‘Traem Openem Hat Blong Yu Moa’
1. ?Wanem wok we yumi evriwan i gat?
1 Long kongregesen blong ol Kristin, wok ya blong mekem lav i kam antap moa, hem i wan wok blong yumi evriwan. (1 Pita 1:22; 2:17) Yumi mekem wok ya taem yumi ‘traem openem hat blong yumi moa’ long ol brata mo sista. (2 Kor. 6:12, 13, NW ) ?From wanem i impoten blong traem savegud ol brata sista blong yumi?
2. ?From wanem i impoten blong fren moa wetem ol Kristin brata sista?
2 Fren Moa Wetem Olgeta: Taem yumi savegud ol Kristin brata sista, yumi tinghae long olgeta from bilif blong olgeta, from we oli stanap strong longtaem, mo from plante narafala gudfala fasin we yumi luksave long olgeta. Ol slak fasin blong olgeta oli kam smol, nao yumi fren moa wetem olgeta. Taem yumi savegud olgeta, yumi naf blong leftemap tingting blong olgeta, mo mekem olgeta oli haremgud taem oli kasem trabol. (1 Tes. 5:11) Yumi save ‘mekem olgeta oli kam strong moa’ blong oli faet agensem ol rabis fasin blong wol blong Setan. (Kol. 4:11, NW ) !Taem yumi stap gotru long ol las dei ya we oli fulap long trabol, yumi glad tumas blong gat ol gudfala fren insaed long kongregesen blong ol man blong Jeova!—Prov. 18:24.
3. ?Olsem wanem yumi save mekem narafala i strong?
3 Taem yumi kasem ol strong traem, ol gudfala fren oli spesel long yumi, from we oli givim paoa long yumi mo oli mekem yumi haremgud bakegen. (Prov. 17:17) Wan Kristin we hem i traehad blong winim filing ya se hem i no naf blong mekem wan gudfala samting, hem i se: “Sam fren blong mi oli talem ol gudfala tok blong leftemap tingting blong mi. Samting ya i givhan long mi blong winim ol nogud tingting we mi gat long saed blong mi wan.” Ol fren olsem oli rili wan blesing we Jeova i givim.—Prov. 27:9, futnot.
4. ?Yumi save mekem wanem blong savegud ol brata sista long kongregesen?
4 Soem Moa Intres Long Ol Narafala: ?Olsem wanem yumi save openem hat blong yumi moa long ol Kristin brata sista blong yumi? Long ol Kristin miting, maet yumi traehad blong storian wetem olgeta, i bitim we yumi jes talem halo mo sekhan long olgeta. Yumi no pusum nus blong yumi long bisnes blong olgeta, be yumi traem blong soem se yumi intres long laef blong olgeta wanwan. (Fil. 2:4; 1 Pita 4:15) Wan narafala rod blong soem moa intres long olgeta, hemia blong singaot olgeta oli kam kakae long haos blong yumi. (Luk 14:12-14) Mo tu, yumi save mekem wan plan blong prij wetem olgeta. (Luk 10:1) Taem yumi mekem ol samting ya blong traem savegud ol brata sista blong yumi, yumi stap givhan blong mekem kongregesen i joengud.—Kol. 3:14.
5. ?Yumi save mekem wanem blong fren wetem plante brata sista?
5 ?Yu yu stap fren wetem olgeta nomo we oli gat sem yia olsem yu, mo olgeta we oli intres long ol semfala samting olsem yu? Sipos i olsem, ating yu fren wetem samfala nomo long kongregesen. I nogud yumi letem samting ya i hapen. Deved i yangfala mo Jonatan i olfala, mo tufala i kamaot long tu defren kaen laef. Be tufala i besfren. Sem mak long Rut mo Nomi. (Rut 4:15; 1 Sam. 18:1) ?Olsem wanem? ?Yu yu save traehad blong fren wetem sam narafala brata sista tu? Sipos yu mekem olsem, bambae yu kasem plante blesing we yu neva bin tingbaot.
6. ?Wanem sam blesing we oli kamaot taem yumi openem hat blong yumi long ol brata sista?
6 Taem yumi openem hat blong yumi long ol narafala, yumi mekem olgeta oli strong mo yumi givhan blong putum pis long kongregesen. Mo tu, Jeova bambae i blesem yumi from lav we yumi soem long ol brata sista blong yumi. (Sam 41:1, 2; Hib. 6:10) I gud yu traehad blong savegud plante moa man long kongregesen.