Ol Miting Blong Kingdom Wok

Wik We i Stat Long Septemba 11

Singsing 20

10 minit: Lokol mesej. Jusum sam Advaes long Kingdom Wok Blong Yumi. Leftemap tingting blong evriwan blong oli lukluk vidio kaset ya Young People Ask—How Can I Make Real Friends? blong oli save tokbaot long Miting Blong Kingdom Wok long wik blong Septemba 25. Yusum sam fastok long pej 10, no sam narafala fastok we oli stret long ples blong yufala, blong mekem tu pleplei blong soem olsem wanem blong seremaot Wajtaoa blong Septemba 1 mo Wekap! blong Septemba (Franis/Inglis). Sipos tufala magasin ya i no gat, yusum tu laswan magasin we kongregesen i kasem. Long wan pleplei, soem olsem wanem blong ansa long man we i talem tok ya: “Mi mi gat skul finis.”—Lukluk buk ya Statem Wan Storian, pej 13-14.

20 minit: Kasem Blesing From Miting Blong Kingdom Wok Mo Tiokratik Skul. Tok wetem kwestin mo ansa we i stanap long buk ya Ogenaesesen We i Mekem Wok Blong Jeova, stat long smol stamba tok long pej 64 kasem smol stamba tok long pej 69.

15 minit: Leta Blong Branj Ofis. Tok wetem kwestin mo ansa we i stanap long leta we i stap long faswan pej blong Kingdom Wok Blong Yumi. Yusum sam poen long haf ya Ansa Long Wan Kwestin, long Kingdom Wok Blong Yumi blong Jenuware 2005. Askem kwestin long samfala long kongregesen, we i no longtaem i pas oli bin givim no kasem help long taem blong disasta.

Singsing 126 mo laswan prea.

Wik We i Stat Long Septemba 18

Singsing 213

5 minit: Lokol mesej.

15 minit: ?Olsem Wanem Long Ol Wok Blong Yumi Las Yia? Elda we i lukaot long wok blong prij i tokbaot sevis yia we i jes finis. Hem i pulum tingting i go long ol gudfala samting we kongregesen i mekem long wok blong prij. Talem ol gudfala tok long kongregesen from nambawan wok we i bin mekem. Talem wan no tu samting we kongregesen i save wok long hem long yia we i kam. Tokbaot wok blong ol paenia, mo talem gudfala tok from hadwok we oli mekem. Tokbaot gudfala frut we i kamaot from traehad we kongregesen i mekem blong givhan long olgeta we oli no moa prij.

25 minit: “!Spesel Wok Long Oktoba 16 Kasem Novemba 12!” Wan elda i mekem tok ya long fasin we i wekemap tingting. Afta we hem i ridimaot mesej we Sosaeti i sanem long leta blong ol elda long Jun 6, 2006, givimaot wan Kingdom Nius Namba 37 long ol wanwan man long miting ya. Ale, gohed blong tokbaot haf ya wetem ol kwestin mo ansa. Talem ol plan we kongregesen i mekem blong traem finisim olgeta teritori blong kongregesen. Leftemap tingting blong olgeta pablisa blong oli joen fulwan long spesel wok ya. Mekem wan sotfala pleplei.

Singsing 50 mo laswan prea.

Wik We i Stat Long Septemba 25

Singsing 94

10 minit: Lokol mesej. Ridim ripot blong ol kaon mo talem tangkiu from ol presen mane. Talem long ol pablisa blong oli givim ripot blong prij blong Septemba. Yusum ol fastok long pej 10, no sam narafala fastok we oli wokgud long ples blong yufala, blong mekem tu pleplei blong soem olsem wanem blong seremaot Wajtaoa blong Oktoba 1 mo Wekap! Okt./Dis. (Bislama) taem yumi prij long rod.

25 minit: “Wan Vidio Kaset We Yumi Mas Tingting Dip Long Hem.”a Long haf 1, askem long kongregesen blong oli talemaot tingting blong olgeta long saed blong vidio kaset ya Young People Ask—How Can I Make Real Friends? Biaen, go stret long ol wanwan kwestin long haf 2 kasem 7.

10 minit: Ol Stori Blong Wok Blong Prij. Askem long kongregesen blong oli tokbaot gudfala wok we oli mekem taem oli seremaot spesel Wekap! no taem oli yusum buk ya Baebol Tijim blong statem Baebol stadi long faswan taem we oli prij long man. Oli save mekem wan no tu pleplei blong soemaot wanem i bin hapen.

Singsing 183 mo laswan prea.

Wik We i Stat Long Oktoba 2

Singsing 36

10 minit: Lokol mesej. Tokbaot Ansa Long Wan Kwestin.

15 minit: Lokol nid.

20 minit: “Prij Long Ol Haos Wanwan.”b Sipos i gat taem, askem long kongregesen blong oli tokbaot ol vas we oli stap.

Singsing 127 mo laswan prea.

[Ol futnot]