong God, i sua se tede ya mi mi ded finis.”—Sam 119:92.
3. ?From wanem yumi no mas holembak trutok blong Baebol long ol man?
3 Baebol i defren long plante buk tede, from we hem i stretgud long olgeta man, nomata wanem ‘kala blong olgeta, kantri, laen, mo lanwis blong olgeta.’ (Rev. 7:9) God i wantem “sevem olgeta man, mo i wantem we olgeta man bambae oli save trutok blong hem.” (1 Tim. 2:4) Taswe, i nogud blong ting se maet wan man bambae i no lesin long gud nius from we hem i gruap long fasin olsem no i kamaot long kantri olsem. Nogat. I moagud blong serem tok blong Kingdom long ol kaen man, mo soem tok ya stret long Baebol taem yumi gat janis blong mekem olsem.
4. ?Olsem wanem yu yu save yusum Baebol taem yu prij?
4 Yusum Baebol: I gat plante janis blong yusum Baebol long wok blong prij. Taem yumi seremaot ol magasin, i gud blong traem yusum ol vas we oli putum i stap long ol fastok long Kingdom Wok. Taem yumi seremaot buk blong manis, samfala oli faenem se i gud blong ridim wan vas we oli rerem gud fastaem, long fastok blong olgeta. Taem yumi mekem ol visit bakegen, i gud blong serem wan no tu vas blong Baebol evri taem blong halpem man blong haos blong hem i gohed blong kasem moa stret save. Taem yumi mekem Baebol stadi, i gud blong mekem storian blong yumi i stanap long sam stamba vas. Mo tu, i gud blong karem Baebol oltaem wetem yu, nating se yu no stap prij long ol haos wanwan, olsem nao, bambae yu rere blong yusum Baebol taem janis i kam blong yu prij long man.—2 Tim. 2:15.
5. ?From wanem i gud blong traem yusum Baebol taem yumi prij long man?
5 I gud yumi yusum Baebol long evri janis we yumi kasem blong prij long man. Long rod ya, bambae yumi halpem olgeta blong oli kasem blesing we i kamaot from paoa blong Tok blong God we hem i trutok.—1 Tes. 2:13.