Ansa Long Wan Kwestin
◼ ?Wanem beswan rod blong folem sipos yumi wantem givim presen mane long ol brata blong ol narafala kantri we oli gat nid?
Samtaem, yumi harem se ol brata blong yumi long narafala kantri oli gat nid long saed blong bodi from trabol we ol narafala oli mekem long olgeta, no from wan disasta, no from sam narafala hadtaem bakegen. Samting ya i pusum sam brata blong oli sanem mane i go stret long branj ofis blong kantri we ol brata ya oli stap long hem. Maet oli talem nem blong wan brata we mane ya i blong givhan long hem, no nem blong wan kongregesen, no wan spesel projek blong bildim haos Kingdom.—2 Kor. 8:1-4.
I gud tumas we ol brata ya oli tingbaot ol narafala Kristin mo oli soemaot lav olsem. Be plante taem i gat samfala we oli rili nidim help kwiktaem moa. Samtaem, hemia we ol brata oli sanem mane i go long hem, hem i kasem help finis. Nating se i olsem, yumi save trastem se taem ol brata oli sanem presen mane i go long branj ofis, blong sapotem wok blong talemaot gud nius long fulwol, no blong givhan blong bildim ol Haos Kingdom, no blong halpem olgeta we disasta i kasem olgeta, branj ofis bambae i yusum mane ya folem tingting blong brata we i givim presen ya.
Ol brata we oli wok long ol branj ofis, oli kasem trening blong givim help kwiktaem long ol brata we bigfala trabol i kasem olgeta wantaem nomo. Evri taem, ol branj ofis oli talemaot samting we i hapen long Hed Kampani. Sipos i nidim moa help, Hed Kampani i save askem long ol branj ofis we oli stap raonabaot long kantri we i kasem trabol blong oli givhan, no Hed Kampani hem wan i save sanem mane i go stret.—2 Kor. 8:14, 15.
Taswe, evri presen mane we yumi wantem sanem blong givhan long wok blong Kingdom long fulwol, wok blong bildim ol haos Kingdom long ol narafala kantri, no taem wan disasta i kamaot, yumi mas sanem i go long branj ofis blong kantri blong yumi. Maet yumi sanem i go stret long ofis ya no yumi save sanem tru long kongregesen. Olsemia, tru long plan we Hed Kampani i putumap finis, ‘slef we i stret mo waes’ i save lukaot gud long nid blong olgeta brata raon long wol, long fasin we i gat oda.—Mat. 24:45-47, NW; 1 Kor. 14:33, 40.