?Yu Yu Save Mekem Moa Long Wok Blong God?
1. ?Wanem i mekem se wok blong prij i impoten naoia, mo from wanem?
1 Taem Jisas i luk we fulap man oli wantem harem gud nius blong Kingdom, hem i talem long ol disaepol blong hem blong oli “askem strong long masta blong garen ya, blong hem i save sanem sam moa man oli kam blong karem ol kakae ya i go long haos blong hem.” (Mat. 9:37, 38) Naoia, yumi stap long ol laswan aoa blong taem ya blong tekem kakae long garen. From samting ya, i impoten moa blong wok strong naoia i bitim bifo. Yumi mas askem long Jehova long prea, blong traem faenem rod blong mekem moa long wok blong prij.—Jon 14:13, 14.
2. ?Samfala oli mekem wanem blong ansa long tok blong Jisas blong singaot moa man oli go tekem kakae long garen?
2 Mekem Moa Wok: Plante brata mo sista oli save mekem wok blong paenia, from we Jehova i lidim olgeta mo i givhan long olgeta. (Sam 26:2, 3; Fil. 4:6) Samfala oli traehad blong joen long wok blong haftaem paenia, long wan manis no long plante manis long yia. Oli luk se hemia wan gudfala rod blong mekem moa long wok blong prij. Glad we oli kasem long wok blong haftaem paenia i pulum olgeta blong oli wantem kam fultaem paenia.—Wok 20:35.
3. ?Sipos yu paenia bifo, maet naoia yu save mekem wanem?
3 ?Yu Yu Save Joen Bakegen Long Wok Blong Paenia?: Sipos yu mekem wok blong paenia bifo, ating yu harem gud yet blong tingbaot ol blesing we yu kasem long taem ya. ?Yu yu prea long Jehova, blong i givhan long yu blong joen long wok blong paenia bakegen? Maet ol samting ya we oli blokem yu blong yu no moa paenia oli finis. Maet naoia yu yu save joen long wok blong paenia bakegen.—1 Jon 5:14, 15.
4. ?Wanem spesel janis we yumi evriwan i gat?
4 Wok blong go tekem kakae long garen i stap gohed gud, mo i no longtaem bambae i finis. (Jon 4:35, 36) I gud we yumi evriwan i tingting gud long laef blong yumi, blong luksave sipos yumi naf blong jenisim sam samting, blong yumi mekem moa long wok blong prij. Sipos yumi luk se yumi no naf blong mekem moa long wok ya, maet yumi save lukaot sam rod blong karem moa frut long wok we yumi stap mekem. (Mak 12:41-44) !Olgeta we laef blong olgeta i stret blong Jehova i yusum olgeta long spesel wok ya, bambae oli kasem bigfala blesing!—Sam 110:3.