‘Yufala i Mas Gat Pis Wetem Olgeta Man’
1. ?Yumi mas folem wanem advaes blong Baebol taem yumi mitim ol man we oli kros?
1 Yumi ol man blong Jehova, yumi laekem pis. Mo yumi go talemaot gud nius blong pis long ol man. (Aes. 52:7) Be samtaem, ol man oli kros taem yumi go long haos blong olgeta. Nating se i olsem, yumi mas gat pis wetem olgeta man. ?Be wanem i save givhan long yumi blong mekem olsem?—Rom 12:18.
2. ?From wanem i impoten blong yumi gat fasin luksave?
2 Yumi Mas Gat Fasin Luksave: Maet samfala oli kros from we oli agensem trutok, be ating sam narafala oli kros from wan defren risen olgeta. Maet yumi go long haos blong olgeta long wan taem we i no stret long olgeta. Maet man blong haos i kros from we hem i gat sam problem. Be nating sipos hem i kros from gud nius, yumi mas tingbaot se hemia i from we Setan i satem tingting blong hem. (2 Kor. 4:4) Fasin luksave bambae i givhan long yumi blong stap kwaet, mo yumi no harem nogud.—Prov. 19:11.
3. ?Yumi save soemaot respek olsem wanem long man blong haos?
3 Yumi Mas Soemaot Respek: Plante man long teritori blong yumi, oli gat prapa bilif blong olgeta. (2 Kor. 10:4) Oli gat raet blong jusum sipos oli wantem lesin no nogat. Yumi no mas daonem bilif blong olgeta. Mo yumi no mas givim tingting ya se yumi save moa Baebol i bitim olgeta. Sipos oli talem se yumi aot, yumi mas aot wetem respek.
4. ?Toktok gud long ol man i minim wanem?
4 Yumi Mas Toktok Gud: Nating se man i tok nogud long yumi, be yumi mas toktok gud long hem mo yumi toktok kwaet. (Kol. 4:6; 1 Pita 2:23) I gud yumi traem blong faenem wan tingting we man blong haos i agri long hem, i bitim we yumi rao wetem hem. Maet yumi save askem long hem long kaen fasin, se from wanem hem i no glad. Be sipos yumi luk se hem i kros tumas, i moa gud yumi aot nomo.—Prov. 9:7; 17:14.
5. ?Yumi kasem wanem blesing taem yumi gat pis wetem olgeta man long wok blong prij?
5 Sipos yumi gat pis wetem man blong haos, bambae hem i tingbaot samting ya. Ale maet nekis taem, hem i save lesin taem wan Witnes i prij long hem. (Rom 12:20, 21) Nating sipos hem i gohed blong agensem yumi, be maet wan dei bambae hem i kam wan brata blong yumi. (Gal. 1:13, 14) Nomata se bambae hem i intres long trutok no nogat, be yumi gohed blong wosipim Jehova mo yumi leftemap tijing blong hem. Yumi mekem olsem taem yumi gohed blong bos long tingting blong yumi mo yumi traehad blong gat pis wetem olgeta man.—2 Kor. 6:3.