Wok Blong Prij—Wok Ya We i Impoten Moa
1 Yumi evriwan i gat ol defdefren wok we yumi mas mekem. Wok blong lukaot long famle hemia wan impoten wok we God i askem ol papa mama blong mekem. (1 Tim. 5:8) Be, taem we yumi spenem blong mekem wok ya we God i askem yumi blong mekem insaed long famle i no mas tekem taem we yumi mas spenem long wok blong talemaot Kingdom mo pulum man i kam disaepol.—Mat. 24:14; 28:19, 20.
2 Jisas i soem eksampol we yumi mas folem blong ‘lukaot kingdom fastaem.’ (Mat. 6:33, NW; 1 Pita 2:21) Jisas i no gat plante samting, be hem i putum olgeta tingting mo paoa blong hem i go long wok blong Papa blong hem. (Luk 4:43; 9:58; Jon 4:34) Hem i strong blong prij long eni taem we hem i gat janis blong mekem olsem. (Luk 23:43; 1 Tim. 6:13) Hem i pulum ol disaepol blong hem blong olgeta tu oli intres bigwan long wok blong hivimap ol kakae long garen.—Mat. 9:37, 38.
3 Folem Fasin Blong Jisas Tede: Yumi save folem eksampol blong Jisas sipos yumi no mekem laef blong yumi i fasfas long plante tumas samting. Laef blong yumi i mas stanap long wok blong prij nomo. Sipos yumi gat ol samting we yumi nidim blong laef evri dei hemia i naf. I gud yumi folem advaes blong Baebol se yumi no traem gohed blong kasem moa samting bakegen we wol ya i stap givim. (Mat. 6:19, 20; 1 Tim 6:8) !I gud moa sipos yumi traem faenem sam defren rod blong mekem moa long wok blong prij! Sipos yumi fesem hadtaem long laef blong yumi, yumi mas strong olsem Jisas, blong no letem ol wari blong laef oli kavremap impoten wok ya blong talemaot gud nius blong Kingdom.—Luk 8:14; 9:59-62.
4 Sam brata sista we oli gat plante wok blong mekem, oli gohed nomo blong putum wok blong prij fastaem. Wan brata we i gat plante pikinini, mo i gat hae posisen long wok blong hem mo hem i wan elda tu long Kristin kongregesen, i talem se: “Wok blong prij i faswan wok long laef blong mi.” Mo wan sista we i paenia i talem se: “Wok blong paenia i sas moa i bitim eni narafala wok blong wol.”
5 Nomata se laef blong yumi i olsem wanem, i gud yumi folem eksampol blong Jisas. ?Yumi save mekem samting ya olsem wanem? Hemia taem yumi mekem se wok blong prij i wok we i impoten moa long laef blong yumi.