Putum Tingting Daon Olsem Prapa Klos Blong Yu

¹ Yangfala Deved we i man blong lukaot long ol sipsip, i trastem Jeova mo i winim wan strong man blong faet. (1 Saml. 17:​45-47) Rijman ya Job i stanap strong nating se hem i fesem ol strong traem. (Job 1:​20-22; 2:​9,10) Pikinini blong God i talem se olgeta toktok ya we hem i tijim ol man long hem, oli kamaot long Papa blong hem. (Jon 7:​15-18; 8:28) Stori blong trifala man ya i soemaot se oli gat wan impoten fasin, hemia tingting daon. Tede tu, yumi nidim tingting daon blong stanap strong long ol traem long laef.​—Kol. 3:12.

² Taem Yumi Prij: Yumi ol Kristin minista, yumi mas gat tingting daon taem yumi serem gud nius wetem olkaen man, blong yumi no jajem olgeta from kala, kastom, no aelan blong olgeta. (1 Kor. 9:​22, 23) Sipos sam man oli tok nogud no oli flas mo oli sakemaot gud nius blong Kingdom, yumi no mekem sem mak bakegen long olgeta, be yumi soem longfala tingting mo yumi gohed blong lukaot ol man we oli stret blong harem gud nius. (Mat. 10:​11, 14) Yumi no traem mekem man i sapraes long save no edukesen blong yumi. Yumi pulum tingting blong man i go long Tok blong God, from we yumi luksave se hem i gat paoa long man i bitim eni samting we yumi save talem. (1 Kor. 2:​1-5; Hib. 4:12) Yumi folem fasin blong Jisas we i givim ona i go long Jeova nomo.​—Mak 10:​17, 18.

³ Long Kongregesen: Ol Kristin oli mas ‘mekem tingting blong olgeta i stap daon’ taem oli stap wetem ol brata sista blong olgeta tu. (1 Pita 5:5) Sipos yumi tingbaot ol narafala olsem se oli gud moa long yumi, bambae yumi lukaot rod blong givhan long ol brata sista blong yumi i bitim we yumi wet se olgeta nao oli givhan long yumi. (Jon 13:​12-17; Fil. 2:​3, 4) Bambae yumi no gat tingting ya se yumi antap moa long ol narafala taswe yumi no nid blong mekem ol wok olsem klinim Haos Kingdom.

⁴ Tingting daon i halpem yumi blong ‘yumi lavlavem yumi mo yumi no raorao long yumi,’ ale long fasin ya yumi leftemap pis mo fasin joengud insaed long kongregesen. (Efes. 4:​1-3) Fasin ya i halpem yumi blong obei long olgeta we God i jusum blong lidim yumi. (Hib. 13:17) Fasin ya i pusum yumi blong akseptem olgeta advaes no fasin stretem we yumi kasem. (Sam 141:5) Mo tingting daon i pulum yumi blong askem help blong Jeova taem yumi kasem sam spesel wok long kongregesen. (1 Pita 4:11) Yumi mas olsem Deved we i luksave se gudfala frut i no kamaot from we hem i gat gudhan long wok blong hem, be i kamaot from we Jeova i stap blesem hem.​—1 Saml. 17:37.

⁵ Long Fes Blong God: Antap olgeta, yumi mas ‘putum yumi i stap daon, aninit long han blong God we i gat paoa.’ (1 Pita 5:6) Sipos yumi stap faet strong oltaem agensem wan traem, maet yumi wantem tumas we Kingdom i kam hareap blong karemaot trabol ya. Be from we yumi mekem tingting blong yumi i stap daon mo i longfala, yumi wet long Jeova blong mekem ol promes blong hem oli kamtru stret long taem we hem i jusum. (Jem. 5:​7-11) Yumi mas olsem Job bifo, we i man blong holem bilif. Yes, samting we i moa impoten long tingting blong hem, hemia se ol man oli mas gohed blong ‘presem nem blong Jeova.’​—Job 1:21.

⁶ Profet Daniel i ‘mekem tingting blong hem i stap daon’ long fes blong God, ale, Jeova i glad long hem mo i givim plante nambawan blesing long hem. (Dan. 10:​11, 12) Long sem fasin, i gud yumi putum tingting daon olsem klos blong yumi, from we yumi save se ‘man we i mekem tingting blong hem i stap daon, hem bambae i kam rijman, bambae hem i gat longfala laef, mo ol man bambae oli ona long hem.’​—Prov. 22:4.