Leftemap Tingting Blong Olgeta We Oli Stap Krae
1. ?From wanem olgeta we oli stap krae from wan we oli lusum long ded, oli nidim narafala blong leftemap tingting blong olgeta?
1 Hem i wan bigfala sore taem wan man i lusum wan we hem i laekem tumas long ded, antap moa, sipos man i no gat bilif long ol blesing blong Kingdom. (1 Tes. 4:13) Plante oli askem se: ‘?From wanem ol man oli ded? ?Wanem i hapen long olgeta taem oli ded? ?Bambae mi mi save lukluk bakegen hemia we mi laekem hem tumas?’ ?Olsem wanem yumi save leftemap tingting blong olgeta we yumi mitim long wok blong prij, we oli stap krae from wan famle no fren blong olgeta we i ded? Yumi save luk sam advaes long saed ya.—Aes. 61:2.
2. ?Sipos wan man i talem se hem i stap harem nogud from wan ded long famle, i gud blong storian longtaem wetem hem?
2 Long Ol Haos Wanwan: Maet yumi mitim wan man we i talem se wan famle blong hem i jes ded. ?Olsem wanem? ?Fes blong man ya i soemaot se hem i stap harem nogud bigwan no maet hem i stap krae? ?I gat fulap man long haos ya we olgeta tu oli stap krae? Sipos i olsem, i moa gud yumi no storian longtaem tumas wetem man ya. (Pri. 3:1, 7) I gud yumi talem sore long man ya, givim wan traket, magasin, no buklet long hem, we i stret long trabol ya, mo afta, yumi talem tata wetem kaen fasin. Yumi save gobak long wan narafala taem we i moa stret long man ya mo yusum Baebol blong leftemap tingting blong hem.
3. ?Sipos yumi gat janis blong toktok wetem wan we i stap harem nogud, wanem ol vas blong Baebol we yumi save soemaot long hem?
3 Samtaem, long ol faswan storian ya, maet yumi luksave se yumi save talem moa. I klia se i no stret taem blong tokbaot ol giaman tijing, be maet yumi save ridim sam promes blong Baebol we oli tokbaot laef bakegen. (Jon 5:28, 29) Wan narafala rod, hemia se yumi save soemaot ol tok blong Baebol long saed blong wanem i hapen taem man i ded. (Pri. 9:5, 10) Sipos yumi talem wan stori blong Baebol long saed blong laef bakegen, samting ya i save leftemap tingting blong man ya mo mekem hem i harem gud moa. (Jon 11:39-44) Wan narafala rod bakegen, hemia blong ridim ol nambawan toktok we Job i bin talem long Jeova long saed blong bilif blong hem long laef bakegen. (Job 14:14, 15, NW) Bifo we yumi aot, maet yumi save serem buklet ya ?Wanem Bambae i Hapen Long Yumi Taem Yumi Ded?, no Taem Wan We Yu Laekem Hem Tumas i Ded, no wan narafala buklet no traket we i stret blong yusum long taem ya. No maet yumi save serem buk ya Baebol Tijim, mo soemaot sam poen long japta 6. Afta, yumi save mekem plan blong kambak blong gohed moa long storian ya.
4. ?Wanem sam narafala janis we yumi gat blong leftemap tingting blong olgeta we oli stap krae?
4 Long Sam Narafala Taem: Taem oli mekem tok long Haos Kingdom blong berem dedman no blong tingbaot man we i ded, ating sam man we oli no Witnes blong Jeova bambae oli kam. Taswe, i gud se long taem olsem, yumi serem sam buk blong yumi we oli leftemap tingting blong man we i stap krae. Mo tu, long sam niuspepa i gat wan smol haf insaed we i talemaot nem blong ol man we oli ded. Samfala oli bin tekem janis blong raetem wan smol leta i go long ol memba blong famle blong hemia we i ded, blong leftemap tingting blong olgeta. Tingbaot stori ya. Wan dei, wan man we i lusum woman blong hem i kasem wan leta we i kam long hem mo dota blong hem, mo i gat sam traket insaed tu. Nao tufala i go luk pablisa ya we i bin sanem leta ya, mo man ya i askem long pablisa se: “?Yu nao yu bin sanem leta ya? Oraet. !Mi mi wantem save moa long saed blong Baebol!” Ale, man ya wetem dota blong hem tufala i agri blong stadi Baebol, mo tufala i stat blong go long ol miting.
5. ?From wanem yumi mas kwik blong luksave ol janis blong leftemap tingting blong olgeta we oli stap krae?
5 Prija 7:2 i talem se: “Sipos yu go long wan haos we dedman i stap long hem, we ol man oli stap krae long hem, hemia i save givhan moa long yu, i winim we yu go long wan haos we i gat lafet long hem.” Man we i stap harem nogud long tingting blong hem i glad moa blong lesin long Tok blong God, i bitim man we i stap mekem lafet. Taswe yumi evriwan i mas kwik blong luksave ol gudfala janis blong leftemap tingting blong olgeta we oli stap krae taem wan we oli laekem hem tumas i ded.