Gohed Blong Talemaot Tok Blong God We Yumi No Fraet Nating
1 Yumi ol Kristin, yumi save se i no evri man we bambae oli lesin long yumi taem yumi prij. (Mat. 10:14) Be yumi no mas letem samting ya i blokem yumi blong talemaot gud nius. (Prov. 29:25) ?Wanem samting i save givhan long yumi blong yumi no fraet blong talemaot tok blong God?
2 Aposol Pol i luksave se taem hem i save Jisas Kraes, hem i “kasem samting we i moa gud olgeta.” Samting ya i pusum hem blong toktok wetem ‘strong bilif.’ (Fil. 3:8; 1 Tes. 1:5) Nating se samfala oli luk se tok we Pol i stap talemaot i no gat paoa mo i krangke, be Pol i save se tok ya “i paoa blong God blong sevem olgeta man we oli bilif long hem.” (Rom 1:16) Taswe, nating se plante man oli agensem hem, hem i gohed nomo ‘blong talemaot gud nius long paoa blong God, we hem i no fraet nating.’—Wok 14:1-7; 20:18-21, 24.
3 ?Yumi Kasem Paoa Wea?: I no prapa paoa blong Pol we i mekem se hem i no fraet blong prij. Hem i tokbaot hem mo Saelas, i se: “Yufala i save we taem mifala i stap yet long Filipae, ol man oli mekem i nogud long mifala, mo oli tok nogud tumas long mifala tu. Be God blong yumi i mekem tingting blong mifala i strong blong kam talemaot gud nius blong hem long yufala, long fes blong plante man we oli agens long tok ya.” (1 Tes. 2:2; Wok 16:12, 37) Mo tu, taem Pol i stap kalabus long Rom, hem i askem se ol narafala oli prea from hem, blong ‘tingting blong hem i strong’ nao hem i save gohed blong talemaot gud nius ‘long fasin we i stret blong mekem.’ (Efes. 6:18-20) Taem Pol i dipen long Jeova, be i no long hem wan, hem i naf blong talemaot tok blong God we i no fraet nating.—2 Kor. 4:7; Fil. 4:13.
4 Samting ya i tru long taem blong yumi tu. Wan brata i bin faenem i had blong talemaot long ol fren blong hem long wok se hem i wan Witnes blong Jeova, mo blong tekem janis blong prij. Hem i prea long God from samting ya, mo hem i stat blong prij long ol fren blong hem. Long stat, wan man we i wok wetem hem i no wantem lesin, be taem hem i harem brata ya i tokbaot hop blong ol dedman blong laef bakegen, hem i stat blong stadi Baebol. Stat long taem ya, brata ya i tekem evri janis blong prij. Biaen, hem i go wok long wan defren ples, mo long 14 yia, hem i givhan long 34 man we oli wok wetem hem, blong oli go kasem mak we oli baptaes. Yumi save sua se Jeova bambae i givim paoa long yumi tu blong yumi ‘talemaot ol tok blong hem, we tingting blong yumi i strong.’—Wok 4:29.