“Gohed Blong Wokbaot Long Trutok”

1. Taem yumi tokbaot olsem wanem yumi kam long “trutok,” ?olsem wanem hemia i givhan long yumi?

“?OLSEM wanem yu kam long trutok?” Blong talem stret, maet yu ansarem kwestin ya plante taem finis. Ating hemia faswan kwestin we yumi askem long wan brata o sista taem yumi wantem save gud hem. Yumi laekem blong harem olsem wanem ol brata mo sista blong yumi oli stat blong save Jehova mo lavem hem, mo yumi tu yumi laekem blong tokbaot long olgeta from wanem yumi glad blong stap olsem ol Witnes blong Jehova. (Rom 1:11) Ol storian olsem oli rimaenem yumi se trutok i rili sas. Mo hemia i halpem yumi tu blong yumi gat strong tingting blong “gohed blong wokbaot long trutok,” we hemia i min se yumi mas gohed blong laef long wan fasin we i mekem Jehova i glad, nao hem i save blesem yumi.—3 Jon 4.

2. ?Bambae yumi tokbaot wanem long stadi ya?

² Long stadi ya, bambae yumi luk sam risen from wanem yumi laekem trutok. Biaen bambae yumi tokbaot olsem wanem yumi save gohed blong soemaot se yumi laekem naesfala presen ya. Stadi ya bambae i halpem yumi blong tinghae moa long ol samting we Jehova i mekem blong pulum yumi i kam long trutok. (Jon 6:44) Mo tu, bambae i mekem yumi gat strong tingting blong wantem serem trutok ya long ol narafala.

?FROM WANEM YUMI LAEKEM “TRUTOK”?

3. ?Wanem impoten risen we i mekem se yumi laekem trutok?

³ Yumi laekem trutok from plante risen. Be wan risen we i moa impoten, hemia se yumi lavem Jehova God we hem i Stamba blong trutok. Tru long Tok blong hem Baebol, yumi save hem olsem Man ya we i gat olgeta paoa we i mekem heven mo wol, be tu yumi save hem olsem Papa blong yumi long heven we i lavem yumi mo i kea long yumi. (1 Pita 5:7) Yumi save se God blong yumi i “gat sore mo i kaen, i no save kros kwik, mo fasin blong hem blong lavem man oltaem i bigwan tumas, mo hem i tok tru.” (Eks. 34:6) Jehova i laekem jastis. (Aes. 61:8) Hem i harem nogud taem hem i luk we yumi safa, hem i rere mo i wantem tumas blong finisim olgeta fasin safa long stret taem blong hem. (Jer. 29:11) !Hemia i gud tumas! !Hemia nao from wanem yumi lavem Jehova tumas!

4-5. ?From wanem aposol Pol i talem se hop blong yumi i olsem wan angka?

⁴ ?Wanem wan narafala risen we i mekem yumi laekem trutok? Trutok i mekem i gud long yumi long plante defren rod. Eksampol, ol trutok long Baebol oli tokbaot hop blong fiuja. Aposol Pol i yusum wan pijatok blong tokbaot hop se i impoten tumas, hem i talem se: “Hop ya we yumi gat, hem i olsem wan angka blong holem sol blong yumi, hem i fas strong mo yumi save trastem.” (Hib. 6:19) Olsem wan angka we i holemtaet wan bot blong i no muv, hop blong yumi we i stanap long Baebol, i save halpem yumi blong stanap strong taem yumi fesem ol trabol long laef.

⁵ Long vas ya, Pol i stap tokbaot hop we ol tabu Kristin bambae oli kasem long heven. Be ol tok ya oli stret tu long ol Kristin we oli luk fowod blong laef long paradaes long wol. (Jon 3:16) Yes, taem yumi lanem se yumi gat hop blong laef olwe, hemia i mekem se laef blong yumi i gat mining.

6-7. ?Olsem wanem trutok long saed blong fiuja i givhan long Yvonne?

⁶ Traem tingbaot ekspiriens blong wan sista we nem blong hem Yvonne. Hem i no gruap long trutok, mo taem hem i pikinini, hem i fraet blong ded. Hem i tingbaot wan tok we hem i bin ridim long wan buk we i talem se: “Wan dei bambae i no moa gat tumoro.” Hem i talem se: “Tok ya i mekem se mi no save slip long naet, mo mi stap tingbaot fiuja. !Mi mi no wantem ded! Taswe mi stap tingting se: ‘Laef i no hemia nomo, i mas gat sam moa samting. ?From wanem mi laef?’”

