Givhan Long Ol Narafala Blong Oli Kasem Blesing From Ransom
Bambae Yumi Tingbaot Ded Blong Jisas Long Eprel 12
1. ?Wanem rod blong ol man blong God oli soem tangkiu blong olgeta from ransom sakrefaes?
1 “Yumi mas talem tangkiu long God from presen ya blong hem we i gud tumas, i bitim mak olgeta, yumi no save makem.” (2 Kor. 9:15) Ol tok ya oli soemaot klia filing blong yumi from gudfala fasin, lav, mo kaen fasin we God i soemaot long ol man blong hem tru long Pikinini blong hem, Jisas Kraes. Fasin tangkiu ya bambae i kamaot moa taem yumi joen wanples long Eprel 12 blong mekem Memoriol blong ded blong Jisas.
2. ?Hu ol man we oli joen wetem ol man blong Jeova blong mekem Memoriol, mo wanem samting oli nidim blong mekem se ransom sakrefaes i givhan long olgeta?
2 Evri yia, samwe ten milian man oli joen wetem ol Witnes blong Jeova blong mekem lafet blong Memoriol. Taem ol man ya oli mekem olsem, oli soemaot se oli gat tangkiu from sakrefaes blong Jisas. Be, blong ransom ya i givhan long olgeta, oli mas bilif long hem. (Jon 3:16, 36) ?Olsem wanem yumi save givhan long olgeta blong oli wokem bilif ya? Long ol manis bifo mo afta long Memoriol, yumi save leftemap tingting blong olgeta blong oli gat prapa Baebol stadi blong olgeta mo blong oli joen evri wik long ol miting blong kongregesen. Tingbaot ol advaes we oli kam biaen.
3. ?Olsem wanem yumi save statem wan Baebol stadi wetem olgeta we yumi singaot olgeta oli kam long Memoriol?
3 Baebol Stadi: Taem yu invaetem olgeta we oli inters blong oli kam long Memoriol, i gud yu traem statem wan Baebol stadi wetem olgeta long buk ya Baebol Tijim. Talem long man blong haos se bambae yu eksplenem Memoriol long hem, nao openem buk ya long pej 206-208 mo tokbaot haf ya “Kakae Blong Masta—Wan Lafet We i Givim Ona Long God.” Yu save go visitim hem wan no tu taem blong tokbaot ol save ya, maet yu mekem olsem wan Baebol stadi long doa blong hem nomo. Taem yu tokbaot ol haf ya finis, maet man ya bambae i glad blong yutufala i tokbaot japta 5, “Ransom—Beswan Presen We God i Givim.” Sipos yu luk olsem se man ya bambae i gohed blong stadi, gobak mo tokbaot ol fofala faswan japta blong buk.
4. ?Long taem blong Memoriol, yumi save statem Baebol stadi wetem hu?
4 ?Yumi save yusum rod ya blong statem Baebol stadi wetem hu? Sam long olgeta we yu wok wetem, sam fren blong yu long skul, no samfala we oli stap long ol haos klosap long yu, maet oli glad blong storian long ol save ya. Maet ol brata oli save go luk ol man we waef blong olgeta oli sista long kongregesen. Mo yu no mas fogetem ol famle blong yu we oli no stap long trutok. Mo tu, bambae yumi wantem traehad bigwan blong singaotem olgeta we fastaem oli bin joen plante wetem kongregesen be naoia oli no moa joen, blong olgeta tu oli kam long Memoriol. (Luk 15:3-7) I gud we yumi faenem rod blong givhan long ol man olsem blong oli kasem blesing from ransom.
5. ?Olsem wanem yumi save leftemap tingting blong ol Baebol stadi mo ol narafala we oli intres blong oli joen evri wik long ol miting blong kongregesen?
5 Ol Miting Blong Kongregesen: Faswan miting we plante Baebol studen mo ol narafala we oli intres oli joen long hem, hemia Memoriol. ?Be olsem wanem yumi save leftemap tingting blong olgeta blong oli joen mo kasem blesing from ol narafala miting blong kongregesen? Kingdom Wok Blong Yumi blong Eprel 2005, pej 6, i givim ol advaes ya: “Talemaot nem blong nekis pablik tok. Soemaot Wajtaoa we bambae kongregesen i stadi long hem long Wajtaoa stadi, mo japta blong buk we bambae yumi stadi long hem long Buk Stadi long wik ya. Eksplenem Tiokratik Skul mo Miting Blong Kingdom Wok long olgeta. Sipos yu mas mekem wan tok long Tiokratik Skul, maet yu save traem tok ya wetem olgeta. Tokbaot ol bigfala poen we oli bin kamaot long ol miting. Yusum ol pija we oli stap long ol buk blong yumi, blong givhan long olgeta blong oli luk wanem i stap hapen long ol miting. Long faswan stadi nomo, yu save invaetem olgeta blong oli kam long ol miting.”
6. ?Wanem tufala rod we yumi save yusum blong givhan long olgeta we hat blong olgeta i stret blong oli kasem blesing from ransom sakrefaes?
6 Plante taem olgeta we hat blong olgeta i stret oli gru kwik long saed blong spirit taem oli stadi evri wik mo oli joen oltaem long ol miting blong kongregesen. Taswe, i gud we yumi leftemap tingting blong ol narafala blong oli yusum gud ol samting long saed blong spirit we God i givim, mo kasem blesing from nambawan presen ya we God i givim—ransom.