Ansa Long Wan Kwestin
◼ ?Wanem denja i stap taem yumi yusum Intenet blong storian wetem wan man we yumi no save hem?
Oli wokem plante Web saet blong ol man oli save mitim mo fren wetem wan man long Intenet. Plante long ol Web saet ya oli letem ol man oli putum pija blong olgeta mo sanem ol save long saed blong olgeta tu i go long eni man. Ol man we oli luk ol save ya oli save raet i kambak long hemia we i sanem ol save ya. Plante yangfala oli yusum ol Web saet, mo sam yangfala insaed long kongregesen tu oli yusum ol Web saet ya blong toktok wetem ol man we oli talem se oli Witnes blong Jeova.
Wan man we yumi mitim long Intenet i save giaman isi nomo long yumi long saed blong hem wan, fasin fren we hem i gat wetem Jeova mo ol tingting blong hem. (Sam 26:4) Maet man ya i talem se hem i wan Witnes blong Jeova, be hem i wan man we i no bilif long God, i wan man we kongregesen i putumaot hem, no i wan man blong apostasi. (Gal. 2:4) I luk olsem se, plante man we oli mekem rabis fasin long saed blong seks wetem ol pikinini, oli yusum Web saet blong traem faenem sam moa pikinini blong mekem nogud wetem olgeta.
Nating sipos yumi ting se ol man we yumi stap storian wetem olgeta long Intenet oli gat gudnem insaed long kongregesen, ol storian olsem oli save jenis kwiktaem nomo i go long ol stori we oli no stret blong wan Kristin. Hemia from we ol man oli no sem blong talem eni samting long narafala taem oli save se narafala ya i no save luk olgeta. Maet oli harem se fasin ya blong toktok long Intenet i wan samting we i haed mo se i no gat wan narafala man, papa mo mama blong olgeta, no ol elda, we i save ridim no luk wanem we oli stap talem long Intenet. Sore tumas, plante yangfala blong ol brata mo sista oli foldaon long trap ya nao oli kam ol man we oli stap talem ol doti tok. (Efes. 5:3, 4; Kol. 3:8) Samfala oli putum long kompiuta, ol pija blong olgeta we i save pulum filing blong narafala, oli jenisim nem blong olgeta long fasin we i givim rong tingting long saed blong seks no oli joenem ol miusik mo vidio we oli tokbaot ol rabis fasin long saed blong seks i go wetem sam save long saed blong olgeta wan.
From samting ya, ol papa mo mama oli mas jekemap gud ol samting we pikinini blong olgeta i stap mekem long kompiuta. (Prov. 29:15) I denja tumas blong letem wan man we yumi no save, i kam insaed long haos blong yumi no blong letem hem i stap hem wan wetem ol pikinini blong yumi. Long sem fasin, i denja tumas long yumi mo ol pikinini blong yumi blong mekem fren long Intenet wetem ol man we yumi no save olgeta, nating sipos oli talem se oli Witnes blong Jeova.—Prov. 22:3.