Yu Save Gat Fasin Fren We i Stap Longtaem
I GAT sam samting we oli save blokem wan man blong frengud wetem narafala. Yes, Baebol i talemaot finis se long ol “las dei” ya, bambae ol man oli no gat lav, oli no gat filing mo oli no save stap tru long ol narafala man. (2 Timote 3:1-5; Matyu 24:12) Ol fasin ya oli mekem se naoia, man i harem moa se hem i no gat fren i bitim bifo. Wan woman i talem se: “Long ples we mi stap long hem, i olsem bigfala sip blong Noa. Sipos yu no mared, yu no save joen wetem ol man.” Yumi no save talem se hemia i fol blong ol wanwan man we oli harem se oli no gat fren. Long samfala ples long wol, ol man oli no save faenem ol fren we i stap longtaem. Hemia from we oltaem ol man blong ol ples ya oli muf i go long ol defren ples, ol famle oli seraot, ol taon oli fulap long denja mo ol man blong hem oli no kea, mo man i no moa gat fri taem blong spel.
!Tede, maet wan man we i laef long taon, i save fren wetem moa man long wan wik i bitim namba blong ol man we wan man long velej long ol yia 19 handred, i save luk long wan yia no long ful laef blong hem! Be nating se i olsem, fasin fren blong ol man tede i blong smoltaem nomo. Plante man oli joen oltaem wetem ol narafala man blong haremgud mo blong traem gat gudtaem. Be, yumi mas luksave se fasin joen blong haremgud wetem ol fren we oli no stret, i olsem we yumi yusum grasnil blong mekem faea. Eklesiastis 7:5, 6 i talem se: “I moagud blong harem tok blong wan waes man we i stretem yu i bitim we yu harem singsing blong wan krangke man. Laf blong wan krangke man i olsem grasnil aninit long sospen, hemia tu i blong nating nomo.” Taem yu bonem grasnil long faea, kwiktaem nomo hem i laet bigwan mo i mekem noes. Be, faea ya i no naf blong mekem yu yu hot. Long sem fasin, ol fren we oli stap laf mo mekem plante noes, oli save mekem yumi haremgud blong smoltaem. Be oli no save karemaot filing ya se yumi no gat fren, mo mekem yumi haremgud long ol tru fren.
Fasin blong stap yu wan long wan ples i defren long filing ya se yu no gat fren. Yumi evriwan i nidim blong stap yumi wan long wan ples blong spel, nao yumi save givhan moa long ol fren blong yumi. Plante man, we oli harem se oli no gat fren, oli kwik blong mekem samkaen pleplei we oli wok wetem lektrik. Wan stadi i soem se wan long ol faswan samting we ol man oli mekem taem oli harem se oli no gat fren, hemia blong lukluk televisin. Be, ol man we oli mekem stadi ya oli talem se fasin blong lukluk tumas televisin i wan samting we i nogud moa long yumi blong mekem taem yumi harem se yumi no gat fren. Televisin i mekem yumi slak we yumi no tinghevi long wan samting, yumi les, mo yumi drim long samting we i no tru. Hem i kam wan nogud samting we i tekem ples blong fasin fren we yumi save gat wetem ol narafala man.
Be, fasin blong stap yumi wan nomo long wan ples i save givhan bigwan long yumi sipos yumi yusumgud taem ya. Maet yumi save rid, raetem leta, wokem sam samting, mo spel. Fasin blong yusumgud taem we yumi stap yumi wan nomo long wanples, i joen tu long fasin blong prea long God, stadi Baebol, mo tingting dip long hem. (Ol Sam 63:6) Hemia ol rod blong pulum yumi kam kolosap moa long Jeova God, we i save kam wan nambawan Fren blong yumi.
