Kakae We i Kamaot “Long Stret Taem Blong Hem”

1. ?Olsem wanem program blong laswan spesel dei asembli i givhan long yu mo ol narafala?

¹ Afta long ol spesel dei asembli blong yumi, plante taem yumi talem se: “!Hemia nao samting we yumi nidim tumas!” Wan seket elda i talem se afta long laswan spesel dei asembli blong olgeta, sam brata mo sista oli talem se oli wantem mekem moa long wok blong prij. Wan narafala seket elda i talem se: “Spesel dei asembli ya i givhan long yumi blong tingting gud long laef blong yumi long ol las dei ya. Mo i givhan long yumi blong tingting gud long ol samting we yumi jusum blong mekem long laef blong yumi.” Wan narafala seket elda bakegen i talem se: “Plante pablisa oli talem se asembli ya i wekemap tingting blong olgeta, blong oli meksua se oli putum tingting blong olgeta i stap strong long wok ya we i impoten tumas, hemia wok blong prij.” ?Olsem wanem long yu? ?Spesel dei asembli i givhan long yu long wanem rod?

2. ?Program blong spesel dei asembli blong nekis seves yia, bambae i tokbaot wanem?

² Long seves yia we i stap kam, program blong spesel dei asembli bambae i givim sam moa save bakegen we yumi nidim tumas. Stamba tok blong asembli ya, “Jeova i Olsem Wan Sefples We Yumi Mas Go Haed Long Hem,” i stanap long Ol Sam 118:8, 9, NW. Hemia sam tok we bambae oli kamaot long asembli ya: “?Olsem Wanem Jeova i Wan Ples Blong Haed Long Taem Blong Trabol?,” “Yumi Givhan Long Ol Narafala Blong Oli Faenem Sefples Long Jeova,” “Yumi Mas Folem Fasin Blong Jeova Mo Kam Olsem Ples Blong Haed Blong Narafala,” “!Ol Yangfala, Yufala i Mas Trastem Jeova!,” mo “Paradaes Long Saed Blong Spirit—Wan Sefples We Jeova i Mekemrere Blong Yumi.”

3. ?Yumi mas mekem wanem blong asembli ya i givhan gud long yumi?

³ ?Yumi Mas Mekem Wanem Blong Asembli Ya i Givhan Gud Long Yumi?: Taem yu save stret dei blong asembli ya, i gud yu mekem plan, blong yu save stap long asembli ya. I gud we yu askem long ol Baebol stadi blong yu, blong olgeta tu oli kam wetem yu long asembli ya. Yumi mas holemtaet long tingting blong yumi, olgeta tok we yumi harem long asembli ya. Olsem nao bambae yumi mekem ‘tingting blong yumi i longfala, mo yumi gat frut blong tok ya long laef blong yumi.’ (Luk 8:15) Taswe, i gud we yu lesin gud long ol tok blong asembli ya, mo yu raetem daon ol impoten poen long not buk blong yu, wetem ol advaes we yu wantem mekem i wok long laef blong yu mo long wok blong prij. Afta long asembli, i gud we yu tekem taem blong tokbaot bakegen ol tok we yu harem wetem famle blong yu, mo tokbaot sam rod blong mekem ol save ya oli wok long laef blong yufala.

4. ?From wanem yumi wantem tumas blong stap long spesel dei asembli ya we bambae i kam?

⁴ Spesel dei asembli blong yia ya bambae i olsem wan kakae we tes blong hem i gud tumas mo we i save givhan long bodi blong yumi. Hemia from we ol brata we oli rerem asembli ya, oli tingting gud fastaem mo oli rerem program blong asembli ya wetem lav. Bambae Jeova i blesem traehad blong yu blong stap long asembli ya, mo blong harem gud long kakae ya we i kamaot “long stret taem blong hem.” Kakae ya i blong givhan long olgeta Kristin man we oli mekem wok blong God.—Mat. 24:45.