?Yu Yu Save Givhan Moa Long Ol Narafala?
1 Oltaem Jeova i lukaotem rod blong givhan long olgeta we oli stap tru long hem. (2 Kron. 16:9; Aes. 41:10, 13) Aesea i talem se Jeova i olsem wan man we i keagud long ol sipsip blong hem. Hem i raetem se: “Man olsem i stap holem ol pikinini blong sipsip, i stap karem olgeta i kam wanples, mo i stap wokbaot sloslo blong lidim ol mama blong olgeta oli biaen long hem.” (Aes. 40:11) Yumi lukluk sam rod we i save halpem yumi blong tingbaot narafala olsem Jeova i mekem.
2 Givhan Long Ol Niuwan: Yumi save givhan long ol niuwan taem yumi askem olgeta blong oli kam joen long kampani blong yumi blong oli save kam strong. (Prov. 13:20) Wan brata i tingting bak long taem we hem i stat blong joen long kongregesen mo olsem wanem ol narafala brata oli givhan long hem long taem ya. Hem i talem se: “Plante taem, wan famle i tekem mi blong mi joen long famle stadi blong olgeta. Sloslo taem mi stap gohed gud, wan yangfala brata wetem woman blong hem, we tufala i paenia, tufala i singaotem mi blong mi prij sam ful dei wetem tufala. Mifala i tokbaot oltaem ol gudfala samting long saed blong spirit.” Hem i talem bakegen se: “Taem mi no kam wan Kristin yet, mi stap goaot oltaem long Fraede mo Sarede naet. Be naoia, taem mi wantem joen wetem ol narafala, mi go spenem taem wetem ol brata sista.” Kaen fasin blong kongregesen blong tingbaot brata ya, i givhan bigwan long hem blong i kam strong moa long saed blong spirit mo bilif, mo naoia hem i wok olsem wan memba blong famle blong Betel.—Kol. 2:6, 7.
3 Yumi Givhan Long Yumi Blong Leftemap Yumi: Taem ol brata blong yumi oli fesem hadtaem, yumi luksave se hemia wan janis blong yumi givhan long olgeta. Olsem nao, yu save mekem plan wetem wan pablisa we i handikap, blong yutufala i yusum telefon blong prij. No yu save askem hem blong i joen wetem yu long wan Baebol stadi, we maet yu talem long studen blong i kam long haos blong pablisa ya. Maet wan papa mo mama we tufala i gat ol smosmol pikinini oli glad sipos yu givhan long olgeta long wok blong prij. Ating sam pablisa we oli gat fasin sem, bambae oli haremgud sipos yu givhan long olgeta blong mekem sam visit, no yu givhan long olgeta long wok blong prij. Sipos yumi tingbaot mo lavem ol brata blong yumi, samting ya bambae i pusum yumi blong lukaotem rod blong givhan long olgeta blong leftemap olgeta.—Rom 14:19.
4 Taem yumi folem fasin blong Jeova we i kaen gud mo i tingbaot ol man we oli mekem wok blong hem, yumi stap givgivhan long yumi blong yumi kam strong, yumi mekem kongregesen i joen tugeta long lav, mo yumi givim glori i go long Papa blong yumi long heven.—Efes. 4:16.