Yumi No Fraet Blong Talemaot Gud Nyus
1 Long ol yia we oli pas finis, ol trufala Kristin oli no fraet blong talemaot gud nyus. Aposol Pita mo aposol Jon, tufala i givim nambawan eksampel long samting ya. Nating we oli sakem tufala long kalabus mo oli tok nogud long tufala, be tufala aposol ya oli no fraet nating blong gohed blong talemaot trutok. (Wok 4:18-20, 23, 31b) Aposol Pol tu, hem i no fraet blong gohed long minista wok blong hem, nating se i hadwok mo hem i kasem plante traem.—Wok 20:20; 2 Korin 11:23, 28.
2 ?From wanem ol aposol mo ol Kristin long taem bifo oli no fraet blong gohed blong talemaot gud nyus, nating we oli kasem plante bigfala traem from? Aposol Pol i ansarem kwestin ya long 1 Tesalonaeka 2:2, i se: “God blong yumi i mekem tingting blong mifala i strong blong kam talemaot gud nyus blong hem long yufala, long fes blong plante man we oli agens long tok ya tumas.” From samting ya, Pita mo Jon mo ol narafala disaepol tu oli no fraet blong talemaot gud nyus. Taem ol man oli letem Pita no Jon tufala i go fri long kalabus, tufala i gobak long kampani blong ol narafala disaepol. Nao taem olgeta oli harem ripot blong tufala, olgeta evriwan oli joen blong prea long God. Oli askem strong long Jeova blong ‘mekem se oli no fraet mo oli gat strong tingting blong gohed blong talemaot tok blong hem.’ Ale, wantaem nomo, God i ansarem prea ya. “Nao tabu speret i kam fulap long olgeta, nao oli stat talemaot tok blong God, we tingting blong olgeta i strong.”—Wok 4:29 mo 31.
Yumi Soemaot We Yumi Trastem Jeova
3 Ol aposol oli save se paoa blong Jeova i stap sapotem olgeta. Oli luk we olgeta promes we Jeova i mekem bifo, oli stap kam tru. Mo oli save se olgeta promes we oli no kam tru yet, bambae oli kam tru from Jisas Kraes. ?Olsem wanem nao? ?Yumi gat strong tingting olsem olgeta, blong no fraet blong talemaot gud nyus? Yumi no stap toktok long ol defren lanwis, no mekem sikman i kam gud bakegen olsem ol aposol bifo. Be yumi gat fulap samting we i soemaot long yumi se Jeova i stap givhan long yumi. Taem yumi luk ol profet tok blong Baebol we oli stap kamtru naoia, ?samting ya i pulum yumi blong no fraet blong talemaot gud nyus blong Kingdom blong God, no no gat?
4 Be yumi save se, taem yumi no fraet blong gohed long wok blong prij, bambae yumi mas kasem traem.(Jon 15:20) Samting ya i kamaot finis long Jisas mo long olgeta Kristin long faswan handred yia. Be samting ya i no blokem olgeta mo i no mekem olgeta oli kam slak long wok blong prij. No gat. Long defren fasin, plante taem ol trabol mo traem oli givim jans long olgeta blong talemaot gud nyus blong Kingdom. (Wok 4:3, 8-13a) From we yumi stap obei long tok blong God nomo long ol bigfala poen, plante taem oli askem long yumi blong talemaot from wanem yumi mekem olsemia. Hemia nao wan jans bakegen blong talemaot gud nyus long fasin no fraet. Olsem ya, yumi stap folem rod we Jisas Kraes mo ol aposol blong hem oli soemaot.
5 Wok blong haftaem paenia i givim plante moa jans long yumi blong talemaot gud nyus. Plante brata mo sista bambae oli mekem wok ya long Epril mo Mei. ?Olsem wanem long yu? Sipos yumi traehad blong mekem wok blong haftaem paenia, yumi soemaot sem fasin we Pol mo Banabas tufala i bin soemaot. Ol Wok 14:3 i talem se: “Nao tufala aposol I stap longtaem lelebet long ples ya, mo tufala i no fraet, tufala i strong blong talemaot nyus blong Masta blong yumi.” Sipos yumi save lego sam narafala samting mo yusum taem ya blong mekem 60 haoa long wok blong prij long wan manis, bambae yumi kasem bigfala blesing from.
6 Fasin no fraet i save givhan long yumi bigwan taem yumi stap givimaot sabskripsen tu. Ol save we i stap insaed long ol magasin, i stanap long tok blong God nomo, mo i save sevem laef blong man. Taswe, yumi no mas fraet blong prij, be yumi mas folem eksampel blong Jisas mo ol aposol blong hem.