⁷ Biaen taem Yvonne i kam yangfala, hem i mitim ol Witnes blong Jehova. Hem i talem se: “Mi stat blong bilif se mi save gat wan nambawan hop, hemia blong laef olwe long Paradaes long wol.” ?Olsem wanem trutok i bin givhan long sista blong yumi? Hem i gohed se: “Mi no moa wekap long naet mo wari long fiuja mo long ded.” Yes, olsem we yumi luk, trutok i rili sas long Yvonne, mo hem i glad tumas blong serem hop we hem i gat long fiuja, long ol narafala.—1 Tim. 4:16.

8-9. (1) Long parabol blong Jisas, ?man ya i soemaot olsem wanem se hem i tinghae long bokis mane we hem i faenem? (2) ?Yu yu tinghae olsem wanem long trutok?

⁸ Trutok blong Baebol i inkludum tu gud nius long saed blong Kingdom blong God. Jisas i talem se Kingdom i olsem wan bigfala bokis mane we man i bin haedem. Long Matiu 13:44, Jisas i talem se: “Kingdom blong heven i olsem wan bigfala bokis mane we wan man i bin haedem long wan pis graon, nao wan narafala man i faenem mo i berem bakegen. Man ya i harem gud tumas, nao hem i go salemaot olgeta samting blong hem mo i kam pemaot pis graon ya.” Makem se man ya i no stap lukaotem bigfala bokis mane ya. Be taem hem i faenem, hem i lego plante samting blong i save kasem bokis mane ya. Yes, hem i salem evri samting we hem i gat. ?From wanem? Hem i save se bokis mane ya i rili sas, mo se i gud moa i bitim eni narafala samting we hem i mas lego.

⁹ ?Hemia sem tingting we yu gat long trutok? !I sua se yes! Yumi save se i no gat wan samting long wol blong Setan we i gud moa i bitim glad we yumi gat from we yumi wosipim Jehova naoia, mo hop blong laef olwe long fiuja aninit long Kingdom. Privilej ya we yumi gat blong fren gud wetem Jehova, hem i gud moa i bitim eni samting we yumi lego. Yumi kasem bigfala glad taem yumi “mekem hem i glad.”—Kol. 1:10.

10-11. ?Wanem i pulum Michael blong i jenisim laef blong hem?

¹⁰ Plante long yumi oli traehad blong lego plante samting blong oli save mekem Jehova i glad. Samfala oli lego gudfala wok blong olgeta. Sam narafala oli no moa traem blong kam rij. Mo sam narafala oli jenisim laef blong olgeta fulwan taem oli save Jehova. Hemia nao samting we Michael i mekem. Hem i no gruap long trutok, so taem hem i yangfala, hem i tren from karate. Hem i talem se: “Long mi, i impoten tumas blong mekem bodi blong mi i stap fit oltaem. Samtaem mi harem se i no gat man i save winim mi.” Be taem hem i stat blong stadi Baebol, hem i lanem se Jehova i no laekem nating fasin blong faet. (Sam 11:5) Michael i tokbaot Witnes kapol ya we i stadi wetem hem se: “Tufala i neva talem long mi se mi mas stop blong karate, be tufala i gohed nomo blong tijim mi long ol trutok blong Baebol.”

¹¹ Taem Michael i lanem moa long saed blong Jehova, hem i lavem Hem moa. Samting we i rili tajem hat blong hem, hemia fasin blong Jehova blong soem sore long ol man we oli wosipim Hem. Samtaem biaen, Michael i luksave se hem i mas mekem desisen blong jenisim laef blong hem. Hem i talem se: “Mi save se i had tumas blong mi lego karate, be mi save tu se sipos mi mekem olsem, Jehova bambae i glad long mi. Mo mi sua fulwan se i no gat wan narafala samting we i gud moa i bitim we mi mekem wok blong hem.” Michael i tinghae long trutok we hem i faenem, mo hemia i pulum hem blong i mekem sam bigfala jenis long laef blong hem.—Jem. 1:25.

12-13. ?Olsem wanem ol trutok blong Baebol oli halpem Mayli?

¹² Blong soemaot olsem wanem trutok i impoten, Baebol i talem se trutok i olsem wan laet we i stap saen long tudak. (Sam 119:105; Efes. 5:8) Mayli, we i blong Asebaejan, i rili tinghae long help we hem i kasem long Tok blong God. Hem i grup long wan famle we papa blong hem i wan Muslim, mo mama blong hem i wan Jiu. Hem i talem se: “Nating we mi save se i gat wan God, be yet mi gat plante kwestin. Mi stap tingbaot se, ‘?From wanem God i wokem ol man, mo from wanem man i mas safa long ful laef blong hem, mo biaen i go bon olwe long hel?’ From we plante man oli talem se evri samting we i hapen i wil blong God, mi stap tingting se, ‘?I tru se God i stap kontrolem ol man mo biaen i glad blong luk we oli safa?’”

