Program Blong Nekis Spesel Dei Asembli

Tabu spirit i givim paoa long ol faswan Kristin, ale oli traehad moa blong mekem gud nius i go long ol narafala ples. (Wok 1:8; Kol. 1:23) Program blong spesel dei asembli blong sevis yia 2007, hemia ‘Stap Bisi Oltaem Wetem Tok Blong God.’ Program ya bambae i givhan long yumi blong folem nambawan eksampol blong ol faswan Kristin ya.​—Wok 18:5.

King Deved i stap tokbaot Tok blong God, i se: “Ol tok we Hae God i putum, yumi save bilif long hem, mo i stap givim waes long olgeta we oli no waes.” (Sam 19:7) Program blong spesel dei asembli blong 2007, we oli reregud long hem, bambae i soemaot olsem wanem Baebol i nambawan blong “mekem ol samting oli stret bakegen,” mo bambae i leftemap tingting blong yumi blong yusum Tok blong God long wok blong prij mo taem yumi tijim ol man wetem strong tingting se taem i sot. (2 Tim. 3:​16, 17, NW) Niufala program ya bambae i soemaot se, sipos yumi folem ol rul blong Baebol long evri dei laef blong yumi, yumi save ronwe long ol trap mo yumi save kasem blesing. Mo tu, program ya bambae i givhan long yumi blong yusum Tok blong God blong halpem ol yangfala mo ol niuwan blong oli gohed long saed blong spirit.

Yu mas meksua se yu stap taem asembli ya i stat, mo yu mas lesingud. Raetem ol poen we yu save mekem i wok long laef blong yu. Soemaot se yu gat tangkiu from ol tijing mo woning we yu kasem, mo tingting gud olsem wanem yu save mekem ol save we yu lanem oli wok.

Spesel dei asembli blong yumi bambae i mekem se yumi gat moa tangkiu long Tok blong God, bambae i mekem yumi tingbaot blong holemstrong long wok blong talemaot gud nius blong Kingdom, mo bambae i soem olsem wanem yumi save givhan long ol narafala blong oli mekem sem mak. !From samting ya, yu mas gat strong tingting blong no mestem eniwan long ol advaes mo tijing we Jeova i givim tru long rod ya!​—Aes. 30:20b, 21.