!Spesel Wok Long Oktoba 16 Kasem Novemba 12!
1 “!Klosap Nao Ol Giaman Skul Oli Lus!” Hemia stamba tok blong Kingdom Nius Namba 37, we bambae yumi seremaot long nekis manis long olgeta ples blong wol. Long fas haf blong manis Oktoba, bambae yumi seremaot ol Wajtaoa mo Wekap! Stat long Mande, Oktoba 16, kasem Sande Novemba 12, bambae yumi joen long bigfala wok ya blong seremaot Kingdom Nius Namba 37. Long ol wiken blong spesel wok ya, bambae yumi seremaot traket ya wetem ol magasin.
2 ?Hu i Save Joen?: Evriwan we oli pablisa bambae oli wantem joen fulwan long spesel wok ya. Samfala bambae oli wantem mekem wok blong haftaem paenia. ?Yu yu gat sam pikinini no Baebol studen we oli stap gohed gud? Yu mas givhan long olgeta blong oli go luk ol elda, blong oli faenemaot sipos oli naf blong kam ol pablisa we oli no baptaes yet. Ol elda oli mas go toktok long ol pablisa we oli no moa prij, blong leftemap tingting blong olgeta blong oli joen long spesel wok ya. Maet ol pablisa ya oli save wok wetem olgeta we oli gat gudhan long wok blong prij.
3 Oli sanem plante Kingdom Nius Namba 37 long olgeta kongregesen, mekem se ol wanwan pablisa mo paenia oli save kasem samwe long 40 no 50 kopi blong olgeta. Olgeta we oli intres mo we oli no pablisa yet, oli save kasem faef traket blong oli seremaot long ol famle mo fren blong olgeta. Ol pablisa mo paenia oli mas kaontem namba blong ol traket we oli seremaot, mo raetemdaon namba ya biaen long pepa blong ripot long en blong manis Oktoba mo Novemba. Sekretari bambae i kaontem fulnamba blong traket we kongregesen i seremaot, mo talemaot namba ya long branj ofis long en blong wanwan manis ya. Sipos i gat sam Kingdom Nius i stap afta long spesel wok ya, ol pablisa oli save yusum olgeta long wok blong prij.
4 ?Bambae Yu Talem Wanem?: Yu mas mekem toktok blong yu i sot nomo, nao bambae yu save seremaot plante moa traket. Yu save talem se: “Mi mi joen long wan wok we i stap gohed long fulwol blong seremaot nius ya we i impoten tumas. Wok ya, mifala i mekem fri nomo, blong givhan long olgeta man. Hemia traket blong yu. Plis yu ridim.” Maet i moagud sipos yumi no karem wan bigfala basket blong prij long ol haos wanwan. Meksua se yu raetemdaon nem blong olgeta we oli rili intres.
5 ?Olsem Wanem Blong Finisim Teritori Blong Yufala?: I moagud we yufala i traem seremaot Kingdom Nius ya long olgeta haos mo stoa long teritori blong yufala, i bitim we yufala i givimaot long rod. Raetemdaon ol haos we i no gat man long olgeta, mo traem blong gobak long wan defren taem no dei long wik. Stat long Mande, Novemba 6, yufala i save lego wan Kingdom Nius long ol haos we i no gat man long olgeta. Be sipos teritori blong kongregesen i bigwan tumas mo bambae i no gat naf taem blong mekem spesel wok ya long fulwan teritori, ol elda oli mas tekem desisen sipos ol pablisa oli save lego wan Kingdom Nius long ol haos we i no gat man long olgeta long olgeta wik blong spesel wok ya.
6 En blong ‘Bigfala Babilon’ i stap kam hareap. Ol man oli mas kamaot long hem bifo we hem i lus olgeta. (Rev. 14:8; 18:8) !Mekem plan blong yu naoia blong joen fulwan long spesel wok ya we bambae i gohed long fulwol, blong mekem olgeta man oli save se klosap nao ol giaman skul bambae oli lus!