Wokem Rod Magasin Blong Mekem Intres Blong Man i Gru
1. ?Olsem wanem yumi save yusum rod magasin blong mekem intres blong man i gru?
1 Plante man we yumi faenem olgeta long wok blong prij oli glad taem yumi go luk olgeta, mo oli tekem ol buk mo magasin blong yumi. Be oli fraet blong stadi Baebol evri wik. Wan rod blong mekem intres blong olgeta i gru, hemia tru long rod magasin. Taem yu givimaot ol magasin long wan man, raetemdaon nem mo adres blong hem, dei we yu luk hem, wanem magasin we hem i karem, mo ol vas we yu tokbaot, wetem eni samting we yu bin luk we i save givhan long yu blong save samting we man ya i intres long hem. Taem ol niufala magasin oli kamaot, lukaotem ol poen we oli stret long intres blong man ya, mo tokbaot sam long ol poen ya taem yu go luk hem. (1 Kor. 9:19-23) Sloslo, maet samting we hem i ridim long ol magasin blong yumi i save wekemap intres blong hem mo pusum hem blong i wantem save moa.
2. ?From wanem i impoten tumas we ol man oli lukaot Jeova naoia, mo yumi save mekem wanem blong givhan moa long olgeta?
2 Be yumi luksave se bighaf blong ol man oli no save kam man blong Jeova sipos oli jes ridim ol magasin blong yumi nomo. I impoten tumas we oli mas lukaot Jeova naoia. ?Taswe, yumi save mekem wanem moa blong givhan long olgeta? (Sef. 2:2, 3, NW; Rev. 14:6, 7) Blong mekem intres blong olgeta i gru, evritaem we yumi givimaot magasin, i gud yumi ridim wan vas blong Baebol we yumi jusumgud finis.
3. (a) ?Olsem wanem yumi save rerem sam storian we yumi save yusum wan vas blong Baebol long olgeta? (b) ?Wanem ol poen we ol man long eria blong yufala oli intres tumas long olgeta?
3 Storian We Yu Ridim Wan Vas Blong Baebol: Tingbaot olgeta we oltaem yu stap karem ol niufala magasin i go long olgeta. Nao mekem rere sam storian we oli stret long nid blong ol man ya wanwan, mo yusum wan vas insaed long storian blong yu. (Fil. 2:4) Olsem nao, sipos wan long olgeta i jes bin lusum wan fren no famle blong hem long ded, maet long plante visit we yu mekem long hem, yu save tokbaot ol samting we Baebol i talem long saed blong ded mo hop blong laef bakegen. Yu save yusum Save buk, long Japta 9 we nem blong hem, “?Olsem Wanem Long Olgeta We Yumi Laekem Tumas We Oli Ded?” blong rerem ol storian ya wetem wan vas blong Baebol insaed long olgeta. Maet biaen, yu save tokbaot sam narafala poen we oli laenap wetem kwestin ya, olsem hemia: olsem wanem ol sik, fasin blong kam olfala, mo ded bambae oli lus blong olwe. Mak blong yumi i blong faenem wan poen we man i intres long hem, mo sloslo, soemaot long hem wanem samting Baebol i talem long saed ya.
4. ?From wanem i impoten we yumi givhan long ol narafala blong oli kasem save long mining blong ol vas, mo olsem wanem yumi save mekem olsem?
4 Givhan Long Ol Narafala Blong Oli Kasem Save: I gud blong mekem ol storian oli sot mo isi nomo, be yumi mas mekem moa i bitim we yumi jes jusum wan vas mo ridim. Setan i satem tingting blong ol man finis long saed blong gud nius. (2 Kor. 4:3, 4) Olgeta we oli stap ridim Baebol, olgeta tu oli nidim we narafala i givhan long olgeta blong oli kasem save long hem. (Wok 8:30, 31) Taswe, yu mas tekem taem blong eksplenem vas ya mo yusum wan pijatok, olsem we yu mekem taem yu gat wan tok long Tiokratik Skul. (Wok 17:3, NW ) Meksua se man ya i kasem save olsem wanem Tok blong God i save givhan long laef blong hem.
5. ?Olsem wanem wan rod magasin i save kam wan Baebol stadi?
5 Sipos man ya i glad long samting we hem i stap lanem, yu save mekem storian i kam longfala moa. Blong mekem olsem, yu save yusum tu no tri vas blong Baebol evri taem we yu go luk hem. Lukaotem janis blong go insaed long buklet ya Wanem, no Save buk. Olsemia, maet wan rod magasin i save kam wan Baebol stadi.