Folem Eksampol Blong Jisas Long Wok Blong Prij
1 Jisas i soem wan eksampol blong yumi folem long wok blong prij. Hem i gat bigfala lav long God mo long ol man. Plante taem hem i soem lav ya, mo hem i soemaot long plante defren rod. Hem i tijim trutok long olgeta we oli gat tingting daon mo hem i soem lav mo kaengud fasin long olgeta we oli stap safa mo we ol man oli mekem i nogud long olgeta.—Mat. 9:35.
2 Eksampol Blong Jisas Mo Ol Tijing Blong Hem: Jisas i no joen long ol bisnes blong politik no long ol grup we ol man oli stanemap blong givhan long ol narafala man. Hem i no letem ol samting ya, no eni narafala wok, oli blokem hem blong i no moa mekem impoten wok we God i sanem hem blong mekem. (Luk 8:1) Hem i yusum ful paoa blong hem long wok ya blong talemaot gud nius blong Kingdom blong God. Gud nius ya, hemia se Kingdom nomo i rod blong stretem ol trabol blong man blong olwe. Jisas i gat wan impoten wok blong mekem mo hem i gat smol taem nomo blong mekem wok ya. Taem ol man Kapaneam oli wantem se Jisas i stap wetem olgeta, hem i talem long ol disaepol blong hem se: “I gud yumi go long ol narafala vilej . . . blong mi prij long olgeta, from we mi mi kam long ples ya blong mekem wok ya.”—Mak 1:38.
3 Jisas i trenem ol disaepol blong hem, mo taem hem i sanem olgeta i go prij, hem i givim oda ya se: “Yufala i mas talemaot se, ‘Taem blong God i kam King blong olgeta man long wol, [“Kingdom blong God,” NW ] i kam klosap finis.’ ” (Mat. 10:7) Jisas i tijim ol man blong hem se oli mas putum ol wok blong Kingdom i stap long fasples long laef blong olgeta. (Mat. 6:33) Lastok we hem i talem long ol disaepol blong hem bifo we hem i go antap long heven, i soem klia wanem samting we oli mas mekem. Hem i talem se: “Yufala i mas go long ol man long olgeta ples long wol, blong pulum olgeta oli kam man blong mi.”—Mat. 28:19.
4 Kingdom i Impoten: Bigfala poen we Jisas i tokbaot hemia Kingdom blong God, mo hem i pulum ol disaepol blong hem blong oli mekem sem mak. Ol traehad we ol man oli mekem blong traem stretem ol trabol long wol oli no save win. (Jer. 10:23) Kingdom blong God nomo bambae i mekem nem blong God i kam tabu mo stretem ol problem blong man blong olwe. (Mat. 6:9, 10) Taem yumi tijim trutok blong Kingdom long ol gudfala man we oli ‘stap harem nogud from ol samting nogud we ol narafala man oli stap mekem,’ yumi stap givhan long olgeta blong oli gat wan laef we i hapi mo i gud naoia, mo blong oli putum tingting blong olgeta i stap strong long wan gudfala fiuja.—Esik. 9:4.
5 Jisas i gohed yet blong mekem sam samting we oli joen long wok blong talemaot gud nius blong Kingdom blong God, mo hem i talem se bambae hem i givhan long yumi long wok ya. (Mat. 28:20) ?Yumi stap folem eksampol blong Jisas long wok blong prij gogo kasem wanem mak? (1 Pita 2:21) !Long ol las dei ya, i gud we yumi mekem evri samting we yumi naf blong mekem blong folemgud eksampol we Jisas i soem long wok blong prij!