Folem Eksampol Blong Jisas
1. ?Wanem eksampol we Jisas i soem?
1 Taem yumi joen long wok ya blong mekem disaepol, yumi mas tingbaot se eksampol blong yumi bambae i gat paoa long laef blong olgeta we oli stap wajem yumi. Jisas i tijim ol man tru long ol tok mo ol aksen blong hem. Ol man oli luk strong tingting we hem i gat, mo lav we hem i gat long ol man. Oli luk we tingting blong hem i stap long wan mak nomo hemia se hem i wantem leftemap nem blong Papa blong hem, mo i wok strong blong finisim wok we Papa blong hem i sanem hem blong mekem.—1 Pita 2:21
2. ?Olsem wanem eksampol blong yumi bambae i gat paoa long laef blong olgeta we yumi prij wetem olgeta?
2 Taem Yumi Prij Long Ol Haos Wanwan: Olsem Jisas, eksampol blong yumi bambae i gat paoa long laef blong ol man we yumi wok wetem olgeta. Strong tingting we yumi gat long wok blong prij i save givhan long ol niuwan we oli no gat gudhan yet blong prij, blong oli tingbaot se wok blong olgeta blong talemaot gud nius i olsem wanem. Taem oli luk glad we yumi gat long wok ya mo fasin blong yumi we yumi intres long narafala, olgeta tu oli save mekem olsem taem oli prij. Mo tu, taem oli luk fasin blong yumi blong yusum gud ol vas blong Baebol long ol visit mo Baebol stadi, samting ya bambae i pulum olgeta blong mekem i sem mak.
3. ?Olsem wanem eksampol blong yumi i save givhan long ol Baebol studen blong yumi, mo oli save lanem wanem from?
3 Taem Yumi Mekem Ol Baebol Stadi: Ol Baebol Studen blong yumi bambae oli lukluk fasin blong yumi. Eksampol, sipos yumi talem long olgeta se i impoten blong rerem stadi blong olgeta, jekem ol vas blong Baebol, mo makem ol impoten poen, be bambae oli luk sipos yumi tu yumi bin rere. (Rom 2:21) Sipos yumi no mesmestem taem blong stadi wetem olgeta, bambae olgeta tu oli no save letem ol narafala samting i blokem stadi blong olgeta. Mo tu, bambae oli luk strong bilif we yumi gat, mo fasin we yumi no tingbaot yumi wan nomo be yumi putum wok blong God fastaem. Yumi no mas sapraes se Baebol studen blong olgeta we oli folemgud eksampol blong Jisas, oli kam ol pablisa we oli wok strong long wok blong talemaot gud nius, olsem tija blong olgeta.
4. ?Taem yumi joen long ol Kristin miting, olsem wanem eksampol blong yumi i save tijim narafala?
4 Taem Yumi Joen Long Ol Miting Blong Kongregesen: Evriwan we oli pat blong Kristin kongregesen oli gat wok ya blong givgivhan long olgeta tru long ol eksampol blong olgeta. Taem ol man we oli intres oli kam long miting, bambae oli lanem samting from gudfala eksampol blong olgeta we oli stap long miting. Bambae oli luk kampani blong ol brata sista, fasin joengud blong olgeta, fasin blong olgeta blong werem klos mo mekem hea. (Sam 133:1) Bambae oli luk eksampol blong yumi blong joen oltaem long ol Kristin miting mo fasin blong yumi blong talemaot bilif blong yumi long taem blong ol miting. Wan man we i bin kam long miting, i luk olsem wanem wan smol gel i kwik blong faenem vas long prapa Baebol blong hem mo i folemgud riding. Eksampol blong smol gel ya i pulum man ya blong stadi Baebol.
5. ?From wanem yumi neva mas ting nating long eksampol blong yumi?
5 Baebol i pulum yumi blong folem gudfala eksampol blong ol narafala. (Fil. 3:17; Hib. 13:7) Taswe yumi mas tingbaot se sipos yumi folemgud eksampol blong Jisas, samting ya bambae i gat paoa long laef blong ol narafala. Sipos yumi luksave samting ya, bambae yumi putum vas ya oltaem long hat blong yumi, hemia 1 Timoti 4:16 we i se: “Yu mas lukaot gud long fasin blong yu mo long ol tok we yu stap tijim man long hem.”