Wan Spesel Dei Blong Manis Blong Askem Long Ol Man Blong Oli Stadi Baebol
1 Stat long manis Jenuware i go, long evri manis bambae wanwan kongregesen i jusum wan dei long wiken, maet faswan wiken blong manis, blong askem long ol man long wok blong prij, sipos oli wantem stadi long Baebol. Maet kongregesen i jusum Sarede no Sande, i dipen long wanem dei we i moagud long ples blong yufala. Sipos ol man blong haos oli no wantem blong stadi Baebol, ol pablisa oli save givimaot yet buk ya Baebol Tijim, no ol laswan magasin we kongregesen i kasem. Evri elda mo man blong givhan oli mas joen fulwan long wok ya mo givhan long ol pablisa blong oli statem ol Baebol stadi.
2 Seves Komiti blong kongregesen bambae i jusum weswan wiken nao we bambae oli makem wan dei blong hem blong mekem wok ya blong askem Baebol stadi long ol man. I gud we wanwan taem kongregesen i talemaot dei ya bakegen, blong ol pablisa oli save rere mo mekem spesel traehad blong askem long ol man blong oli stadi Baebol, taem oli stap prij long ol haos wanwan mo taem oli visitim ol man we oli soem intres.
3 ?Olsem Wanem Blong Rere?: Long pepa we i stap insaed long Kingdom Wok Blong Yumi blong Jenuware 2006, mo long pej 5 blong smol buk ya Statem Wan Storian, yumi save faenem ol fastok we yumi save yusum blong statem Baebol stadi. Maet samfala oli laekem moa blong yusum wan traket, olsem traket ya ?Yu Yu Wantem Save Trutok? Mo tu, long pej 3 blong Kingdom Wok Blong Yumi blong Ogis 2007, i gat ol fastok we yumi save yusum blong statem ol Baebol stadi taem yumi visitim olgeta we oli bin tekem ol magasin. Ol elda mo ol man blong givhan we oli lidim miting blong prij folem program we i stap, bambae oli tekem 10 kasem 15 minit blong tokbaot wan no tu gudfala rod blong statem ol Baebol stadi, mo maet oli save mekem pleplei long hem.
4 I tru se i no evri man we bambae oli agri blong stadi Baebol, mo maet samfala oli stadi smoltaem nomo. Samting ya i no mas blokem yumi blong askem long ol man blong oli stadi Baebol, from we Jeova nao i stap pulum ol man we oli gat fasin olsem sipsip, blong oli kam long ogenaesesen blong hem. (Jon 6:44) Wok blong yumi i blong planem ol sid blong trutok, be taem ol sid ya oli gru, yumi gat wok ya tu blong lukaotgud long olgeta mo putum wota long olgeta. Hemia i minim se yumi mas stadi Baebol wetem olgeta we hat blong olgeta i stret. Taem yumi mekem olsem, yumi tekem janis ya blong joen wetem God blong mekem wok blong hem.—1 Kor. 3:9.