Sam Eksampel Long Baebol Long Saed Blong Fasin Fren
Yes i gud blong frengud wetem olgeta man. Be, Baebol i mekem yumi tingbaot se “i gat sam man we oli fasgud long ol fren blong olgeta moa, i bitim wan stret brata.” (Proveb 18:24) Yumi evriwan i nidim sam gudfala fren we oli rili kea long yumi, we fasin fren blong olgeta i mekem yumi glad, i givim paoa mo pis long yumi. Tede i no isi blong faenem ol trufala fren olsem. Be yumi save makem sam eksampel blong bifo long Baebol. Wan eksampel hemia Deved mo Jonatan we tufala i gat wan nambawan fasin fren. ?Yumi save lanem wanem from eksampel ya? ?From wanem fasin fren blong tufala i stap longtaem?
Wan risen se, Deved mo Jonatan tufala i gat sem kaen intres long ol impoten samting. Samting we i moa impoten se, tufala tugeta i gat wan strong filing blong fasgud long Jeova God. Taem Jonatan i luk bilif we Deved i gat long God mo fasin we hem i mekem blong protektem ol man blong Jeova, “laef blong Jonatan i joen wetem laef blong Deved, mo Jonatan i stat blong laekem Deved olsem we hem i laekem hem wan.” (1 Samuel 18:1) Yes, taem tu fren oli gat sem kaen lav long God, samting ya i save mekem se tufala i fasgud tugeta.
Jonatan mo Deved, tufala i strong blong mekem ol rul blong God oli wok long laef blong tufala. From samting ya, tufala i save gat respek long tufala. (1 Samuel 19:1-7; 20:9-14; 24:6) Bambae yumi kasem blesing sipos yumi gat sam fren we oli wosip long God mo we oli letem ol rul blong Baebol i lidim olgeta.
I gat sam narafala samting bakegen we oli givhan long fasin fren blong Deved mo Jonatan. Fasin fren blong tufala i tru mo tufala i soemaot klia, mo tufala i trastem tufala. Jonatan i tingbaot ol intres blong Deved bitim ol prapa intres blong hem. Jonatan i no jelas from promes ya se bambae Deved i kam king. Be hem i sapotem Deved long saed blong filing mo long saed blong speret. Mo Deved i agri long help blong Jonatan. (1 Samuel 23:16-18) Long fasin we Baebol i agri long hem, Deved mo Jonatan oli soemaot filing we tufala i gat long tufala. Fasin fren blong tufala i stanap long trufala fasin blong tinghae long narawan mo lav. (1 Samuel 20:41; 2 Samuel 1:26) Fasin fren blong tufala i no save brok from we tufala tugeta i stap tru long God. Taem yumi mekem ol rul blong God oli wok, samting ya i save halpem yumi blong wokem mo holemtaet wan trufala fasin fren.
Olsem Wanem Blong Fren Wetem Narafala
?Yu yu stap lukaot sam trufala fren? Ating yu no nid blong go longwe blong faenem olgeta. Sam long ol man we plante taem yu joen wetem olgeta, oli save kam fren blong yu, mo maet olgeta tu oli nidim yu olsem wan fren blong olgeta. Long saed blong ol Kristin brata sista blong yumi, i waes blong folem advaes blong aposol Pol we i talem se yumi mas “mekem moa fren.” (2 Korin 6:11-13, NW) Be, yu no mas harem nogud sipos yu faenem sam fren, mo yu luk se fasin fren ya i no strong. I tekem taem blong wokem wan fasin fren, mo i no evri fasin fren we bambae oli strong long sem fasin. (Eklesiastis 11:1, 2, 6) Tru tumas, sipos yumi wantem wan trufala fasin fren, yumi no mas tingbaot yumi wan nomo, mo yumi mas folem advaes ya blong Jisas se: “Yufala i mas mekem long ol narafala man, olsem we yufala i wantem blong ol narafala man oli mekem long yufala.”—Matyu 7:12.
