Yumi Givhan Long Olgeta Blong Oli Yusum Gud Tok Blong God
1 Jeova i putumap plante rod blong mekem se ol minista blong hem oli save mekem ol gudfala wok. Yes, hem ‘i stap lidim yumi long rod we i stret blong yumi folem.’ (Sam 37:23) Taswe hem i stanemap Tiokratik Skul. Miting ya i givhan sloslou long ol pablisa blong oli toktok mo blong oli tij long gudfala fasin, mo skul ya i bin gohed olsem bitim 50 yia nao. Be afta long Tiokratik Skul, i gat Miting Blong Kingdom Wok. Long program blong miting ya, i gat ol gudfala tok i kamaot, ol pleplei mo ol haf wetem kwestin mo ansa.
2 Yumi kasem plante gudfala blesing from we ol elda we oli goraon oli visitim yumi oltaem. Antap long samting ya, elda we i lukaot long wok blong prij i visitim evri Buk Stadi wanwan. Hem i leftemap tingting blong yumi wetem fasin lav mo hem i givhan long yumi blong yumi nafgud long minista wok. Be moa yet, long evri miting blong go prij, long 10 menet, yumi kasem ol gudfala advaes mo sam rod we yumi save folem blong mekem wok blong prij long dei ya. (Hib. 10:23-25) Ol rod ya we Jeova i putumap insaed long ogenaesesen blong hem oli soemaot gud se hem i intres bigwan long olgeta we hem i givim wok long olgeta blong talemaot gud nyus.
YUMI GIVHAN LONG OL YANGFALA MO OL BAEBOL-STADI
3 Ol yangfala pablisa mo ol nyufala disaepol oli nidim we yumi givhan long olgeta long minista wok we yumi mekem long open ples. I tru se yumi save givhan long olgeta samtaem, be fastaem wok ya hem i wok blong ol papa mama blong olgeta no wok blong olgeta we oli stadi wetem ol. (Gal. 6:6; Efes. 6:4) Blong oli save yusumgud Baebol, oli no mas wet longtaem, gogo oli kasem plante ekspiryens, no gat. Oli nidim help blong wan narawan we i trenem olgeta oltaem mo i laekem olgeta.
4 Yumi mas halpem gud ol studen blong yumi bifo we olgeta oli joen long minista wok. Yumi save storebaot stampa tok blong prij wetem olgeta. Taem oli save joen long minista wok, yumi save givhan long olgeta. Yumi save halpem olgeta blong oli rere long wan smol toktok we i isi nomo. Maet oli save yusum wan vas nomo long tufala vas blong Baebol we yumi yusum long manis ya, go kasem taem we oli nafgud mo oli no moa fraet. Taem we yumi prij wetem olgeta, yumi mas tekem taem blong leftemap tingting blong olgeta, mo yumi save givim sam advaes long olgeta blong mekem olgeta oli kam gud moa. Yumi mas makemgud long tingting blong olgeta se i impoten blong prea plante mo oltaem.—Efes. 6:18, 19.
5 Plante taem, ol fultaem paenia mo ol narafala pablisa we oli gat ekspiryens oli joen long minista wok long medel wik. Be sipos ol pablisa ya we oli nafgud oli save jenisim plan blong olgeta blong joen samtaem wetem wan grup we i prij long en blong wik, samting ya i nambawan. Ol fren blong olgeta we oli wantem kam gud moa long wok blong prij oli glad tumas taem olgeta ya oli mekem olsem.—Ekles. 4:9, 10.
6 Samfala pablisa oli nafgud naoia, be bifo, olgeta tu oli no gat tumas ekspiryens long minista wok. Maet sam paenia no sam pablisa we oli gat moa ekspiryens long ol, oli trenem olgeta mo oli enkarajem olgeta. Ale, tede oli nafgud long wok blong prij mo oli stap glad oltaem taem we oli joen long minista wok. Olgeta wok ya we oli stap mekem naoia oli kam from help we oli kasem fastaem. (Prov. 27:17; Wok 20:35) !Yes, yumi save talem tangkyu long Jeova from we hem i putumap plante rod blong trenem yumi long minista wok! !Nao yumi tu, yumi mas wok strong blong givhan long ol narafala fren blong yumi blong oli yusum gud Tok blong God!