Wok Blong Prij i Mekem Fasin Fren Blong Yumi Wetem Jeova i Stap Strong

1. ?Wok blong prij i givhan long yumi olsem wanem?

¹ Taem yumi joen oltaem long wok blong prij, fasin fren blong yumi wetem Jeova i kam strong moa mo yumi glad moa. I tru, faswan risen from wanem yumi prij, i blong mekem Jeova i glad. Be taem yumi obei long oda ya blong ‘talemaot tok blong God,’ yumi kasem blesing blong Jeova mo samting ya i givhan long yumi long sam narafala rod tu. (2 Tim 4:2; Aes. 48:17, 18) ?Olsem wanem wok blong prij i givim paoa long yumi mo i mekem yumi glad?

2. ?Long wanem rod wok blong prij i givim paoa long yumi?

² Yumi Kasem Paoa Mo Blesing: Wok blong prij i givhan long yumi blong putum tingting blong yumi i stap long ol blesing blong Kingdom, be i no long ol trabol we yumi fesem tede. (2 Kor. 4:18) Taem yumi eksplenem ol tijing blong Baebol, bilif blong yumi long ol promes blong God i kam strong moa, mo tangkiu we yumi gat from trutok i kam bigwan moa. (Aes. 65:13, 14) Taem yumi stap givhan long ol narafala blong oli frengud wetem God mo blong “oli no man blong wol ya,” yumi mekem tingting blong yumi i strong moa blong no joen long wol ya.—Jon 17:14, 16; Rom 12:2.

3. ?Olsem wanem wok blong prij i givhan long yumi blong wokem ol gudfala Kristin fasin?

³ Fasin blong joen long wok blong prij i givhan long yumi blong wokem ol gudfala Kristin fasin. Olsem nao, taem yumi mitim ‘ol man we oli gat ol defdefren kaen fasin,’ nao yumi ‘mekem olsem we yumi tu yumi gat sem fasin we oli gat,’ samting ya i givhan long yumi blong wokem tingting daon. (1 Kor. 9:19-23) Taem yumi stap toktok long olgeta we “oli trabol tumas, oli no moa gat paoa, oli olsem ol sipsip we i no gat man blong lukaot long olgeta,” samting ya i save pulum yumi blong gat sore long ol man, mo blong traem kasem save long filing blong olgeta. (Mat. 9:36) Yumi lanem fasin blong stanap strong longtaem taem yumi gohed nomo blong prij, nating se ol man oli no intres mo oli agensem yumi. Yumi kasem moa glad taem yumi yusum laef blong yumi blong givhan long ol narafala.—Wok 20:35.

4. ?Wanem tingting blong yu long wok blong prij?

⁴ !Hemia wan gudfala blesing ya blong yumi mekem wan wok we i leftemap nem blong God ya we hem nomo i stret blong yumi wosip long Hem! Wok ya blong prij i givim paoa long yumi. Olgeta we oli givim bes blong olgeta blong ‘talemaot gud nius fulwan’ bambae oli kasem plante blesing.—Wok 20:24, NW.