?Hu i nidim yu olsem fren? Wetem olgeta we oli gat sem yia olsem yu, ?olsem wanem long olgeta we oli yangfala no oli olfala moa long yu? Fasin fren blong Deved mo Jonatan, Rut mo Naomi, mo Pol mo Timote, i strong nating se oli gat ol defren yia. (Rut 1:16, 17; 1 Korin 4:17) ?Yu save mekem fasin fren blong yu i go long ol wido mo ol narafala we oli no mared? Tingbaot ol man we oli jes kam long eria blong yu. Maet oli lego plante no evri fren blong olgeta taem oli muvaot long ples blong olgeta, no taem oli jenisim fasin blong laef blong olgeta. Yu no wet long ol narafala blong oli kam frengud wetem yu. Sipos yu yu wan Kristin, yu save wokem wan fasin fren we i strong taem yu folem advaes blong Pol se: “Long saed blong lav long ol brata, yufala i mas laeklaekem yufala tumas. Long saed blong fasin blong ona long narafala, yufala fastaem i mas soemaot rod.”—Rom 12:10, NW.
Yumi save tingbaot fasin fren olsem wan rod blong givim presen long narafala. Jisas i talem se sipos yumi givim presen i go long narafala, bambae ol man oli givim presen long yumi tu. Hem i talem tu se man we i stap givim presen, hem i glad moa i winim man we i stap kasem presen blong hem. (Luk 6:38; Ol Wok 20:35) ?Yu yu mitim finis sam man we laef blong olgeta i defren long laef blong yu? Ol intenasnal asembli blong ol Wetnes blong Jeova oli pruvum se ol man we oli kamaot long ol defren fasin blong laef oli save gat wan trufala fasin fren we i stap longtaem. Hemia i from we olgeta evriwan oli stap wosip long sem God.
Holem Fasin Fren i Stapgud
Sore tumas, samtaem olgeta we oli soem se oli gudfala fren, oli mekem narafala i harem nogud. Fasin blong talem ol gyaman tok we i stikim man, fasin blong no trastem narafala, fasin blong no gat tangkyu long narafala. Hemia sam long ol fasin we oli save mekem yu yu harem nogud taem oli kamaot long man we yu ting se hem i wan trufala fren. ?Yumi save mekem wanem long ol taem olsem?
Soemaot wan gudfala eksampel. Traehad blong blokem ol fasin we oli save mekem narafala i harem nogud blong nating nomo. Long sam ples, plante man oli laf long ol fren blong olgeta taem oli mekem mastik. Be fasin blong trikim mo mekem i strong long narafala, i no save mekem ol fren oli joengud, nating sipos yumi stap “haremgud from tok plei” blong yumi.—Proveb 26:18, 19.
Wok had blong holemtaet fasin fren wetem narafala. Man we i askem tumas samting long ol fren blong hem, i save mekem ol fren blong hem oli gat rong tingting long saed blong hem. Wan fren we i sik no i wari from wan bigfala problem, maet bambae hem i no save soemaot kaen fasin olsem fastaem. Be, long ol taem olsem, traem blong kasem save mo givhan long hem.
Stretem ol problem kwiktaem mo wetem kaen fasin. Traem mekem olsem wetem kwaet fasin. (Matyu 5:23, 24; 18:15) Traem blong mekem fren blong yu i kasem save se yu wantem holemtaet gudfala fasin fren blong yutufala. Ol trufala fren oli fofogivim olgeta. (Kolosi 3:13) ?Yu yu wan fren olsem? ?Yu yu wan fren we i fasgud moa long narafala i bitim wan stret brata?
Blong ridim mo tingbaot fasin fren, i jes wan stat nomo. Sipos yumi harem se yumi no gat wan fren, i gud yumi lukaot sam fren. Ale, i no longtaem bambae yumi save gat sam fren. Sipos yumi traehad, bambae yumi faenem ol trufala fren. Bambae yumi save wokem wan spesel fasin fren wetem sam long olgeta. Be i no gat wan man we i save tekem ples blong God, nambawan Fren blong yumi. Jeova nomo i save kasem save, mo givhan long yumi fulwan. (Ol Sam 139:1-4, 23, 24) Mo tu, Tok blong hem i givim wan nambawan hop long fyuja—wan nyufala wol we bambae yumi gat ol trufala fren blong olwe.—2 Pita 3:13.
[Tok Blong Pija Long Pej 5]
Deved mo Jonatan tufala i gat wan trufala fasin fren, mo yumi tu i save gat trufala fren