Wok Blong Prij i Givhan Long Yumi Blong Stanap Strong Longtaem
1 Baebol i pulum yumi blong “mekem tingting blong yumi i strong, blong yumi resis long rod ya we i stap long fes blong yumi.” (Hib. 12:1) Wan man blong resis i nidim blong stanap strong longtaem blong hem i save winim resis blong hem, taswe yumi tu yumi nidim blong stanap strong longtaem sipos yumi wantem kasem praes ya blong laef we i no save finis. (Hib. 10:36) ?Olsem wanem Kristin wok ya blong prij i save givhan long yumi blong stanap strong gogo kasem en?—Mat. 24:13.
2 Kam Strong Long Saed Blong Spirit: Taem yumi stap talemaot nambawan promes blong Baebol long saed blong niufala wol, yumi stap mekem we prapa hop blong yumi long saed ya i stap klia long tingting blong yumi. (1 Tes. 5:8) Taem yumi joen oltaem long wok blong prij, yumi gat janis blong mekem ol man oli kasem save long ol trutok we yumi lanem finis long Baebol. Yumi gat janis blong tokbaot from wanem yumi bilif olsem, mo bilif ya i givhan long yumi blong stanap strong long saed blong spirit.
3 Sipos yumi wantem tijimgud ol narafala, fastaem yumi wan yumi mas kasem save gud long Baebol. Yumi mas lukaotem moa save, mo tingting dip long stadi we yumi stap mekem. Ol traehad blong yumi bambae oli mekem se save blong yumi i kam bigwan moa, bilif blong yumi i kam strong, mo i givim moa paoa long yumi long saed blong spirit. (Prov. 2:3-5) Taswe, taem yumi traehad blong givhan long ol narafala, yumi stap mekem yumi wan yumi kam strong tu.—1 Tim. 4:15, 16.
4 Taem yumi stap wok strong long wok blong prij, hemia i wan impoten haf blong ‘olgeta klos blong faet, we God i givim.’ Yumi nidim ol klos ya blong yumi save stanap strong agens long Setan mo ol rabis enjel blong hem. (Efes. 6:10-13, 15) Taem yumi stap bisi long wok blong prij, hemia i givhan long yumi blong putum tingting blong yumi i stap long ol samting we oli mekem yumi stap strong, mo blong blokem wol blong Setan blong i no spolem yumi. (Kol. 3:2) Taem yumi tijim ol narafala long ol rod blong Jeova, oltaem bambae yumi tingbaot blong holemtaet ol klin fasin.—1 Pita 2:12.
5 God i Givim Paoa: Mo tu, taem yumi joen long wok blong prij, wok ya i tijim yumi blong trastem Jeova. (2 Kor. 4:1, 7) !Hemia i wan blesing! Taem yumi wokem fasin tras ya, yumi kam strong moa blong prij, mo yumi naf blong fesem eni samting we i save hapen long laef blong yumi. (Fil. 4:11-13) Yes, taem yumi lanem blong trastem Jeova, hemia i wan impoten samting we i lidim yumi blong stanap strong longtaem. (Sam 55:22) Wok blong prij i givhan long yumi long plante rod, blong yumi save stanap strong longtaem.