¹³ Mayli i gohed blong lukaot ansa blong ol kwestin blong hem. Samtaem biaen, hem i agri blong stadi Baebol, mo hem i kam long trutok. Hem i talem se: “Ol samting we Baebol i talem oli klia gud, mo hemia i mekem mi kam wan hapi man. Mo ol klia save we mi faenem long Tok blong God, oli mekem se mi gat pis long tingting.” Olsem Mayli, yumi evriwan i mas presem Jehova we hem nao “i singaot [yumi] i aot long tudak, [yumi] kam long nambawan laet blong hem.”—1 Pita 2:9.

14. ?Yumi save mekem wanem blong laekem trutok moa? (Yu luk bokis ya tu “Sam Narafala Samting.”)

¹⁴ Hemia sam nomo long ol eksampol we oli soemaot olsem wanem trutok i sas. I sua se yu save tingbaot plante narafala eksampol. I gud sipos long prapa stadi blong yu, yu mekem wan projek blong traem faenemaot sam narafala risen from wanem yumi mas laekem trutok. Sipos yumi rili laekem trutok, bambae yumi traehad moa blong soemaot samting ya.

?OLSEM WANEM BLONG SOEMAOT SE YUMI LAEKEM TRUTOK?

15. ?Wanem wan rod blong soemaot se yumi laekem trutok?

¹⁵ Yumi save soemaot se yumi laekem trutok taem yumi stadi oltaem long Baebol mo ol buk we oli stanap long Baebol. Nomata hamas yia yumi stap long trutok, be i gat plante moa samting yet blong yumi lanem. Faswan Wajtaoa we oli printim i talem se: “Trutok i olsem wan flaoa we ol rabis gras oli kavremap. Blong faenem flaoa ya, man i mas lukaotem. Mo taem hem i faenem, hem i no stop, be hem i mas gohed nomo gogo i faenem plante moa flaoa. Long sem fasin, yumi no mas stop taem yumi faenem wan trutok long Baebol. Be yumi mas gohed nomo blong traem faenem plante moa trutok.” Stadi i wan hadwok, be i gat gudfala frut i save kamaot from.

16. ?Wanem rod blong stadi we yu yu luk se i wok gud? (Ol Proveb 2:4-6)

¹⁶ I no yumi evriwan we i laekem blong rid mo stadi. Be Jehova nao i askem blong yumi “gohed blong lukaotem” mo “gohed blong” traem kasemsave moa long trutok. (Ridim Ol Proveb 2:4-6.) Taem yumi traehad blong mekem olsem, oltaem i gat gudfala frut i kamaot from. Corey i talem se taem hem i stap mekem Baebol riding blong hem, hem i traem blong fokas long wanwan vas. Hem i eksplenem se: “Mi ridim evri futnot, mi lukluk ol kros refrens, mo mi mekem sam moa risej. . . . !Taem mi mekem olsem, mi lanem plante samting!” Nating se yumi yusum rod ya o narafala rod, be yumi soemaot se yumi tinghae long trutok taem yumi makemaot taem mo traehad blong stadi long hem.—Sam 1:1-3.

17. ?I minim wanem blong laef folem trutok? (Jemes 1:25)

¹⁷ I tru, yumi save se i no naf nomo blong stadi long ol trutok ya. Blong trutok ya i givhan long yumi, yumi mas laef folem trutok, we hemia i min se yumi mas folem ol trutok ya long laef blong yumi. Sipos yumi mekem olsem, bambae yumi kasem trufala glad. (Ridim Jemes 1:25.) ?Olsem wanem blong meksua se yumi stap laef folem trutok? Wan brata i talem se, i gud yumi jekem yumi wan blong luk sipos yumi stap folem samting we yumi lanem, mo wanem we yumi nid blong kam gud moa long hem. Aposol Pol i talem se: “Yumi stap traehad finis blong wokbaot long sem rod ya, be . . . i gud yumi gohed yet blong wokbaot olsem we yumi stap mekem finis.”—Fil. 3:16.

18. ?From wanem yumi mekem bes blong yumi blong “gohed blong wokbaot long trutok”?

¹⁸ Traem tingbaot ol gudfala samting we i save kamaot sipos yumi mekem bes blong yumi blong “gohed blong wokbaot long trutok.” Yes, laef blong yumi bambae i kam gud moa, mo tu yumi mekem Jehova mo ol narafala Kristin oli glad. (Prov. 27:11; 3 Jon 4) !Blong talem stret, i no gat wan narafala samting we i gud moa i bitim we yumi laekem trutok, mo yumi laef folem trutok!