“Planem Sid Blong Kingdom” Long Ol Rod Magasin

¹ Nem blong singsing 133 long buk ya Mekem Singsing long Jeova, hem i “Yumi Planem Sid Blong Kingdom.” Singsing ya i tokbaot parabol blong Jisas long saed blong wok blong sakem sid. Hem i bin talem parabol ya blong eksplenem wok blong mekem disaepol. (Mat. 13:​4-8, 19-​23) Wan haf blong singsing ya i talem se: “Yumi mas wok strong sipos yumi wantem we sid i karem plante frut.” ?Olsem wanem yumi save mekem se wok blong prij blong yumi i karem moa frut? Yumi save mekem samting ya sipos yumi statem mo gohed blong mekem wan ‘rod magasin’ (wan lis blong man we yumi stap karem ol niufala magasin i go long olgeta).

² Hemia samfala mak we yu save kasem taem yu mekem wan rod magasin: (1) Fasin blong mekem visit bakegen evri tu wik i save givhan long yu blong wokem wan gudfala fasin fren wetem hemia we i soem intres. (2) Toktok we i stap long ol Wajtaoa mo Wekap! we yu stap karem i go oltaem long man ya, oli save sevem laef blong hem. (3) Taem yu toktok wetem man ya, yu save pulum hem blong wantem save moa long saed blong trutok blong Baebol, mo yu gat jans blong statem wan Baebol stadi.​—1 Pita 2:2.

³ Olsem Wanem Blong Statem Wan Rod Magasin: Evritaem we wan man i soem intres long ol magasin, yu mas talem se sam nambawan haf oli kamaot long evri magasin ya mo se bambae yu glad blong karem ol niuwan i kam long hem evri tu wik. Afta we yu lego man ya, raetemdaon nem blong hem, ples we hem i stap long hem, wanem dei yu kam luk hem, weswan magasin yu givim long hem, ol atikol we yu bin soem mo ol haf we oli bin pulum tingting blong man ya.

⁴ I no nid blong gat plante visit blong statem wan rod magasin. Yu save stat wetem sam man fastaem. Ale biaen, taem yu givim sam magasin long sam narafala man, yu save ademap nem blong olgeta long lis blong yu. Taem yu gat plante man blong visitim, yu save mekem wan program blong mekem olgeta visit we oli stap long semfala eria fastaem nao yu save go mekem ol narawan we oli stap long narafala eria. Long rod ya bambae i moa isi blong visitim evriwan. Meksua se yu raetemdaon wanem magasin yu givimaot long olgeta wanwan. Makem tu ol samting we yu bin tokbaot, mo olsem wanem yu save pulum olgeta blong intres moa long trutok long nekis visit blong yu.

⁵ Tingbaot Ol Man Blong Stoa Mo Ofis: Plante stori oli soem se ol man blong stoa mo sam narafala man blong wok oli glad blong kasem ol magasin blong yumi evri tu wik. Wan elda i putum mea blong taon blong hem tu long lis blong rod magasin blong hem. Wan pablisa i statem wan stadi wetem wan olfala man blong 80 yia, we i bos long wan kampani blong salem ol tul blong bildim haos. !Hemia afta we pablisa ya i karem ol magasin i go long man ya blong ten yia finis!

⁶ Wan paenia sista i kam long wan stoa mo i mitim wan man mo waef blong hem we tufala i no glad tumas blong luk hem. Be tufala i akseptem ol magasin mo sista ya i putum nem blong tufala long lis blong rod magasin blong hem. Samtaem biaen, sista ya i no moa wantem kam luk tufala ya from we tufala i no kaen nating, mo tufala i neva talem plante samting, nating se hem i askem sam kwestin blong save tingting blong tufala. Be sista ya i prea long saed ya, nao hem i givim buk ya Laef Foreva long tufala. Afta we woman i ridim buk ya, hem i talem se: “!Hemia nao, mi faenem trutok!” Man ya wetem woman blong hem, tufala i stat stadi long Baebol, mo biaen tufala i tekem baptaes. Strong tingting blong paenia ya i karem sam gudfala frut.

⁷ Gobak Blong Visitim Ol Man: Taem yu kasem wan niufala magasin, yu mas ridim olgeta haf blong hem. Tingbaot ol poen we yu save yusum wetem wanwan man long rod magasin blong yu. Ale, taem yu gobak, yu save talem se: “Taem mi ridim haf ya, mi tingbaot yu, mo mi ting se bambae yu yu intres long hem.” Evri pablisa, nating se oli yangfala no olfala, oli save mekem wan rod magasin. Wan pikinini tu i naf blong talem se: “Mi mi glad blong luk yu bakegen. Ol laswan Wajtaoa mo Wekap! blong yu oli kam finis. Mi ting se bambae yu laekem haf ya, we nem blong hem se . . . ”

⁸ Yusum bokis ya: “Long Nekis Wajtaoa,” blong pulum intres blong man i go long ol magasin we bambae oli kamaot biaen. Taem yu luk se i gat wan haf long wan magasin we bambae i gohed long sam narafala haf long ol nekis magasin, soemaot samting ya, mo pulum tingting blong man blong no mestem wan long ol haf ya. Yu no mas fogetem se evri taem we yu karem ol magasin i go long wan man long rod magasin blong yu, yu mas kaontem wan visit long ripot blong yu. Mo antap long hemia, rimemba se mak blong yumi i blong pulum ol man ya blong akseptem wan Baebol stadi.

⁹ Visitim Oltaem Ol Man Long Rod Magasin Blong Yu: Yu save mekem rod magasin blong yu long eni taem we i stret long yu. Ating long wan moning long wik, no long let aftenun, long sapa, no long wiken afta long wok blong prij long ol haos wanwan. Sipos yu no save mekem ol rod magasin blong yu from we yu sik no yu go holide samples, askem long wan narafala pablisa long famle blong yu no long kongregesen, blong mekem ol visit ya. Nao, olgeta we oli stap long rod magasin blong yu bambae oli gohed blong kasem ol magasin stret long taem we oli kamaot.

¹⁰ Wan rod blong sakem ol sid blong Kingdom, hemia taem yu karem Wajtaoa mo Wekap! i go oltaem long olgeta we oli stap long lis blong rod magasin blong yu. Sipos yu gohed blong tijim trutok blong Baebol long olgeta, bambae oli save mesej blong Kingdom, mo ating bambae oli joen wetem yu long wok blong karem ol frut blong Kingdom.​—Mat. 13:​8, 23.