‘Stap Long Laef Ya We God i Lavem Yu’
1. ?From wanem oli wokem buk ya ‘Stap Long Laef Ya We God i Lavem Yu’?
1 Yumi glad tumas blong kasem niufala buk ya ‘Stap Long Laef Ya We God i Lavem Yu,’ mo stat long wik blong Septemba 27 bambae yumi glad tumas blong stadi long buk ya long Baebol Stadi Blong Kongregesen. Long buk ya i gat wan leta we Hed Kampani i raetem i go long olgeta man we oli lavem Jeova, mo las toktok blong hem i talem se: “Mifala i wantem tumas se buk ya i halpem yu blong mekem trutok i wok oltaem long laef blong yu, from we long rod ya nao bambae ‘God i stap lavem yu’ mo bambae hem i save ‘givim laef long yu we i no save finis.’—Jud 21.”
2. ?Niufala buk ya bambae i halpem yumi long saed blong wanem?
2 Wanem We Bambae Yumi Lanem: ?Olsem wanem ol tingting blong Jeova we oli stap long Baebol, oli save halpem yumi taem yumi jusum ol fren, ol pleplei, mo taem yumi mas gat respek long ol man we oli lidim yumi? ?Mo olsem wanem oli save halpem yumi long ol fasin blong yumi wan, long mared, toktok, mo long ol kastom? Buk ya bambae i halpem yumi blong mekem we voes blong hat blong yumi i laenap moa wetem ol tingting blong Jeova we oli stap long Baebol. Ol tingting ya blong Jeova, oli hae moa mo oli stret moa i bitim tingting blong yumi. (Sam 19:7, 8) Moa we yumi kasem save ol tingting blong Jeova, moa we bambae yumi wantem obei long hem long evri samting we yumi mekem long laef blong yumi, from we yumi wantem tumas blong mekem Hem i glad.—Prov. 27:11; 1 Jon 5:3.
3. ?From wanem yumi mas traem bes blong yumi blong givim ol ansa long stadi ya evri wik?
3 Tingting Blong Yu i Mas Strong Blong Givim Ol Ansa: Taem yu stap rerem stadi blong yu evri wik, i gud yu putum wan mak se bambae yu leftemap nem blong God taem yu joen wetem ol narafala man blong hem long Baebol stadi ya. (Hib. 13:15) Fulwan kongregesen bambae i stadi long niufala buk ya tugeta. Ol haf we bambae yumi stadi long olgeta, evri wik, oli smol nomo. From samting ya bambae yumi gat naf taem blong rere gud mo tingting gud long ol samting we yumi lanem, mo fasin ya bambae i mekem yumi no fraet blong givim ansa mo serem samting we yumi lanem wetem ol narafala. Ol ansa we yumi rerem gud mo we oli go stret long poen bambae oli pulum yumi blong lavlavem yumi, mo blong mekem ol gudfala fasin, mo bambae i mekem we stadi blong yumi i laef, mo yumi lanem plante samting. (Hib. 10:24) Mo tu, yumi wanwan bambae i glad bigwan from we yumi talemaot bilif blong yumi.
4. ?From wanem i impoten tumas blong obei long ol tok blong Jeova?
4 Long laswan naet blong laef blong Jisas long wol ya, Jisas i tokbaot se man we i wantem we God i lavem hem oltaem, hem i mas obei long ol tok blong Jeova God. (Jon 15:10) Niufala buk ya ‘God i Lavem Yu’, bambae i halpem yumi blong gat tingting we i strong moa blong folem ol tok blong Baebol long laef blong yumi evri dei mo blong ‘stap long laef ya we God i lavem yumi.’—Jud 21.