Yumi Stadi Long Buk Ya Wosipim God

Buk ya Wosipim Trufala God, bambae yumi yusum blong mekem stadi wetem ol niuwan afta we oli finisim Save buk. Bambae yumi stadi long buk ya long ol Buk Stadi blong yumi. Samting ya i save givhan long yumi blong yusumgud tul ya long wok blong tijim man. Mo tu, samting ya i mas mekem lav blong yumi long Jeova mo ogenaesesen blong hem i kam bigwan moa. ?Yumi save mekem wanem sipos yumi wantem se buk ya Wosipim God i givhan gud long yumi?

Buk Stadi: Brata we i lukaot long Buk Stadi i mas luksave gud ol haf we i moa impoten blong tokbaot blong bambae hem i no go bitim taem. I gud blong no spenem tumas taem long fashaf blong ol japta, olsem nao bambae i gat moa taem blong tokbaot lashaf blong ol japta, we plante taem oli dip moa. Sipos yumi tekem smoltaem blong tokbaot bokis long en blong japta, hemia i save givhan long yumi blong rimemba ol stamba poen.

Klosap stret haf blong olgeta japta long buk ya Wosipim God oli gat sam kwestin we i blong pulum yumi blong tingting dip. Yumi save luk sam long ol kwestin ya long pej 48-49 long buk ya. Brata we i rid long Buk Stadi i no nid blong ridim ol kwestin ya. Sipos i gat taem, brata we i lidim Buk Stadi bambae i askem samfala blong ridim sam vas we oli stap, mo bambae oli tokbaot olgeta.

Reregud Fastaem: Taem yumi rerem stadi ya, i no naf blong putum mak aninit long ol ansa. Sipos yumi prea fastaem, mo yumi tingting dip long ol vas we oli stap, bambae yumi rere blong givim ansa, mo tu, bambae yumi rerem hat blong yumi. (Esra 7⁠:10) Yumi evriwan i save leftemap tingting blong narafala sipos yumi givim ansa we i no longfala tumas.​—⁠Rom 1⁠:​11, 12.

Stadi we yumi mekem long buk ya Wosipim God bambae i halpem yumi blong kam klosap long Jeova mo bambae i mekem yumi naf gud blong halpem ol man we hat blong olgeta i stret, blong oli joen wetem yumi blong wosipim Jeova. (Sam 95⁠:6; Jem. 4⁠:⁠8) I gud yumi evriwan i kasem blesing from nambawan presen ya long saed blong spirit.