Yumi Mas Traehad Blong Statem Ol Baebol Stadi Long Fas Sarede Blong Manis

Long stat blong manis Mei 2011, yumi kasem advaes se yumi mas traehad blong statem ol Baebol stadi long fas Sarede blong manis. I gat wan haf long Wajtaoa blong pablik we i stap kamaot oltaem, we nem blong hem “Baebol i Ansa.” Haf ya i save givhan long yumi blong mekem olsem. From samting ya, long miting blong prij long fas Sarede blong manis, brata we i lidim miting ya i mas soemaot olsem wanem blong yusum haf ya blong statem ol Baebol stadi, mo hem i mas mekem wan pleplei blong soemaot samting ya.

Ol elda oli save mekem plan blong ol pablisa oli joen long ol grup wanwan long fas Sarede. Sipos no oli save mekem plan blong ol grup oli joen wanples long Haos Kingdom. Be sipos plante kongregesen oli yusum semfala Haos Kingdom, oli no mas jenisim spesel dei ya blong statem ol Baebol stadi, blong mekem se olgeta grup oli save joen wanples long miting blong prij.