“Oltaem Yufala i Mas Mekem Samting Ya”—Yumi Mekem Memoriol Long Namba 5 Eprel
1. ?From wanem Memoriol i impoten?
1 Jisas i talem long ol man blong hem se: “Oltaem yufala i mas mekem samting ya blong tingbaot mi bakegen.” (Luk 22:19) Jisas i stap talem long olgeta se oli mas tingbaot ded blong hem bakegen. Taem Jisas i ded blong pemaot ol man, hem i openem rod blong yumi kasem plante blesing. Taswe, ol Kristin oli tinghae long dei blong Memoriol evri yia. Long tingting blong olgeta, dei ya i impoten moa i bitim ol narafala dei. Naoia yumi stap kam klosap long dei ya long namba 5 Eprel. ?Yumi save mekem wanem long taem ya blong talem tangkiu long Jehova?—Kol. 3:15.
2. ?Yumi save stadi mo tingting dip long wanem samting?
2 Yumi Reregud: Yumi stap reregud from ol samting we yumi ting se oli impoten. Long famle, yumi save rerem tingting blong yumi from Memoriol, sipos yumi tokbaot ol samting we oli hapen long ol dei bifo we Jisas i ded, mo sipos yumi tingting dip long ol samting ya. (Esra 7:10) Long kalenda mo long smol buk ya Ridimgud Ol Tok Blong Baebol Evri Dei, i gat sam vas we yumi save ridim. Long Wajtaoa (Inglis mo Franis) Februari 1, 2011, pej 23 mo 24, i gat plante moa vas wetem ol japta blong buk ya Man We i Hae Moa we oli tokbaot ol vas ya.
3. ?Yumi save mekem wanem blong joen moa long wok blong prij long taem blong Memoriol?
3 Yumi Prij: Yumi stap talem tangkiu long Jehova from Memoriol taem yumi joen plante long wok blong prij. (Luk 6:45) Stat long Sarede namba 17 Maj, bambae yumi mekem wan spesel wok long olgeta ples long wol, blong singaot ol man oli kam long Memoriol. ?Olsem wanem? ?Yu yu save jenisim program blong yu smol, blong yu save prij moa? Maet yu save joen long wok blong haftaem paenia. I gud yufala long famle i tokbaot samting ya long nekis Famle Wosip blong yufala.
4. ?Memoriol i mekem wanem gudfala samting long yumi?
4 !Taem yumi joen long Memoriol evri yia, yumi kasem plante gudfala samting from! Yumi stap tingting long gudfala fasin blong Jehova blong givim presen long narafala. Hem i givim Pikinini blong hem, wan nomo we hem i gat, blong pemaot yumi. Samting ya i mekem se yumi lavem hem moa, mo yumi glad moa. (Jon 3:16; 1 Jon 4:9, 10) Ale, yumi harem se yumi laef, i no blong mekem ol wok blong yumi nomo, be blong mekem wok blong hem. (2 Kor. 5:14, 15) Mo yumi wantem talemaot nem blong Jehova mo presem hem. (Sam 102:19-21) Tru ya, yumi ol man blong Jehova, yumi wantem tumas blong talem tangkiu long hem. Taswe, yumi glad tumas long janis we yumi gat long namba 5 Eprel, blong “soemaot ded blong Masta blong yumi.”—1 Kor. 11:26.