Leta Blong Branj Ofis

Long Olgeta Pablisa Blong Kingdom:

!Mifala i glad tumas long ol gudgudfala wok we oli bin kamaot long teritori blong branj ofis blong yumi long laswan tiokratik yia!

Fastaem mifala i wantem talem long yufala se plante plan blong bildimap ol Haos Kingdom oli bin kamtru. Ol brata mo sista blong yumi long Ambae long Vanuatu, long Lifou mo long Ouegoua long Niukaledoni, oli glad tumas naoia blong mekem miting long ol niufala Haos Kingdom blong olgeta. Plan i stap gohed naoia blong bildim sam narafala haos. Mifala i wantem talem tangkiu bigwan long olgeta brata sista we oli bin wokhad long haf ya blong wosip, mo we oli wokgud wetem rejional bilding komiti. Haos Kingdom blong ol Witnes blong Jeova i olsem stamba ples blong trufala wosip, mo wan ples we man i save kasem toktok we i leftemap tingting.—Hibrus 10:24, 25.

Mo tu, long laswan tiokratik yia, yumi holem 29 asembli long olgeta teritori blong yumi: 13 long Niukaledoni, 12 long Vanuatu mo 4 long Walis. !Olgeta asembli ya evriwan oli olsem wan bigfala sing we i presem Man we i wokem yumi!—Hibrus 2:12.

Plante brata sista oli talem se oli laekem buk ya Baebol Tijim from we tru long buk ya, oli statem plante Baebol stadi. Buk ya i givhan tu long plante Baebol studen blong oli bildimap bilif blong olgeta, blong oli naf blong givim laef blong olgeta long Jeova.

Gudgudfala wok we i bin kamaot, hem i frut blong blesing blong Jeova mo traehad blong yumi wanwan.—1 Korin 3:6.

Ol brata blong yufala,

Branj Blong Niukaledoni