Kam Wan Man Blong Prij We i Gohedgud
1 Papa blong yumi long heven i glad taem hem i luk se ol man blong wok blong hem oli gohedgud long trutok. Hemia i min se oli mas stap kam strong moa mo kam gud moa long wok blong talemaot gud nius. Pol i leftemap tingting blong Timoti, we i wan elda finis blong i gohed blong putum tingting blong hem i stap strong long wok blong hem, nao olgeta man oli save luk we hem i stap gohedgud long laef blong hem. (1 Tim. 4:13-15) Nomata sipos sam long yumi i pablisa longtaem finis no nogat, i gud yumi evriwan i traem blong kam gud moa long wok blong prij.
2 Putum Ol Mak Blong Yu: Sipos yu wantem kam gud moa long wok blong prij, yu mas kasem sam mak blong yu wan. ?Wanem sam long ol mak ya we yumi save kasem? Maet yumi save traehad blong kam gud moa long fasin blong yusum Baebol, we i olsem naef blong faet blong yumi long saed blong spirit. (Efes. 6:17) Ating i gat wan fasin blong prij we yumi mas kam gud moa long hem, maet prij long rod, long telefon, no long ol stoa mo ofis. Maet yumi save traehad blong kam gud moa long ol visit blong yumi. Wan narafala gudfala mak, hemia blong kam gud moa blong statem mo lidim ol Baebol stadi.
3 Ol Samting Blong Givhan Long Yumi: Olgeta miting blong kongregesen, antap moa Tiokratik skul mo Miting Blong Kingdom Wok, oli blong halpem yumi blong kam gud moa long wok blong prij. Sipos yumi traehad moa blong mekemrere from ol miting mo kam long olgeta, mo yumi folem ol advaes we i kamaot long olgeta, bambae oli givhan moa long yumi.—2 Kor. 9:6.
4 Yumi mas givgivhan long yumi blong gohedgud. (Prov. 27:17) Sipos yumi lesingud long ol narafala we yumi prij wetem olgeta, samting ya bambae i save givhan long yumi blong kam gud moa. Mo tu, maet elda we i lukaot long buk stadi blong yumi i mekem plan se wan narafala pablisa bambae i halpem yumi. !I wan bigfala blesing taem yumi save kasem help long wan paenia we i wok plante yia finis no long wan narafala pablisa, blong yumi save karem moa frut mo kasem bigfala glad long wok blong prij! ?Olsem wanem? ?I gat wan niufala pablisa long buk stadi blong yu? Sipos yes, ating yu save askem long hem blong i prij wetem yu.
5 Wok we i moa impoten i bitim olgeta narafala wok tede, hemia Kristin wok ya blong prij. Yumi wantem givim bes blong yumi long Jeova taem yumi stap ‘mekem sakrefaes long hem we i blong presem hem.’ (Hib. 13:15, NW) Sipos yu rili traehad blong kam wan man blong prij we i gohedgud, bambae yu save kam wan man ‘we i no gat sem long wok blong hem, mo we i stap tijim ol man long trutok blong God long fasin we i stret gud.’—2 Tim. 2:15.