Yumi No Fraet Blong Toktok, Be Yumi Holem Pis Tu
1 Plante man we yumi prij long olgeta oli talemaot ol bilif blong olgeta we oli rili kamaot long hat blong olgeta. Be ol bilif ya oli no laenap wetem ol trutok blong Baebol. Taem yumi prij, yumi no fraet blong toktok, be yumi wantem “gat pis wetem olgeta man” tu, mo yumi no mekem olgeta oli kam kros. (Rom 12:18; Wok 4:29) ?Taem yumi talemaot gud nius blong Kingdom, olsem wanem yumi save soem fasin ya we yumi no fraet blong toktok, be long semtaem yumi holem pis wetem ol man?
2 Faenem Ol Tingting We Hem i Save Agri Long Olgeta: Wan man we i wantem holem pis i traehad blong no rao wetem narafala. Sipos yumi gohed blong toktok blong traem stretem ol rong bilif we wan man i strong long olgeta, hemia bambae i no pulum hem blong wantem lesin long yumi. Sipos hem i talemaot wan tingting we i no stret, long kaen fasin yumi save pulum hem blong tingbaot wan poen we maet hem i agri long hem. Taem yumi makem gud ol tingting we hem i agri long olgeta, yumi save givhan blong mekem nogud filing we man ya i gat long yumi i godaon, mo i save tajem hat blong hem tu.
3 ?Sipos wan man i talemaot wan tingting we i no stret mo yumi no talem wan samting blong traem stretem, hemia i min se yumi stap agri wetem hem no yumi stap haedem trutok? Nogat. Wok blong yumi ol Kristin man, i no blong stretem evri tingting we i no stret, be i blong talemaot gud nius blong Kingdom blong God. (Mat. 24:14) Bitim we yumi hareap blong toktok taem wan man i talemaot wan tingting we i no stret, i moa gud yumi tingbaot se tok blong hem i givhan long yumi blong kasem save long tingting blong hem.—Prov. 16:23, NW.
4 Respektem Tingting Blong Ol Man: I tru se samtaem yumi mas gat strong tingting mo no fraet blong givim ansa long ol tijing we oli no stret. Be from we yumi wantem holem pis wetem ol man, yumi no talem ol toktok blong jikim olgeta taem oli talemaot wan tingting we i no stret. Mo yumi no talemaot ol toktok blong daonem ol man we oli bilif olsem no we oli tijim samting ya. Bambae yumi no pulum ol man blong lesin long yumi sipos yumi givim tingting se yumi hae moa long olgeta. Be sipos yumi toktok long kaen fasin we i soemaot se yumi gat tingting daon, hemia i save openem tingting blong ol man we oli laekem trutok. Taem yumi respektem ol man mo bilif blong olgeta, oli haremsave se yumi no wantem daonem olgeta, mo oli glad moa blong lesin long yumi.
5 Taem aposol Pol i prij long ol man, hem i tingbaot bilif blong olgeta, mo hem i traehad blong talemaot gud nius long fasin we i tajem hat blong olgeta. (Wok 17:22-31) Hem i glad blong ‘mekem olsem we hem tu i gat sem fasin we olgeta oli gat,’ blong hem i save “yusum olgeta rod blong sevem sam long olgeta.” (1 Kor. 9:22) Yumi mekem sem mak taem yumi no fraet blong talemaot gud nius be yumi holem pis tu wetem ol man.